Mövsümü heç kimin gözləmədiyi qədər yaxşı başlayan "Səbail"in bu oyunda da necə təsir bağışlayacağı maraqlı gözlənilirdi.

Azarkeşlər yerini rahatlamış hesab açıldı. 2-ci dəqiqədə David Qomis yaxın küncə zərbəsi Brkiçin inanılmaz səhvindən sonra tora daxil oldu. Amma “dənizçilər”in üstünlüyü uzun sürmədi. 12-ci dəqiqədə Ozobiçin qapı qarşısına zərbəyəbənzər ötürməsindən sonra boş qalan Azər Əliyev fürsəti boşa vermədi. Qarşılıqlı hücumlar şəraitində davam edən oyunun 39-cu dəqiqəsində Pedro Nuno cərimə zərbəsindən təhlükəli zərbə vursa da, bu epizod qolla nəticələnmədi. 40-cı dəqiqədə Sayef qapı qarşısına gözəl ötürmə versə də, nə Olanare, nə də Ozobiç bu topa çata bildi. Uzatma dəqiqələrində Olanare sona kimi oynayaraq Caberə ötürmə verdi. Fələstinli isə topu tirin altına “sancdı”, Səlahətin komandasına yardım etməsi mümkünsüz idi. 55-ci dəqiqədə Nuno hiyləgər şəkildə qapıya zərə endirsə də, planı baş tutmadı. 66-cı dəqiqədə Qomisin qapıya təhlükəli olmayan zərbəsini Brkiç rahatlıqla saxlaya bildi. “Dənizçilər”in fəallığı 81-ci dəqiqədə hesabın bərabərləşməsi ilə nəticələndi. Bu mövsümün kəşflərdindən olan Ramalinqom Matiaşı yerə sərib topu elə yerə göndərdi ki, Brkiç, sadəcə, gücsüz idi. “Neftçi” bu hesabla barışmaq istəmədiyindən böyük qüvvə ilə irəli atıldı.

Mehrimiçin ötürməsindən sonra Tamaşdan qaçan Ramalinqom bərabərlik qoluna imza atdı. 88-ci dəqiqədə Qaranın standart vəziyyətdən asmasını Matias başla qola çevirdi. Amma bu da oyunda son qol olmadı. Hesabı bərabərləşdirməyə çalışan “Səbail”i uzatma dəqiqələrində Rəhman Hacıyev cəzalandırdı. Düzdü, bu qolda ən azı onun qədər Sinyaşikinin də payı var idi. Beləliklə, Şahin Diniyevin məğlubiyyətsiz oyunlar seriyası başa çatdı. “Səbail” sonuncu dəfə iki ay əvvəl “Zirə”yə uduzmuşdu.

Gözdən qaçmadı 

* Cəzalı Emin Mahmudov topdaşıyan uşaqlarla bir-bir görüşərək şəkil çəkdirdi.
* Oyunu izləyənlər arasında "İdman TV"nin şərhçisi Səyavuş Əliyevlə tanınmış aktyor Kamran Ağabalayev də var idi.
* 44-cü dəqiqədə fanatlar "Şəhidlər ölməz, vətən bölünməz" şüarını səsləndirdi.
* Əvəzetmələri və uzatma dəqiqələrini göstərən tablo işləmirdi. Yalnız oyunun sonunda  bu problem aradan qaldırıldı.

CAVİD ƏLİYEV