Braziliya çempionatında keçirilən 24-cü turun oyunlarından sonra liderlər qrupundakı vəziyyət əvvəlki kimi qaldı. Ona görə ki, həm lider, həm də əsas izləyicisi məğlub oldu.

"Football-plus.az" xəbər verir ki, əlbəttə, “Botafoqo”nun ardıcıl üçüncü dəfə uduzması turun daha çox yadda qalan faktıdı. Lider 22-ci turda “Flamenqo” ilə derbidən (1:2), 23-cü turda isə “Atletiko Mineyro”ya qarşı matçdan (0:1) məğlub ayrılmışdı. Bruno Lajenin çalışdırdığı komanda bu dəfə “Korintians” qarşısında aciz qaldı. San Pauludakı oyunun rio de janeyrolular üçün asan keçməyəcəyi aydın idi: Vanderley Luşemburqunun komandası bu mövsüm A seriyasında evdə keçirdiyi ilk 10 oyunun yalnız birində uduzmuşdu. Liderin aqibəti ilk hissənin ortalarında böyük ölçüdə müəyyənləşdi: Marçal 23-cü dəqiqədə rəqibinə qarşı kobudluğa görə qonaqları meydanda azlıqda qoydu. Hakim əvvəlcə ona sarı vərəqə göstərsə də, VAR-ın müdaxiləsi ilə epizodu təkrar izləyəndən sonra cinah müdafiəçisini “qırmızı” ilə cəzalandırdı. Buna qədər də oyun planında üstün olan ev sahibləri qalan vaxtda üstünlüyünü daha da artırdı. “Botafoqo”nun qapıçısı Lukas Perri ümumilikdə 4 seyv etdi. Amma 59-cu dəqiqədə müdafiəçi Gilin zərbəsinə reaksiya verə bilmədi. Nəticədə bu mövsüm çox da güclü görünməyən “Korintians” qələbə qazandı. “Botafoqo” isə ardıcıl üçüncü dəfə məğlub oldu. Lakin bu uğursuzluq da liderin mövqeyinə təsir etmədi.

“Ağ-qaralar”ın bəxtindən əsas izləyicisi də uduzdu. Bu isə o deməkdi ki, “Palmeyras”la 7 xallıq fərq qorundu. Son çempionun işi daha çətin idi. Abel Ferreyranın komandası səfərdə əsas izəyicisi “Qremio”ya qarşı oynadı. Portu aleqrililər vacib oyundan əvvəl çempiondan 4 xal geri qalırdılar. Deməli, qələbə onların liderlər qrupundakı yerini bir qədər möhkəmləndirəcəkdi. İlk dəqiqələr qonaqlar üçün çox çətin keçdi: artıq 9-cu dəqiqədə Joao Pedro hesabı açdı. Sağ cinah müdafiəçisi buna Luis Suaresin ötürməsi ilə nail oldu. A seriyasında keçirdiyi 20-ci oyunda 6-cı dəfə assistentlik edən 36 yaşlı uruqvaylı hücumçunun bu liqada 7 qol vurduğunu da bildirək. “Palmeyras” qapısında erkən qol görsə də, çətin səfərdə rəqibindən üstün oyun sərgilədi. Qapıya kifayət qədər həmlələr etdi. Amma qonaq futbolçular topa böyük ölçüdə nəzarət etmələrinə baxmayaraq, dəqiq zərbələr üzrə yalnız 3:2 hesablı üstünlüyə nail oldular. Hər üç zərbəni isə qapıçı Qabriel Qrando dəf etdi. Beləliklə, çempion liderin uduzmasından yararlana bilmədi və 2-ci yerdə qaldı. Renato Qauşunun komandası isə vacib qələbə ilə azarkeşlərinin çempionluq ümidlərini bir qədər də artırdı.

Tura hərəyə 39 xalla başlayan komandalar fərqli nəticələr göstərdilər. Sentyabrın 2-də “Botafoqo”nu derbidə məğlub edən “Flamenqo” heç cür sabit çıxış edə bilmir. Xorxe Sampaolinin çalışdırdığı komanda vacib qələbədən sonra keçirdiyi iki oyunda yalnız bir xal qazanıb. Rio de janeyroluar hesabat turunun səfər matçında “Qoyas” ilə qolsuz “sülh”ə razılaşdılar. Növbəti xal itkisi “Fla”nı 4-cü yerdən 7-yə saldı.

“Braqantino” isə qələbə qazandı. Autsayder “Amerika Mineyro” üzərində 2:0 hesabıyla üstünlüyə nail olan braqançalılar 4-cü yerə yüksəldilər.
Tura 5-ci yerdə başlayan “Fluminense” də hesabına maksimum xal yazmağı bacardı. Fernando Dinizin komandası evdə “Kruzeyro”ya minimal hesabla qalib gəldi. Bu mövsüm çempionatın 13-cü ev oyununda da uduzmayan (10 qələbə, 3 heç-heçə) rio de janeyroluların bu göstəriciyə əsasən liqanın lideri olduqlarını xüsusi vurğulayaq.

24-cü tur
Korintians - Botafoqo RJ 1:0
Gil, 59.
Qremio - Palmeyras 1:0
Joao Pedro, 9.
Qoyas - Flamenqo 0:0
Amerika Mineyro - Braqantino 0:2
Jadsom Silva, 36. Lukas Evangelista, 90+10.
Fluminense - Kruzeyro 1:0
L.Fernandes, 67.
Atletiko Paranaense - İnternasyonal 2:1
Erik, 24. Aleks Santana, 90 – De Pena, 36.
Bayya - Santos 1:2
Kandido, 59 – Markos Leonardo, 73. Furç, 90+4.
San Paulu - Fortaleza 1:2
X.Rodriges, 79 – Jose Velison, 16. Lusero, 53-p.
Vasku da Qama – Koritiba 5:1
Ze Qabriel, 8. Rossi, 34. Veqetti, 50; 63. Qabriel Pek, 81 – S.Qomes, 80.
Atletiko Mineyro – Kuyaba 1:0
Paulinyo, 42.
15-ci turdan təxirə salınan oyun
Amerika Mineyro - Vasku da Qama 0:1
Jair, 90+1.
1. Botafoqo RJ 24 16 3 5 39-15 51
2. Palmeyras 24 12 8 4 38-18 44
3. Qremio 24 13 4 7 39-31 43
4. Braqantino 24 11 9 4 33-21 42
5. Fluminense 24 12 5 7 34-26 41
6. Atletiko Paranaense 24 11 7 6 37-27 40
7. Flamenqo 24 11 7 6 36-30 40
8. Fortaleza 24 11 5 8 29-23 38
9. Atletiko Mineyro 24 10 7 7 27-19 37
10. Korintians 24 7 9 8 28-29 30
11. Kuyaba 24 8 5 11 23-30 29
12. Kruzeyro 24 7 8 9 23-21 29
13. İnternasyonal 24 7 8 9 20-27 29
14. San Paulu 23 7 7 9 27-25 28
15. Vasku da Qama 24 7 5 12 26-34 26
16. Qoyas 24 6 8 10 20-30 26
17. Bayya 24 6 7 11 28-33 25
18. Santos 24 6 6 12 23-40 24
19. Amerika Mineyro 24 4 5 15 26-50 17
20. Koritiba 23 3 5 15 24-51 14
Bombardirlər: Tikinyo Soares (Botafoqo RJ) - 13, Vitor Roke (Atletiko Paranaense) - 11, Paulinyo (Atletiko Mineyro) - 10, Deyverson (Kuyaba), Markos Leonardo (Santos) - 9.