Son turlarda əvvəlki formasını bərpa etməsi ilə bağlı mesajlar verən Elmar Baxşıyevin rəhbərlik etdiyi “Qəbələ” ilə mövsümün sürprizlərindən “Səbail”in dueli bu turun maraqlı görüşlərindən idi.

Oyunda ilk qol vəziyyətini Ramalinqom yaratsa da, onun zərbəsi yaxşı alınmadı. 11-ci dəqiqədə isə Haninin ötürməsindən sonra Ayzayanın zərbəsi qapı çatına dəydi. 14-cü dəqiqədə Rauf ideal ötürmə ilə Allaşı zərbə mövqeyinə çıxarda bildi, lakin Əyyubun vurduğu top qapı dirəyinə və Səlahətə dəysə də, heç cür qapıya daxil olmadı. 20-ci dəqiqədə Pananın Ramilinqoma zərbəyə oxşar ötürməsinə 90 nömrə topa toxuna bilmədi. 36-cı dəqiqədə "qırmızı-qaralar” əks-hücumda rəqibi yaxalamağı bacardılar. Hani Auşaeriyanı zərbə mövqeyinə çıxardı. Ancaq Bilelin qapıya zərbəsinə son anda Yusif Nəbiyev ayaq qoya bildi. İlk hissədə o qədər də baxımlı mübarizə izləmədik. Ancaq üstünlük meydan sahiblərində idi.

2-ci hissəyə də meydan sahibləri istəkli başladı. 50-ci dəqiqədə Hani üç oyunçunun arasında çıxaraq Xalaylaya zərbə vurmaq imkanı yaratdı. Lakin Osamanın vurduğu top qapıdan aralı keçdi. 58-ci dəqiqədə küncdən ötürülən topu Afriko baş zərbəsi ilə tamamladı. Səlahət risk etməyərək topu çölə çıxardı. Bəlkə də oyun ərzindəki ən real qol vəziyyəti 78-dəqiqəyə təsadüf etdi. Belə ki, Bilelin ötürməsindən sonra Allaş boş qapıya topu göndərə bilmədi. 81-ci dəqiqədə Bahadır Ağabalanın ötürməsindən sonra topu qapının üstündən vurdu. Sonluq qarşılıqlı hücumlar şəraitində keçirdi. 90+5-ci dəqiqədə Yusifin ötürməsini bir qədər əvvəl meydana çıxan Rüfət qolla tamamladı və komandasına üç xal qazandırdı. Beləliklə, Şahin Diniyevin “dənizçilər”inin sürprizləri təəccübləndirməyə davam edir. Elmar Baxşıyevin komandası isə bu oyunda qaçırdığı çoxlu qol imkanının acısını çəkdi. Futbolda belə bir deyim var: “Vurmayana vurarlar”. Bax, qonaqlar bu prinsipi doğrultdu.

Gözdən qaçmadı
* “Səbail” azarkeşləri 14-cü dəqiqədə ötən ay dünyasını dəyişmiş Şəhriyar Rəhimovun xatirəsinə hörmət əlaməti kimi “Şəhriyar, sən bizim qəlbimizdəsən” şüarını səsləndirdi.
* 44-cü dəqiqədə hər iki komandanın azarkeşləri “Şəhidlər ölməz, vətən bölünməz” şüarını səsləndirdi.
* Oyunun gedişində “Qəbələ”nin futbolçuları epizodları dəyərləndirmədiyinə görə klubda çalışanlardan biri onları təhqir edirdi.
* Oyundan sonra bir neçə “Qəbələ” azarkeşi qapıçı Rəşad Əzizlinin ünvanına təqdir söylədi.

CAVİD ƏLİYEV