Komandalar mövsümə uğurlu başlamamışdı.

Təbii ki, meydan sahiblərinin vəziyyəti "qırmızı-qaralar"la müqayisədə daha qənaətbəxş idi. Bölgə təmsilçisi arxada qalan 3 turda 1 xal belə qazana bilməmişdi. "Qəbələ"nin yeni “futbol ili”ndə yeganə sevinci ötən turda qol hesabını açması idi. Odu ki, qonaqlar bu oyunda nəyin bahasına olur-olsun, ilk xalını, "ağ-qaralar" isə ilk qələbəsini qazanmaq istəyirdi.
İlk 15 dəqiqədə oyun meydanın mərkəzində getdi.

İlk qol vəziyyətini 17-ci dəqiqədə "qırmızı-qaralar" yaratdı. Emil cərimə zərbəsiylə qapını yoxlasa da, qapıçı yerində idi. Qonaqlar əsasən “vaxt öldürməklə” məşğul idi. Onlar hər çiyin-çiyinə mübarizə, hər xırda təmas zamanı özlərini yerə atırdılar. Hissənin sonlarına doğru Emin Mahmudovun kornerdən asmasına Matias çatmağa çalışsa da, Atanqana topu tutdu.

Meydan sahibləri qol istəyinə ilk yarıya əlavə olunan dəqiqələrdə çatdı. 45+3-cü dəqiqədə Koffi cərimə meydancasına daxil olan Rəhmanı gördü. Sonuncu dəqiqə zərbəylə Atanqananı məyus etdi. "Neftçi" fasiləyə üstün yollandı.  2-ci yarıya da meydan sahibləri fəal qoşuldu. Matiasın uzaqdan zərbəsi hədəfə düşmədi. Şinyaşikinin oxşar həmləsi də uğursuz oldu. 66-cı dəqiqədə Rza topa çıxışda kobud səhvə yol verdi. Hani topu ələ keçirib zərbə endirsə də, boş qapıya düşə bilmədi. Bir qədər sonra gənc qolkiper topa çıxışdakı səhvinə görə qırmızı vərəqəylə "mükafatlandırıldı". Allaşın cərimə zərbəsi də qeyri-dəqiq alındı. Auşeriyanın iti bucaq altından həmləsini isə Brkiç kornerə çıxardı. Ayzayanın cəhdi də uğursuz alındı. Bəlkə də bu oyun fərqli nəticələnə bilərdi. 80-ci dəqiqədə Sayefin kornerdən cərimə meydançasına ötürməsini Matias dəqiq zərbə ilə tamamlamasaydı.

“Qəbələ” 2-ci qoldan sonra təzyiqi artırdı, hətta Ayzaya iki dəfə Brkiçlə duelə yollandı. Ancaq qonaqlar təsəlli qolunu da vura bilmədi. “Qəbələ”nin enişi davam edir, iş ondadı ki, tunelin sonunda da işıq görünmür.

Gözdən qaçmadı
* Qəbələdən oyunu izləmək üçün təxminən 20-yə yaxın "Red-Black Army" fanatı gəlmişdi
* 38-ci dəqiqədə Emil Səfərovun yerdə qalmasına rəğmən, meydan sahibləri hücumu davam etdirdi. Yalnız Atanqana topu tutandan sonra referi fit çaldı. Bu zaman Ayzaya ilə Koffi arasında mübahisə yaşandı. Bir dəqiqə sonra isə "Qəbələ"nin köməkçi məşqçisi Xaqani Məmmədovla Yuri Matias arasınsa qarşıdurma yaşandı. Lakin Elmar Baxşıyev məsələnin böyüməsinə imkan vermədi. 
* Matç bitəndən sonra "Neftçi"  qələbəni azarkeşləriylə qeyd etdi.