Hər iki komanda son turlarda ciddi böhran yaşadığından qələbə onlara hava və su kimi vacib idi.

"Football-plus.az" xəbər verir ki, hakimin start fitindən sonra tərəflər ehtiyatlı oyuna üstünlük verdi. Bunun nəticəsidi ki, ilk 15 dəqiqə kəşfiyyat xarakteri daşıdı. Oyunda ilk təhlükə "kimyaçılar"dan gəldi. Amma Rövlan iki dəfə həmlə etsə də, qapıçı yerindəydi. Qonaqlar buna Şuaybunun zərbəsiylə cavab verdi. Rövlanın növbəti cəhdi də uğursuz oldu. Sorqanın zərbəsi isə bərbad alındı. İlk yarı qolsuz, amma "Sumqayıt"ın ərazi üstünlüyü şətaitində keçdi. Fasilədən sonra da “kimyaçılar” fəal idi. Rövlanın cərimə zərbəsi qapının üstündən keçdi. Mantekanın cəhdi də eyni cür alındı. Kamranın zərbəsini adaşı tutdu. Nəhayət, gözlənilən qol 62-ci dəqiqədə realaşdı. Kamranın qapı önünə asmasına yüksələn Kehat topu tora saldı. Hesab açılandan sonra "Kəpəz" irəli atıldı. Elçinin baş zərbəsi qapının üstündən keçdi. Meydana sonradan çıxan Ninqanın sevinməsinə Kamran imkan vermədi. Xvalkonun zərbəsi bərbad alındı. Matça əlavə olunan dəqiqələrdə "Kəpəz"in kapitanı az qala avtoqol müəllifi olacaqdı. Rövlanın son saniyələrdəki qüvvətli zərbəsinə Kamran əla reaksiya ilə cavab verdi. Hakimin final fiti "Sumqayıt"ın 5 tur aradan sonra növbəti qələbəsini, "sarı-göylər"in isə mövsümdə 6-cı məğlubiyyətini rəsmləşdirdi.

Gözdən qaçmadı
* Oyundan öncə "Sumqayıt"da 100-cü matçını keçirən kapitan Vüqar Mustafayevə üzərində 100 yazılan futbolka hədiyyə olundu. Onu klub prezidenti Riad Rəfiyevlə Müşahidə Şurasının sədri Abdulla Məmmədov təbrik etdi.
* 44-cü dəqiqədə sumqayıtlı fanatlar "Ölməz general Polad Həşimov" şüarını səsləndirdi.
* 74-cü dəqiqədə Səbuhi Abdullazadə meydana çıxarkən azarkeşlər onun adını səsləndirməklə dəstək verdilər.
* 76-cı dəqiqədə Rövlanla Martins arasında qarşıdurma yarandı. Tezliklə hər iki tərəfin futbolçuları araya girərək münaqişənin böyüməsinə imkan vermədi. Bu zaman yerli azarkeşlər "burası Sumqayıt, burdan çıxış yox!" şüarını səsləndirdilər.
* Oyundan sonra "Sumqayıt" qələbəsini azarkeşlərlə qeyd etdi. "Kəpəz" futbolçuları isə Sumqayıta təşrif buyuran gəncəli fanatlarının etirazını, tənqidini təmkinlə dinlədikdən sonra onları alqışladılar.
* "Kapital Bank Arena" 1326 yerlik olsa da, protokolda azarkeş sayı 1350 göstərilmişdi.

ABDULLA İSMAYILOĞLU