Bu görüşdə qələbə qazanmaq "Sabah" üçün daha vacib idi. "Bayquşlar" 8 oyunluq qələbəsizlik seriyasına son qoymaq, azarkeşləri ötən mövsüm dolub-daşan tribunalara qaytarmaq, itirilən xalların bərpası uğrunda mübarizə aparmalıydı.

"Sumqayıt" isə nisbətən yaxşı durumu qoruyub saxlamaq və xal ehtiyatını artırmaq məqsədiylə meydana çıxmışdı. Komandaların oktyabrın 25-də yenidən qarşılaşacağını nəzərə alsaq, matç həm də özünəməxsus kəşfiyyat xarakteri daşıyırdı.

Azsaylı azarkeşlərin izlədiyi oyun "Sabah"ın təzyiqiylə başladı. İlk təhlükəli vəziyyəti meydan sahibləri yaratsa da, Alekseyin tələskinliyi epizodu puç etdi. "Kimyaçılar" da Masazıra əliboş gəlməmişdi. Qonaqlar tezliklə tempə uyğunlaşıb, rəqibə qarşılıq verdi. Bu ərəfədə "bayquşlar"ın ünvansız ötürmələri "Sumqayıt"a künc zərbəsi qazandırdı. Nəticədə Samir Abasovun kollektivi hesabı açmaq fürsətindən faydalandı. İsa Rövlanın oyuna daxil etdiyi topu baş zərbəsiylə "çərçivə"dən keçirdi - 1:0. İndi bakılılardan ciddi təzyiq gözlənilirdi ki, belə olmadı. Növbəti qol epizodunu da qonaqlar yaratdı. Yusif irəli atılıb topu vaxtında qucaqlamasa, Ninqa fərqi artıra bilərdi. Murad Musayevin komandası ilk hissədə, demək olar ki, heçnə ilə yadda qalmadı. Oyun "kimyaçılar"ın üstünlüyü şəraitində keçir, gah Yusif, gah da Con, Amin, Namik və başqaları rəqibi zərərsizləşdirməli olurdu. "Sabah"ın çətin sınaq qarşısında olduğu aşkar idi. Hər halda, cəzalı Letiç, zədəli Till, Marqarita, Belfodil və Anatolinin yoxluğu hiss olunurdu. Beləliklə, ilk dəqiqələri istisna olmaqla sönük keçən ilk hissə başa çatdı.

Görüşün ikinci yarısının dramatik keçəcəyi bəlliydi. "Sabah" hesabı bərabərləşdirməli, "Sumqayıt" isə üstünlüyü qorumaq üçün əlindən gələni etməliydi. Ancaq qonaqlar bunu bacarmadı. Meydan sahiblərinin təzyiqi cəmi 9 dəqiqə sonra bəhrə verdi. Daha dəqiq desək, İrasabal Tellurun çətin ötürməylə meydandan çıxmağa qoymadığı topu başla tora qovuşdurdu - 1:1. Maraqlı təsadüfdü ki, bunu həm dəqiqə, həm də epizod baxımından "bayquşlar"ın intiqamı saymaq mümkündü. İrəliləyən dəqiqələrdə hücum cəhdləri bir-birini izlədi. Təhlükəli anlarda Kehatın zərbəsini Yusif dəf etdisə, Aleksey qapını düzgün nişan ala bilmədi. 81-ci dəqiqədə “Sabah” hesabda irəli çıxdı. Parris topu Volkova, o isə Namikə çatdırdı. Ələskərov çətinliklə topu tora göndərdi. Bundan sonra "kimyaçılar" dəfələrlə fərqlənə bilərdi. Lakin "bayquşlar"ın sıx müdafiə olunması və Yusifin cəldiyi buna imkan vermədi. Qonaqların Kamranları hərəyə bir dəfə bəxtini sınasa da, rəqib qolkiper yerində idi. Matçda son nöqtəni Masazır təmsilçisi qoydu. Alekseyin yerinə yetirdiyi künc zərbəsini Volkov qola çevirdi. O, sanki havadan asılı qalaraq başla topu "çərçivə"dən keçirdi - 3:1. Bu artıq Murad Musayev üçün çoxdan gözlənilən qələbə idi. Onun "özümüzə gəlmək üçün cəmi bir qələbə lazımdı" ifadəsinin reallığı nə dərəcədə əks etdirdiyini elə sabah görəcəyik. Samir Abasova gəlincə, onun komandası mövsümün əvvəlindəki nisbi uğurdan sonra tədricən turnir cədvəlinin sonlarına yuvarlanmaqdadı.

Gözdən qaçmadı
* Matçdan əvvəl "Sabah" formasıyla 100-cü oyununa çıxan Amin Seydiyevə 100 nömrəli forma verildi. Formanı futbolçuya idman direktoru İqor Ponomaryov təqdim etdi.
* "Soldati di Sabah" və "Kimyaçılar" fanklubları tribunalara gəlmişdi. Onlar 44-cü dəqiqədə şəhidləri yad etməyi unutmadı.
* Baş məşqçilər Murad Musayev və Samir Abasov sarı vərəqə aldı. "Sumqayıt"ın çalışdırıcısı qərara "danışmaq olmaz?!" deyə qışqıraraq etiraz etdi. Həmçinin "Sabah"ın meneceri İlqar İsrafilov "qırmızı"yla meydandan qovuldu.

KƏNAN BAHADIR