Avqustun 12-də Misli premyer-liqasının 2-ci turu start götürdü.

Şənbə günü PFL rəsmi saytı vasitəsi ilə açıqlama yaydı ki, “Sabah” Konfrans Liqasının 3-cü təsnifat mərhələsində “Partizan”la cavab matçına yaxşı hazırlaşmaq üçün quruma müraciət edərək “Sumqayıt”la görüşün təxirə salınmasını istəyib. “Kimyaçılar”ın da razılığını əsas gətirən çempionatın təşkilatısı qarşılaşmanın qeyri-müəyyən vaxt ertələyib.

Şənbə günü isə iki matç keçirildi. “Dalğa Arena”da “Araz-Naxçıvan” “Qəbələ”ni qəbul etdi. Həftənin sensasiyası Mərdakanda yaşandı. “Qırmızı-ağlar” “radarlar”ı 2:0 hesabı ilə məğlub etdi. Azər Bağırovun komandası, demək olar ki, bütün komponentlərdə rəqibi üstələyərək 9 illik fasilədən sonra qayıtdıqları premyer-liqada ilk qələbəsini qazandı.

Günün ikinci qarşılaşması Zirədə keçirildi. Burda yerli komanda “Kəpəz”i qəbul edirdi. Qarşılaşmaya maraq böyük idi. Çünki hər iki kollektiv ilk turda çempionatın favoritləri sayılan “Qarabağ”ı və “Neftçi”ni minimal hesabla məğlub etmişdi. Bu görüşdə qalib gələn kollektiv turnir cədvəlində liderliyə yüksələcəkdi. Bu imkandan isə Rəşad Sadıqovun rəhbərlik etdiyi komanda faydalandı. Kapitan Qismət Alıyevin vurduğu qol “qartallar”a 3 xal qazandırdı.

Turun mərkəzi görüşü bazar günü “Azersun Arena”da keçirildi. “Qarabağ” “Turan Tovuz”u qəbul etdi. “Qarabağ”ın çempionata yaxşı başlamaması “boz qurd”un iştahını artırmışdı. Çünki tovuzlular ilk turda “Araz-Naxçıvan”ı darmadağın etmişdi. Lakin Qurban Qurbanovun komandası Ayxan Abbasovun kollektivinin sevinməsinə imkan vermədi. “Köhlən atlar” zəif təsir bağışlayan Qərb təmsilçisinin qapısından 3 cavabsız qol keçirirməklə inamlı qələbə qazandı.

Həftənin son görüşü isə “Neftçi Arena”da keçirildi. Flaqman paytaxt derbisində “Səbail”lə qarşılaşdı. Turun 2-ci sensasiyasının astanasından qayıtdıq. “Ağ-qaralar” yalnız sona 8 dəqiqə qalmış vurduğu penalti qolu ilə məğlubiyyətdən qaçdı. Amma Türkiyə səfərdi ərəfəsində qələbə qazanmaqla ruh yüksəkliyinə nail olmaq mümkün idi.

Misli premyer-liqası
1-ci dövrə, 2-ci tur
12 avqust
Araz-Naxçıvan – Qəbələ 2:0
Zirə - Kəpəz 1:0
13 avqust
Qarabağ – Turan Tovuz 3:0
14 avqust
Neftçi – Səbail 1:1

1. Zirə 2 2 0 0 2-0 6
2. Sabah 1 1 0 0 5-0 3
3. Sumqayıt 1 1 0 0 4-1 3
4. Qarabağ 2 1 0 1 3-1 3
5. Turan Tovuz 2 1 0 1 3-3 3
6. Kəpəz 2 1 0 1 1-1 3
7. Araz-Naxçıvan 2 1 0 1 2-3 3
8. Neftçi 2 0 1 1 1-2 1
9. Səbail 2 0 1 1 2-5 1
10. Qəbələ 2 0 0 2 0-7 0

Bombardir: Petkov (Turan Tovuz) – 2.

Növbəti turun proqramı:
18 avqust, 17.00. Kəpəz – Turan Tovuz
19 avqust, 18.00. Qəbələ - Sumqayıt
19 avqust, 20.00. Səbail – Zirə
20 avqust, 18.00. Qarabağ – Araz-Naxçıvan
20 avqust, 20.00. Sabah – Neftçi

İLKİN SULTANLI