Tura Bakı derbisi ilə yekun vurulurdu. Meydanda iki yorğun komandanın ağır sınağını izləyəcəkdik.

"Sabah" Konfrans Liqasının 3-cü təsnifat mərhələsində "Partizan"a məğlub olmuşdusa, "Neftçi"də "Beşiktaş"la matçdan üzgün qayıtmışdı. Digər tərəfdən, "bayquşlar" turnir cədvəlində 3 xalla 5-ci (2-ci turda "Sumqayıt"la matç təxirə salınıb - red.), "ağ-qaralar" isə 1 xalla 8-ci yerdə qərarlaşmışdı. Qarşılaşmada favorit yox idi. Hər halda, hər iki komandanın durumu bərabər qiymələndirilirdi.

"Football-plus.az" xəbər verir ki, FİFA referisi Əliyar Ağayev turun mərkəzi matçının start fitini səsləndirdi. "Neftçi" topu oyuna daxil etdi. "Sabah" oyuna daha dinamik başladı. İlk real qol vəziyyətini də ev sahibləri yaratdı. Marqarita Sayeflə Caberi ustalıqla aldadıb "çərçivəni" nişan alsa da, Rza yaxşı oynadı. Koffinin təhlükəni sovuşdurmaq cəhdi isə uğursuz alındı. Ev sahibləri topu yenidən əldə etdi. İkinci cəhddə Namiq baş rolda oldu. Lakin o, topu qapıdan uzağa vurduğundan "bayquşlar"ın hücum cəhdi “yandı”. "Ağ-qaralar" irəliləyən dəqiqələri müdafiədə keçirməyə üstünlük verirdi. Görünür, Mutu ilk hissədə komandasından, sadəcə, əks hücumlardan yararlanmağı istəmişdi. Bu ərəfədə Emin Mahmudov əla ötürmə ilə topu Sayefə göndərdi. Amerikalı yarımmüdafiəçi təkbaşına qol vurmaqda qərarlı idi. O, qapı önündəki Olanareyə və ya Lebona ötürmə verməkdən imtina etdi. Nəticədə qapıya uzaqdan zərbəsi uğursuz alındı. Ümumiyyətlə, “Sabah” rəqibinə öz oyununu göstərməyə imkan vermirdi. “Neftçi” əsasən Marqaritanın qoruduğu sağ cinahı hədəf almışdı. Onun buraxdığı boşluqlar qapıya cığır açmağı asanlaşdırırdı. Lakin “bayquşlar”ın digər müdafiəçiləri ustalıqla qonaqları durdururdu. İlk hissədə Masazır təmsilçisinin üstünlüyünü izlədik. Ev sahiblərinin uzun müddət davam edən təzyiqi isə 43-cü dəqiqədə bəhrəsini verdi. Marqarita Sayefi aldadaraq topu Letiçə göndərdi. Rza bu anda təcrübəli müdafiəçinin ötürmə edəcəyini gözlədiyindən asanlıqla təslim oldu. Nəticədə bosniyalı dəqiq zərbə ilə hesabı açdı. Beləliklə, “Sabah” birinci hissəni öndə qapadı.

İkinci yarıda “Neftçi” “yuxudan ayılmışdı”. Bu dəfə təzyiq görən tərəf “bayquşlar” idi. “Ağ-qaralar” ardıcıl təhlükəli hücumlar qururduı. Belə anların birində Koffi uğurlu ötürmə ilə topu qapı önünə yolladı. Şinyaşiki “Sabah” futbolçularının çoxluğundan zərbəyə fürsət tapa bilməsə də, Nərimanı vaxtında “gördü”. Hacıyevin ötürmə vermək istəyi isə avtoqolla nəticələndi. İrasabal uğursuz toxunuşla topu öz qapısından keçirdi – 1:1. Artıq “bayquşlar”ın istəkli oyun tərzi ilk hissədə qalmışdı. Bu qonaqlara daha rahat oynamaq üçün imkan yaradırdı. Ev sahibləri matçın 75-ci dəqiqəsindən sonra əvvəlki formalarına dönə bildilər. Lakin hər iki komandanın qol epizodları xoşbəxt sonluqla bitmədi. “Neftçi”dən Caber və Sayefin, “Sabah”dan isə Marqarita, Tellur və Anatolinin zərbələrini qapıçılar zərərsizləşdirdi. Beləliklə, turun bağlanış matçı “sülh”lə sona çatdı.