Premyer-liqada 11-ci tur arxada qaldı. Açılış oyunu şənbə günü keçirildi.

Derbidə “Zirə” “Sabah”ı qəbul etdi. Düzdü, oyunu izləyən azarkeşlərin sayı az idi. Lakin ekran başındakı tamaşaçılar gərgin mübarizəyə şahidlik etdi. Hesabı “qartallar” açsa da, Şahin Diniyevin komandası asan təslim olmaq niyyətində deyildi. Pedro Nuno 3 dəqiqə ərzində dubl edərək “Səbail”i önə keçirdi. Təbii ki, bu, görüşdə vurulan son qol olmadı. “Səbail”in qələbəni qorumaq cəhdləri baş tutmadı. Rüstəm Əhmədzadə 79-cu dəqiqədə komandasına 1 xal qazandıran qola imza atdı.

Şənbə derbi günü idi. Tovuzda yerli komanda “Kəpəz”i qəbul edirdi. 5000 tamaşaçının izlədiyi görüşdə 4 qol vuruldu. Düzdü, “Kəpəz” 45 dəqiqə qapısını toxunulmaz saxlaya bildi. Lakin ilk hissənin son dəqiqəsində Oto Con hesabı açdı. Fasilədən sonra isə Roderik Miller, Sərtan Taşkın və Luis Paçu darmadağını rəsmiləşdirdi. Bununla da “Turan Tovuz” mövsümdə ilk ev qələbəsini qazandı.

Bazar günü ilk oyun Sumqayıtda keçirildi. Bu komandaların qarşılaşması maraqla gözlənilirdi. Çünki “kimyaçılar” qələbə qazanacağı təqdirdə avrokuboklar uğrunda mübarizə aparan komandalar sırasına qoşulacaqdı. “Qəbələ” ilə növbəti 3 xalı əldə edərək autsayderlər qrupundan qurtulmaq istəyirdi. Lakin hər iki komandanın cəhdlərinə baxmayaraq, matçda qol vurulmadı.

Günün son matçı “Neftçi Arena”da keçirildi. Derbi olduqca maraqlı və baxımlı keçdi. Komandaların ikisi də gözəl oyun nümayiş etdirdi. Lakin qalibi müəyyənləşdirən qol uzatma dəqiqələrində vuruldu. Cəzalı Murad Musayevin yoxluğunda “bayquşlar” qələbə qazana bildi. Boyan Letiçin yeganı qolu Masazır klubuna hava-su kimi vacib olan 3 xalı qazandırdı.

Həftənin son matçında sensasiya qeydə alındı. Tofiq Bəhramov adına Respublika stadionunda “Araz-Naxçıvan” “Qarabağ”ı qəbul edirdi. İlk 60 dəqiqə maraqsız keçdi. Əsas hadisələr oyunun son üçdəbir hissəsində cərəyan etdi. “Qırmızı-ağlar” Orxan Əliyevlə penaltidən hesab açdı. Matça əlavə edilmiş dəqiqələrdə Elvis Maşike komandasının üstünlüyünü artırdı. Lap sonda Juninyo fərqi azaltsa da, “köhlən atlar”ın bundan artığına gücü çatmadı. Beləliklə, Muxtar Respublika təmsilçisi çempionu da məğlub etdi. Azər Bağırovun komandası xal hesabını 20-yə çatdırmaqla çempionluq mübarizəsində “mən də varam” dedi.

Misli premyer-liqası
2-ci dövrə, 11-ci tur
Zirə - Səbail 2:2
Turan Tovuz – Kəpəz 4:0
Sumqayıt – Qəbələ 0:0
Neftçi – Sabah 0:1
Araz-Naxçıvan – Qarabağ 2:1
1. Zirə 11 6 3 2 11-7 21
2. Qarabağ​11 6 2 3 21-10 20
3. Araz-Naxçıvan 11 6 2 3 15-11 20
4. Səbail 11 5 3 3 19-17 18
5. Neftçi 11 4 3 4 11-10 15
6. Turan Tovuz 11 4 3 4 18-13 15
7. Sumqayıt 11 4 3 4 10-13 15
8. Sabah 11 3 4 4 15-14 13
9. Qəbələ 11 2 2 7 7-20 8
10. Kəpəz 11 1 3 7 5-17 6
Bombardirlər: Olavio Juninyo (Qarabağ) - 8, Aleksandr Ramalinqom (Səbail) – 5.
Növbəti turun oyunları
3 noyabr, 19.00. Səbail – Turan Tovuz
4 noyabr, 15.00. Kəpəz – Qarabağ
4 noyabr, 18.00. Sumqayıt – Araz-Naxçıvan
5 noyabr, 16.00. Qəbələ - Neftçi
5 noyabr, 18.30. Sabah – Zirə

İLKİN SULTANLI