Misli premyer-liqasının 3-cü turunun ilk oyunu Gəncədə keçirildi.

"Football-plus.az" xəbər verir ki, “Kəpəz” “Turan Tovuz”u qəbul edirdi. Qərb derbisi həmişə azərbaycanlı futbolsevərlərin diqqət mərkəzində olub. Bu görüş də olduqca maraqlı keçdi. “Sarı-göylər” oyuna yaxşı başlasa da, Ayxan Abbasovun komandasının təzyiqinə tab gətirə bilmədi. “Boz qurd” tarixində ilk dəfə Gəncədən qələbə ilə ayrıldı.

Turun ikinci oyunu da olduqca maraqlı keçdi. Qəbələdə yerli komanda “Sumqayıt”ı qəbul edirdi. Elmar Baxşıyevin rəhbərlik etdiyi kollektiv çempionata çox pis başlayıb. Bu səbəbdən də bu matç “qırmızı-qaralar”ın özünə gəlməsi üçün yaxşı şans idi. Lakin “kimyaçılar” səfərdə “radarlar”ı məğlub edərək “Səbail” üzərindəki qələbənin təsadüfi olmadığını göstərdi.

Şənbə günü keçirilən ikinci qarşılaşma da maraqlı keçdi. Paytaxt derbisində “Səbail” “Zirə” ilə üz-üzə gəlirdi. Baxımlı keçən görüşün taleyini 3 qol həll etdi. “Zirə” çempionatda növbəti qələbəsini qazanaraq liderliyini davam etdirir.

Bazar günü də iki oyun keçirildi. Əvvəlcə “Qarabağ” “Araz-Naxçıvan”ı sınağa çəkdi. “Köhlən atlar” qarşılaşmaya yaxşı başlayaraq 15-ci dəqiqədə hesabı açdı. Lakin “qırmızı-ağlar” toparlanmağı bacardı. Kuzmanoviç hesabı bərabərləşdirsə də, naxçıvanlıların bundan artığına gücü çatmadı. Əvəzində “Qarabağ” 90+5-ci dəqiqədə qələbə topunu vura bildi. Zubir komandasına çox vacib 3 xal qazandırdı.

Turun mərkəzi oyunu isə Masazırda keçirildi. “Sabah”ın “Neftçi”ni qəbul etdiyi görüş qalmaqallarla yadda qaldı. Murad Musayevin qırmızı vərəqə alması, futbolçular arasındakı davalar qarşılaşmanı daha da maraqlı edirdi. Lakin matçda qalib gələn olmadı. Rəqiblər hərəyə bir dəfə fərqləndi.

Misli premyer-liqası
1-ci dövrə, 3-cü tur
18 avqust
Kəpəz – Turan Tovuz 0:2
19 avqust
Qəbələ - Sumqayıt 1:2
Səbail – Zirə 1:2
20 avqust
Qarabağ – Araz-Naxçıvan 2:1
Sabah – Neftçi 1:1

1. Zirə 3 3 0 0 4-1 9
2. Sumqayıt 2 2 0 0 6-2 6
3. Qarabağ 3 2 0 1 5-2 6
4. Turan Tovuz 3 2 0 1 5-3 6
5. Sabah 2 1 1 0 6-1 4
6. Araz-Naxçıvan 3 1 0 2 3-5 3
7. Kəpəz 3 1 0 2 1-3 3
8. Neftçi 3 0 2 1 2-3 2
9. Səbail 3 0 1 2 3-7 1
10. Qəbələ 3 0 0 3 1-9 0

Bombardirlər: Martin Petkov (Turan Tovuz) – 3, Adama Diakabi, Abdulla Zubir (hər ikisi “Qarabağ”) – 2.

Növbəti turun proqramı:
25 avqust. 20.00. Araz-Naxçıvan – Sumqayıt
26 avqust. 17.00. Turan Tovuz – Səbail
26 avqust. 19.30. Zirə - Sabah
27 avqust. 18.30 Neftçi – Qəbələ
27 avqust. 20.45. Qarabağ – Kəpəz