Braziliya çempionatının 17-ci turunda qeydə alınan nəticələrdən sonra liderlər qrupundakı vəziyyət bir qədər dəyişdi. Buna liderlə əsas izləyicisinin fərqli nəticələr göstərməsi şərait yaratdı.

"Football-plus.az" xəbər verir ki, əvvəlki turun “Santos”la səfər oyununda (2:2) qələbə yürüşü dayandırılan “Botafoqo” cari mövsümdə heç-heçəyə ilk dəfə razılaşmışdı. Ardıcıl 6 qələbədən sonra büdrəyən liderin “Koritiba” ilə ev oyununda gözlənilən nəticə qeydə alındı. Rio de janeyrolular autsayderlər qrupundakı rəqibini 4:1 hesabıyla məğlub etdilər. Qələbədə iki futbolçu daha çox pay sahibi oldu: Qustavo Sauer iki qol və bir məhsuldar ötürmə, Tikinyo Soares isə iki qol ilə fərqləndi. Sonuncu bu mövsüm qollarının sayını 13-ə çatdırmaqla bombardirlər yarışındakı liderliyini bir qədər də gücləndirdi. “Botafoqo”nun Bruno Lajenin rəhbərliyi altında keçirdiyi 4-cü matçda 3-cü qələbəsni qazandığını və bir oyunda rəqibi ilə “sülh bağladığını” da qeyd edək.

Liderin cədvəldəki yeri bir qədər də gücləndi. Tura “Botafoqo”nun əsas izləyicisi kimi başlayan “Qremio” hesabına bir xal yaza bildi. Renato Qauşunun komandası “Qoyas”a qarşı səfər oyununda məğlubiyyətdən son dəqiqələrdə qurtula bildi. 1:1 hesablı heç-heçə portu aleqrililərə 2-ci yeri itirmək və iki pillə geriləmək bahasına başa gəldi. Amma onların ehtiyatda bir təxirə salınan oyununun olduğunu da bildirək.

Tura hərəyə 28 xalla başlayan hər iki komanda hesabına maksimum xal yazdı. “Atletiko Mineyro”nun qonağı olan “Flamenqo” ilk hissəni məğlub başa vursa da, son dəqiqələrdə iki qolla əzmkar qələbə qazandı. Ardıcıl 3 dəfə heç-heçə edəndən sonra xalını 31-ə çatdıran Xorxe Sampaolinin komandası daha çox qələbəyə malik olduğu üçün 2-ci yerə yüksəldi.

Əvvəlki turda 5 oyunluq qələbəsiz seriyaya son qoyan “Palmeyras” azarkeşlərinə yenə qələbə bəxş etdi. Son çempion səfərdə “Amerika Mineyro”nu 4:1 hesabıyla məğlub etdi. Abel Ferreyranın komandası bu nəticə ilə həm liderlə 12 xallıq fərqi qorudu, həm də 4-cü yerdən 3-ə yüksəldi.

17-ci tur
Botafoqo RJ - Koritiba 4:1
Qustavo Sauer, 3; 45+3. Tikinyo Soares, 36; 51 – Bruno Qomes, 9.
Qoyas - Qremio 1:1
Mateus Babi, 77 – Andre Enrike, 90+3.
Atletiko Mineyro - Flamenqo 1:2
Paulinyo, 33 – De Arraskaeta, 80. Uesli, 87.
Amerika Mineyro - Palmeyras 1:4
Nikolas, 38 – Murilo, 18. Roni, 26; 53. Artur, 53.
Fluminense - Santos 1:0
Kano, 77.
İnternasyonal - Kuyaba 1:2
Bustos, 16 – Ranyele, 44. Deyverson, 88.
Atletiko Paranaense - Kruzeyro 3:3
Madson, 41. Pablo, 78. Fernandinyo, 87-p. – Artur Qomes, 8; 37. Uesli, 82.
Korintians - Vasku da Qama 3:1
Meyson, 19. Yuri Alberto, 61. Rocer Gedeş, 73-p. – Qabriel Peç, 70.
San Paulu - Bayya 0:0
Fortaleza - Braqantino 0:3
Luan Kandido, 23. Bruninyo, 69. Borbas, 90+2.

1. Botafoqo RJ 17 14 1 2 32-10 43
2. Flamenqo 17 9 4 4 30-20 31
3. Palmeyras 17 8 7 2 32-15 31
4. Qremio 16 9 3 4 26-21 30
5. Fluminense 17 8 4 5 22-16 28
6. Braqantino 17 7 7 3 25-16 28
7. Atletiko Paranaense 17 8 3 6 25-21 27
8. San Paulu 17 7 5 5 23-16 26
9. Kuyaba 17 7 4 6 18-19 25
10. Kruzeyro 17 6 5 6 19-15 23
11. Fortaleza 17 6 5 6 17-18 23
12. İnternasyonal 17 6 5 6 14-18 23
13. Atletiko Mineyro 17 5 6 6 19-17 21
14. Korintians 16 5 4 7 15-18 19
15. Santos 17 4 5 8 18-26 17
16. Qoyas 17 4 4 9 16-27 16
17. Bayya 17 3 6 8 15-23 15
18. Koritiba 17 3 5 9 17-32 14
19. Amerika Mineyro 16 2 4 10 18-37 10
20. Vasku da Qama 16 2 3 11 12-28 9
Bombardirlər: Tikinyo Soares (Botafoqo RJ) - 13, Vitor Roke (Atletiko Paranaense) - 8, Deyverson (Kuyaba), Rocer Gedeş (Korintians) - 7, Kalyeri (San Paulu), Eduardo Saşa (Braqantino), Markos Leonardo (Santos), Halk (Atletiko Mineyro) – 6.