"Neftçi"nin bu arenaya son səfəri 2020/21 mövsümdə gerçəkləşmişdi. "Ağ-qaralar" çempionluğun taleyini həll edən həmin oyunda "Qarabağ"a minimal (1:0) hesabla qalib gələrək ölkə çempionu olmuşdular. Belə desək, "Dalğa Arena" flaqman üçün xoş xatirələr məskənidi. Amma bu dəfə…

İlk 15 dəqiqədə “Neftçi” daha təhlükəli idi və iki dəfə hesabı açmağa yaxın oldu. 10-cu dəqiqədə Ozobiçin qapı önünə ötürməsinə oyundaşlarından heç kim ayaq qoya bilmədi. 12-ci dəqiqədə isə Valdesin 22-23 metrdən zərbəsi qapıdan aralı keçdi. Nominal meydan sahiblərindən ilk zərbə 19-cu dəqiqədə gəldi. Orxan Əliyev cərimə meydançasının xətti üzərindən dəqiq, amma güclü olmayan zərbə vurdu ki, Brkiç belə topları buraxan deyil. Bir dəqiqə sonra Lebonun zərbəsi müdafiəçilərdən qayıtdı. 22-ci dəqiqədə Lebonun Valdesə təhlükəli ötürməsinin qarşısını son anda Turan Manafov aldı. 34-cü dəqiqədə Emin Mahmudovun qapının uzaq küncünü “nişan almaq” istəyi də boşa çıxdı. 41-ci dəqiqədə Kuzmanoviçin ötürməsindən sonra Orxanın vurduğu zərbə qapıdan az fərqlə aralı keçdi.

2-ci hissə qarşılıqlı hücumlar şəraitində keçdi. Düzdü, real qol vəziyyyətlərinin çoxluğundan danışmağa dəyməzdi. Və bu oyunda həqiqət anı 79-cu dəqiqənin tamamında yetişdi. Oyuna sonradan qoşulan Bayraməli Qurbanov iti ara ötürməsi ilə Azzauini qapıçıyla duelə göndərdi. Brkiçin onu aldadan İsmaili yerə sərməkdən başqa çarəsi qalmadı. “Nöqtə”yə yaxınşalan Orxan Əliyev qapıçı ilə topu fərqli künclərə göndərdi. Mutu oyunun axarını dəyişmək üçün qoldan dərhal sonra Koffini Sinyaşiki ilə əvəz etdi. Bu addım az qala bəhrəsini verəcəkdi. Sinyaşiki meydana çıxandan az sonra cərimə meydançasının xətti üzərindən qapıya zərbə vurdu. Avram topu çətinliklə kornerə çıxarmağı bacardı. 90-cı dəqiqədə yeganə qolun müəllifi Orxan Brkiçlə dueldən məğlub ayrıldı. Oyunda son təhlükəli vəziyyət bu oldu. Beləliklə, "Neftçi" 6-cı turda 2-ci məğlubiyyətlə barışdı. Özü də bakılılar elitanın debütantına uduzdular. Mənə elə gəlir ki, Mutu və köməkçiləri üçün düşünməli çox mövzu var.

Gözdən qaçmadı
* Oyundan əvvəl PFL ilə "Misli"nin birgə “Ayın qolu” layihəsinin avqust üçün qalibi Turan Manafova hədiyyələr və 1000 manat məbləğində pulun çeki verildi. Mükafatları PFL-in prezidenti Elxan Səmədov və “Misli”nin İdarə Heyətinin üzvü Salih Tüfəkçi təqdim etdi.
* Qazonun vəziyyət ürəkaçan deyildi.
* "Araz-Naxçıvan"ı dəstəkləyən "Nəqşicahan" azarkeş qrupu stadionda gözə dəymədi.
* Oyunu izləyənlər arasında "Zirə"nin baş məşqçisi Rəşad Sadıqov da var idi. “Zirə”nin növbəti turda “Neftçi” ilə qarşılaşacağını nəzərə alsaq, burda hansısa qəribəlik yoxdu.

CAVİD ƏLİYEV