Milli fasilə başa çatan kimi premyer-liqanın 6-cı turu start götürdü.

Həftənin açılış matçı Zirədə keçirildi. Yerli komanda “Sumqayıt”ı qəbul edirdi. Artıq 11-ci dəqiqədə “qartallar” azlıqda qaldı – Pyer Zebli meydandan qovuldu. Lakin bu məqam da premyer-liqanın liderinin qarşısını ala bilmədi. Rəşad Sadıqovun komandası əzmkarlıq göstərərək ilk hissəyə əlavə olunan dəqiqədə qol vurdu. Məqsəd İsayev “qartallar”ı sevindirdi. 2-ci hissədə isə “Zirə” ənənəvi taktikadan istifadə etdi. Rəşad Sadıqovun komandası müdafiə olunmaqla hesabına növbəti 3 xalı yazdı.
Həftənin ikinci matçı Gəncədə keçirildi. “Kəpəz” Şahin Diniyevin “Səbail”ini qəbul edirdi. Oyun bakılılar üçün o qədər də çətin keçmədi. 2-ci dəqiqədə “sarı-göylər”in sabiq kapitanı hesabı açdı. 16-cı dəqiqədə Almeyda hesabı 0:2 etdi. Fasiləyə kimi gəncəlilər nəsə etmək istəsələr də, alınmadı. Fasilədən sonra “Kəpəz” yenə qol vurmağa cəhdlər edirdi. Lakin Ramalinqom komandasının üçüncü qolunu vuraraq yekun hesabı bəlli etdi. Diniyevin komandası ardıcıl 3-cü qələbəsini qazanmaqla iddialılar sırasına adını yazdırdı.

Günün ikinci oyunu “Dalğa Arena”da keçirildi. Çoxları “Araz-Naxçıvan”la qarşılaşan “Neftçi”dən qələbə gözləyirdi. Lakin heç nə gözlənilən kimi olmadı. Adrian Mutunun komandası debütant qarşısında qeyri-adi heç nə edə bilmədi. Naxçıvanlılar Orxan Əliyevin penaltidən vurduğu qolla növbəti 3 xalını hesabına yazdı. Beləliklə, flaqman 6-cı turda 2-ci məğlubiyyətini aldı. “Araz-Naxçıvan” isə sensasiyaya imza ataraq liderlər qrupunda yer almağa davam edir.

Üçüncü oyun gününün ilk qarşılaşmasında “Turan Tovuz”la “Qəbələ” üz-üzə gəldi. Qarşılaşma “boz qurd” üçün yaxşı başladı. Ayxan Abbasovun komandası fasilədən sonra ardıcıl iki qol vurdu. Əvvəlcə Fərid Nəbiyev, daha sonra Beladji Pussi fərqləndi. Lakin oyuna sonradan qoşulan Xalayla “Qəbələ”nin məğlub olmasına imkan vermədi. O, dubl edərək qarşılaşmada yekun hesabı müəyyənləşdirdi.

Həftənin son matçı “Tofiq Bəhramov”da keçirildi. “Qarabağ” – “Sabah” matçı böyük maraq kəsb edirdi. Bir çoxları Murad Musayevin rəhbərlik etdiyi komandanın çempionu məğlub edə biləcəyini düşünürdü. Lakin ağdamlılar bunun o qədər də rahat olmadığını meydanda isbat etdi. Əvvəlcə Juninyo, matçın sonlarında isə Keyta fərqləndi. “Sabah”ın böhranı davam edirsə, “Qarabağ” artıq liderin əsas izləyicisidi.

Misli premyer-liqası
1-ci dövrə, 6-cı tur
15 sentyabr
Zirə - Sumqayıt 1:0
16 sentyabr
Kəpəz – Səbail 0:3
Araz-Naxçıvan – Neftçi 1:0
17 senytabr
Turan Tovuz – Qəbələ 2:2
Qarabağ – Sabah 2:0
1. Zirə 6 5​0 1 6-2 15
2. Qarabağ​6 3 1​2 9-5​10
3. Turan Tovuz​6 3 1​2 11-8 10
4. Səbail 6 3 1 2 11-9 10
5. Araz-Naxçıvan 6 3 1 2 7-7 10
6. Neftçi 6​2 2 2​5-4 8
7. Sumqayıt 5 2​1 2 7-5 7
8. Sabah 5 1 1 3 6-7 4
9. Kəpəz 6​1 1 4 3-9 4
10. Qəbələ​6 1 1 4 4-13 4
Bombardirlər: Aleksandr Ramalinqom (Səbail) – 4, Orxan Əliyev (Araz-Naxçıvan), Martin Petkov, Belajdi Pusi (hər ikisi "Turan Tovuz"), Osama Xalayla (Qəbələ), Olavio Juninyo (Qarabağ) – 3.

Növbəti turun oyunları
23 sentyabr, 18.00. Sumqayıt – Turan Tovuz
23 sentyabr. 20.30. Neftçi – Zirə
24 sentyabr. 17.00. Sabah – Kəpəz
24 sentyabr. 19.30. Səbail – Araz-Naxçıvan
25 sentyabr. 19.30. Qəbələ - Qarabağ