Cari mövsümdə “Sumqayıt” “Sabah”ın qapazaltısıdı desək, yanılmarıq.

“Tələbələr” 2022/23 “futbol ili”ndə “kimyaçılar”ın qapısına 17 dəfə yol tapıb ki, həmin qollardan dördü dünənki matça təsadüf etdi. “Gənclik şəhəri”nin təmsilçisi isə bir dəfə də Murad Musayevin komandasının qapısına yol tapa bilməyib. Bu oyun ərəfəsində çoxları “Sabah”ın “Beşiktaş”la sınağın ardından “Sumqayıt”ın qarşısına yorğun çıxacağını düşünürdü. Lakin meydanda tam əksi yaşandı. Sanki sumqayıtlılar son bir həftədə üç oyun keçirmiş, qonaqlar isə 10 günlük tətildən dönmüşdülər. “Sabah” meydanda istədiyini etdiyi halda Samir Abasovun yetirmələri “sürünürdülər”.

“Sabah”ın futbolçuları bir qədər də dəqiq, İlnur son 20 dəqiqədə xilaskar olmasaydı, bəlkə də 90 dəqiqənin tamamında tabloda ikirəqəmli hesab olardı. Artıq ilk yarıda “tələbələr” matçın taleyini həll etdi. Birinci hissənin əsas vaxtının başa çatmasına 11 dəqiqə qalmış İrasabal komandasını hesabda önə keçirdi. Müdafiəçi “Sumqayıt”ın qolkiperinin çıxışda yol verdiyi səhvi bağışlamadı. 10 dəqiqə sonra qonaqlar oxşar kombinasiya sayəsində fərqi iki topa çatdırdılar. Bu dəfə Volkov fərqləndi. Əsas vaxtda əlavə olunan 1-ci dəqiqədə isə Volkovun ötürməsindən sonra Da Silva “kimyaçılar”ı meydanın mərkəzinə dəvət etdi.

Fasilədən sonra da stadiona gələnlər bir aktyorun tamaşasını izləməyə məcbur idi. Meydan sahibləri ard-arda 3 ötürmə edə bilmədiyi halda “bayquşlar” şou göstərirdilər. Matçda son nöqtəni isə əvəzetmədən meydana çıxan Sebalyos qoydu. Mövsümdə 20-ci dəfə uduzan, 7-ci dəfə böyükhesablı məğlubiyyətlə barışan “Sumqayıt”ın aqibəti necə olacaq? Artıq komandanın elitada yerini qoruyub-qorumayacağı ilə bağlı düşünməyin vaxtıdı. “Kimyaçılar”ın son iki turda səfərdə “Qarabağ”, evdə “Zirə” ilə qarşılaşacağını xatırladaq. Samir Abasovun halına ağlayan lazımdı!

Gözdən qaçmadı
* Kaşuk əvəzlənərək meydanı tərk edəndə “Sabah”ın azarkeşləri ilə yanaşı, sumqayıtlı futbolsevərlər də ukraynalını alqışladı.
* Fasilədə əvəzlənən Vüsal İsgndərli 2-ci yarını meydana yaxın yerdən, daha dəqiq desək, paltardəyişmə otağına gedən yoldan izləmək istəyirdi ki, bu da baş hakimin gözündən yayınmadı. Cavid Cəlilov oyunun dayanmasından istifadə edərək Vüsaldan olduğu yerdən getməyi tələb etdi.

RƏŞAD