Bir az soyuq olsa da, əslində futbol oynamaq üçün əla hava var idi. Lakin stadionda protokolda göstərilən qədər azarkeş yox idi.

Maksimum 2000 nəfər qarşılaşmanı stadiondan izləyirdi. Komandalar meydana fərqli məqsədlər üçün çıxmışdı. “Sabah” qələbə qazanacağı təqdirdə tarixində ilk dəfə avrokuboklara vəsiqəni təmin edəcəkdi. “Qəbələ” qalib gəlsəydi, “Zirə”ni keçərək 4-cü pilləyə yüksələcəkdi.

Qarşılaşma olduqca sürətli başladı. Hər iki komanda açıq futbol sərgiləməyi xoşlayır. Bu üzdən də meydanda maraqlı mübarizə izləyirdik. Hesabı isə ev sahibi açdı. Künc zərbəsindən ötürülən topu Oçiqava qapıya göndərmək istəyərkən İlkin müdaxilə etdi. Səlahəti çaşdıran “dəri kürə” tora daxil oldu. Bu qol “qırmızı-qaralar”ı qəflət yuxusundan ayıltdı. Elmar Baxşıyevin komandası dərhal hücuma atılaraq hesabı bərabərləşdirməyə çalışdı. Ardıcıl iki epizodda Allaş qola yaxın olsa da, Yusif İmanov onun sevinməsinə imkan vermədi. 21-ci dəqiqədə isə “radarlar” istəyinə çatdı. Komandanın cokeri Ülvi möhtəşəm zərbə ilə hesabı bərabərləşdirdi. 7 dəqiqə sonra isə qonaqlar yenə sevindi. Abu Akal komandasını önə keçirdi. Qoldan sonra “Sabah” toparlanmağa başladı. Mikels iki epizodda Səlahəti məyus edə bilmədi.

İkinci hissənin ilk dəqiqələri də “Qəbələ”nin üstünlüyü ilə keçdi. Lakin tədricən “qırmızı-qaralar” yorulmağa başladı. Murad Musayev bunu görərək dəyişikliklərə əl atdı. Hücumda daha fəal olan masazırlıların heyətində Mikels iki yüzfaizlik imkanı dəyərləndirə bilmədi. “Qəbələ” isə matçın sonlarında təslim oldu. Əvvəlcə Mikels 87-ci dəqiqədə hesabı bərabərləşdirdi. Vingerin akrobatik zərbəsi qarışıqlıqda heç kimə toxunmayaraq tora daxil oldu. 5-ci uzatma dəqiqəsində isə Kaşuk “Sabah”a 3 xal qazandırdı. Cərimə zərbəsindən ötürmə zamanı “Qəbələ”nin futbolçuları səhvə yol verdi. Səlahətin topu tuta bilmədiyi epizodda mьdafiəçilər nə qədər çalışsa da, yekunda Kaşuk “dəri kürə”ni tora qovuşduraraq “bayquşlar”ın tarixində ilk dəfə avrokuboklara vəsiqə qazanmasını təmin etdi. Beləliklə, gərgin, dramatik keçən qarşılaşmada “Sabah” geridönüş edərək 3 xal qazandı.

Gözdən qaçmadı

* Renato “Qəbələ” karyerasında ilk dəfə komandanı kapitan kimi meydana çıxardı.
* “Sabah” hesab açarkən Mikels maykasının ipini açmaq üçün hakimdən icazə aldı. Ona bu işdə məşqçilər heyəti kömək etdi.
* “Qəbələ”nin futbolçuları – Əyyub Allaş və İsnik Alimi oruc açarkən Murad Musayev buna etiraz etdi. Daha sonra Cavid Cəlilov yenidən qonaqların bütün futbolçularına icazə verdi. Rusiyalı mütəxəssis daha da qəzəbləndi.
* Qarşılaşmadan sonra keçirilən mətbuat konfransında yalnız üç jurnalist var idi. Murad Musayev buna təəccьblənərək “başqaları hardadı”, - deyə soruşdu.

İLKİN SULTANLI