Misli premyer-liqasının 10-cu turu arxada qaldı. Həftənin ilk oyunu Tovuzda keçirildi.
“Boz qurd”un “Qarabağ”ı qəbul etdiyi qarşılaşmanı 6 min azarkeş canlı izləyirdi. 90 dəqiqə həyəcanla seyr etdiyimiz matçda qalib müəyyənləşmədi. Bu nəticə ilə “Qarabağ” vahid lider olmaq şansını itirdi. “Turan Tovuz” da tarixində ilk dəfə Ağdam təmsilçisindən xal ala bildi. Düzdü, hakim səhvləri olmasaydı, tovuzlular qələbə də qazana bilərdi. Lakin ən ədalətli nəticə elə heç-heçə idi.
Paytaxt derbisi də çox maraqlı keçdi. 6 qolun vurulduğu görüşdə “Səbail”in ardıcıl 5 oyunluq məğlubiyyətsizlik seriyası qırıldı. “Neftçi” əsas rəqiblərindən birini büdrədərək çempionluq mübarizəsində “mən də varam” dedi. Əslində “Səbail” matça çox yaxşı başlamışdı. Lakin Adrian Mutu dəyişiklərlə qarşılaşmanı çevirə bildi. Flaqmanın əsas rəqiblərinin xal itirdiyi turda qələbə qazanması çempionatın seyrini bir qədər də dəyişdi.
Şənbə günü ilk oyun Tovuzda keçirildi. “Kəpəz” – “Zirə” görüşünü izləmək vaxt itkisi idi. Komandalar kəsərli hücumlar qurmur, mübarizə əsasən meydanın mərkəzində gedirdi. Düzdü, ilk yarıda “sarı-göylər” daha yaxşı təsir bağışladı. Lakin Gəncə təmsilçisinin üzvlərinin futbolçu keyfiyyətinin aşağı olması “sarı-göylər”in bu görüşdə 2 xal itirməsinə səbəb oldu.
Günün ikinci oyunu Masazırda keçirildi. “Sabah” “Sumqayıt”ı qəbul edirdi. Əslində hər şey “kimyaçılar” üçün yaxşı başladı. Samir Abasovun komandası hesabı açsa da, üstünlüyünü qoruya bilmədi. Etiraf etmək lazımdısa, “bayquşlar” əla oyun sərgiləyərək 3 xalı hesabına yazdırmadı. Sadəcə, əzmkarlıq və güc nümayişi “Sabah”ın çempionatda 2-ci dəfə qələbə qazanmasına şərait yaratdı.
Həftənin son matçı Qəbələdə keçirildi. Yerli komanda “Araz-Naxçıvan”la üz-üzə gəlirdi. Matçın ilk dəqiqələrini “qırmızı-qaralar”ın hesabına yazmaq olar. Lakin “radarlar”ın üzvləri əlinə düşən fürsətləri sağa-sola xərclədi. Elmar Baxşıyevin komandasının iki futbolçusunun qırmızı vərəqəyə layiq görülməsi işləri korladı. “Araz-Naxçıvan” isə rəqibinə rəhm etmədi. Azər Bağırovun komandası istənilən kollektivə başağrısı olacaqlarını Qəbələdə bir daha göstərdi.
Hesabat turu ilə bağlı daha bir maraqlı məqam var. Misli premyer-Liqasında son 23 ayın rekordu qeydə alındı. Üç gün ərzində keçirilən 5 oyunda 19 top vuruldu. “Səbail” – “Neftçi” matçında 6, “Qəbələ” – “Araz-Naxçıvan” görüşündə 5, “Turan Tovuz” – “Qarabağ” və “Sabah” – “Sumqayıt” qarşılaşmalarının hərəsində 4 qol qeydə alındı. Bir turda 19 qolun vurulması təkcə mövsümün yox, 10 komandanın mübarizə apardığı son iki çempionatın mütləq rekordudu. Orta məhsuldarlıq 3,80-ə bərabər oldu. Ölkə çempionatları tarixində daha yüksək məhsuldarlığa sonuncu dəfə 2021-in noyabrında təsadüf olunub. 2021/22 mövsümünün 10-cu turunun 4 matçında 17 qol vurulub. Həmin vaxt məhsuldarlıq 4,25-ə bərabər idi. Noyabrın 6-7-də keçirilən turda “Sabah” – “Zirə” (3:3), “Şamaxı” – “Neftçi” (3:2), “Səbail” – “Qəbələ” (0:2) və “Sumqayıt” – “Qarabağ” (0:4) görüşləri keçirilib.
Misli premyer-liqası
2-ci dövrə, 10-cu tur
Turan Tovuz – Qarabağ 2:2
Səbail – Neftçi 2:4
Kəpəz – Zirə 0:0
Sabah – Sumqayıt 3:1
Qəbələ - Araz-Naxçıvan 1:4
1. Zirə 10 6 2 2 9-5 20
2. Qarabağ 10 6 2 2 20-8 20
3. Səbail 10 5 2 3 17-15 17
4. Araz-Naxçıvan 10 5 2 3 13-10 17
5. Neftçi 10 4 3 3 11-9 15
6. Turan Tovuz 10 3 3 4 14-13 12
7. Sumqayıt 9 3 2 4 9-13 11
8. Sabah 9 2 4 3 14-13 10
9. Qəbələ 10 2 1 7 7-20 7
10. Kəpəz 10 1 3 6 5-13 6
Bombardirlər: Olavio Juninyo (Qarabağ) – 7, Aleksandr Ramalinqom (Səbail) – 5.
Növbəti turun oyunları:
28 oktyabr, 16.00. Zirə - Sabah
28 oktyabr, 19.00. Turan Tovuz – Kəpəz
29 oktyabr, 16.00. Sumqayıt – Qəbələ
29 oktyabr, 8.30. Neftçi – Sabah
30 oktyabr, 19.00. Araz-Naxçıvan – Qarabağ