Braziliya çempionatının 16-cı turunda qeydə alınan nəticələrdən sonra liderlər qrupundakı vəziyyət bir qədər dəyişdi. Liderlə əsas izləyicisi hesabına bir xal yazdı.

"Football-plus.az" xəbər verir ki, nəhayət, “Botafoqo”nun qələbə yürüşünü dayandıran tapıldı. Ardıcıl 6 qələbə qazanan lider Santosda büdrədi. Eyniadlı komanda bu mövsüm çox da yaxşı təsir bağışlamasa da, rio de janeyrolulardan xal almağı bacardı. Amma əslində fikir belə ifadə olunmalıdı: dahi Pelenin keçmiş komandası qələbəni son anda əldən verdi. Bəli, ev sahibləri Markos Leonardonun iki qolu ilə 81-ci dəqiqədə əhəmiyyətli üstünlük əldə etmişdi. Lakin “Botafoqo” qalan vaxtda əzmkarlıq nümayiş etdirdi. Əvvəlcə fərqi minimuma endirən Tikinyo Soares bu mövsüm 11-ci qolunu vurmaqla bombardirlərin yarışındakı liderliyini bir qədər də gücləndirdi. Hücumlarını davam etdirən lider çox keçmədən bunun bəhrəsini də gördü. Adrielsonun qolu komandasına xal qazandırdı. Bu, “Botafoqo”nun cari mövsümdə heç-heçəyə ilk dəfə razılaşdığı oyun oldu. Komandanın Bruno Lajenin rəhbərliyi altında ardıcıl iki qələbədən sonra rəqibi ilə “sülh bağlaması” mövqeyini heç də zəiflətmədi. Liderin cədvəldəki yeri əvvəlki kimi güclüdü.

Tura “Botafoqo”nun əsas izləyicisi kimi başlayan “Flamenqo” da hesabına bir xal yaza bildi. Xorxe Sampaolinin komandası gözlənilmədən “Amerika Mineyro” ilə ev oyununda heç-heçəyə razılaşdı. Rio de janeyrolular öz meydanında autsayderə uduza da bilərdilər. 84-cü dəqiqədə qonaqlar hesabı açdılar. “Flamenqo”nu məğlubiyyətdən əsas vaxta əlavə olunan 5-ci dəqiqədə 19 yaşlı yarımmüdafiəçi Viktor Uqo xilas etdi. Beləliklə, “qırmızı-qaralar” ardıcıl 3-cü dəfə heç-heçə etdilər. Növbəti 2 xal itkisi Sampaolinin komandasına 2-ci yeri itirmək və bir pillə geriləmək bahasına başa gəldi.

Bu pilləyə “Qremio” yüksəldi. Renato Qauşunun komandası evdə Luis Felipe Skolarının çalışdırdığı “Atletiko Mineyro”ya minimal hesabla üstün gəldi. Bir oyunu təxirə salınan “Qremio” hazırda liderdən 11 xal geri qalır.

Axır ki, “Palmeyras” 5 oyunluq qələbəsiz seriyaya son qoydu. Son çempion evdə “Fortaleza”nı 3:1 hesabıyla məğlub etdi. Abel Ferreyranın komandası bu nəticə ilə həm liderlə 14 xallıq fərqi 12-yə endirdi, həm də 6-cı yerdən 5-ə yüksəldi.

Tura hərəyə 25 xalla 4-5-ci yerləri bölüşməklə başlayan “San Paulu” ilə “Fluminense” məğlubiyyətdən qaça bilmədilər. Bu komandalar uyğun olaraq 6-cı və 7-ci pillələrə düşdülər.

16-cı tur
Santos - Botafoqo RJ 2:2
Markos Leonardo, 24; 81 - Tikinyo Soares, 84. Adrielson, 87.
Flamenqo - Amerika Mineyro 1:1
Viktor Uqo, 90+5 – Felipe Azevedo, 84.
Qremio - Atletiko Mineyro 1:0
Ronald, 11.
Kuyaba - San Paulu 2:1
Qleyson, 66-p. Pitta, 78 – Natan, 90+9.
Palmeyras - Fortaleza 3:1
Rios, 8. Rafael Veyqa, 76. Breno Lopes, 90+6 – Lusero, 45-p.
Braqantino - İnternasyonal 0:0
Koritiba - Fluminense 2:0
Robson, 24-p. Dioqo de Oliveyra, 28.
Bayya – Korintians 0:0
Kruzeyro – Qoyas 0:1
Joao Manyo, 28.
Vasku da Qama - Atletiko Paranaense 0:2
Kristian, 71. Vitor Bueno, 80-p.

1. Botafoqo RJ 16 13 1 2 28-9 40
2. Qremio 15 9 2 4 25-20 29
3. Flamenqo 16 8 4 4 28-19 28
4. Palmeyras 16 7 7 2 28-14 28
5. Atletiko Paranaense 16 8 2 6 22-18 26
6. San Paulu 16 7 4 5 23-16 25
7. Fluminense 16 7 4 5 21-16 25
8. Braqantino 16 6 7 3 22-16 25
9. Fortaleza 16 6 5 5 17-15 23
10. İnternasyonal 16 6 5 5 13-16 23
11. Kruzeyro 16 6 4 6 16-12 22
12. Kuyaba 16 6 4 6 16-18 22
13. Atletiko Mineyro 16 5 6 5 18-15 21
14. Santos 16 4 5 7 18-25 17
15. Korintians 15 4 4 7 12-17 16
16. Qoyas 16 4 3 9 15-26 15
17. Bayya 16 3 5 8 15-23 14
18. Koritiba 16 3 5 8 16-28 14
19. Amerika Mineyro 15 2 4 9 17-33 10
20. Vasku da Qama 15 2 3 10 11-25 9
Bombardirlər: Tikinyo Soares (Botafoqo RJ) - 11, Vitor Roke (Atletiko Paranaense) - 8, Deyverson (Kuyaba), Kalyeri (San Paulu), Eduardo Saşa (Braqantino), Rocer Gedeş (Korintians), Markos Leonardo (Santos), Halk (Atletiko Mineyro) – 6.