Komandalar arasında xal fərqi böyük deyildi.

Tovuzlular sabit şəkildə xal hesabını artırırsa, sumqayıtlılar son üç oyunda qələbəyə həsrət qalmışdı, yəni bu oyunda 3 xal ilk növbədə onlara lazım idi. Meydan sahibləri ilk 15 dəqiqədə daha fəal təsir bağışladı. 11-ci dəqiqədə Kehatın başla vurduğu zərbə qapıdan aralı keçdi. 14-cü dəqiqədə isə Ninqanın zərbəsi tovuzlu müdafiəçiyə dəyərək qapı xəttindən çıxdı. İlk 15 dəqiqədən sonra meydanda bərabər oyun getdi. Artıq Ayxan Abbasovun yetirmələri rəqib qarşısı qarşısında təhlükəli vəziyyət yaşatmağa başladılar. 18-ci dəqiqədə Marandiçinin qapı önünə ötürdüyü topa Faiq Hacıyev dəqiq zərbə vura bilmədi. 24-cü dəqiqədə Pusinin iti bucaq altından vurduğu zərbə qapının üstündən keçdi. 34-cü dəqiqədə daha bir oxşar epizodda Marandiçinin qapı qarşısına ötürdüyü topa Veysəlin başla vurduğu zərbə Mehdinin qoruduğu qapıdan aralı keçdi. Qonaqların sol cinahında yer alan Marandiçi fəallığıyla seçilirdi.

İkinci hissəyə başlayan kimi meydan sahibləri Kamranla real qol şansı yaratdı. Lakin Əliyevin qapıya zərbəyə oxşar paralel ötürməsinə yaxınlıqda olan Elvin Bədəlov çatmadı. 51-ci dəqiqədə Pusi Mehdi Cənnətovla təkbətək dueldən məğlub ayrıldı və geri qayıdan topa son olaraq Marandiçinin vurduğu zərbə qapının üstündən keçdi. 54-cü dəqiqədə Fəridin qüvvətli zərbəsindən sonra Mehdi topu tutmağa çalışsa da, buna nail ola bilmədi. 55-ci dəqiqədə Veysəlin uzaqdan vurduğu zərbə qeyri-dəqiq alındı. 84-cü dəqiqədə Elvin cərimə meydançasının daxilində Velinovski istiqamətində yaxşı top ötürsə də, Kristian bu topa ayaq qoya bilməd. 90+5-ci dəqiqədə Mossinin ötürməsindən sonra Kamranın vurduğu zərbəni Aydın Bayramov məharətlə dəf etdi. Beləliklə, qapılara qol vurulmasa da, hər iki komandanın ifasında maraqlı oyuna şahidlik etdik.

Gözdən qaçmadı
* “Sumqayıt” azarkeşləri oyundan əvvəl Ermənistanın baş naziri Nikol Paşinyanın ünvanına “Suka Paşinyan” şüarını səsləndirdi.
* Oyunu izləyənlər arasında “Sumqayıt”ın akademiyasında işləyən veteran futbolçu Vaqif Cavadov da var idi.
* Arenanın ot örtüyü yaxşı durumda deyildi.
* “Sumqayıt” və “Turan Tovuz” fanatlarının birlikdə səsləndirdikləri şüarlar oyunu daha da maraqlı edirdi.

CAVİD ƏLİYEV