Braziliya çempionatının 14-cü turunda nəzərdə tutulan on oyundan ikisi baş tutmadı.

"Football-plus.az" xəbər verir ki, “Amerika Mineyro” – “Vasku da Qama” və “Korintians” – “Qremio” oyunları ölkə kubokunun 1/4 finalının “Korintians” - “Amerika Mineyro” cavab oyununun iyulun 15-nə təyin olunmasına görə təxirə salındı.

Amma liderin oyunu baş tutdu və “Botafoqo” növbəti qələbəsini qazanmaqla mövqeyini bir qədər də gücləndirdi. Rio de Janeyro klubu öz meydanında “Braqantino” ilə qarşılaşdı. Oyuna baxmayıb sırf nəticədən xəbər tutanlar liderin evdə rəqibindən üstün futbol sərgilədiyini düşünə bilərlər. Amma “Nilton Santos” stadionundakı matç qonaqların aşkar üstünlüyü şəraitində keçdi. “Botafoqo” bütün əsas oyun komponentlərində “Braqantino”dan geri qaldı. Sadəcə, qonaq komanda Lukas Perrini heç cür ram edə bilmədi. Zarafat deyil, 25 yaşlı qapıçı 8 dəfə seyv etməklə özünü rəqibin hücumları qarşısında keçilməz divara çevirdi. Maraq üçün liderin oyunçularının qapıya yalnız 3 dəqiq zərbə endirə bildiklərini də qeyd edək. Fasilədən sonra Eduardo ilə Di Plasidonun qolları isə ev sahiblərinə 3 xal qazandırdı. “Əl-Nəssr”ə (Səudiyyə Ərəbistanı) yollanan Luiş Kaştruya xələf olan Bruno Laje “Botafoqo”nun başında ardıcıl ikinci qələbəyə sevindi. Lider ardıcıl 6-cı qələbə ilə cədvəldəki yerini daha da gücləndirdi.

“Qremio”nun oyununun təxirə salınması diqqətləri bu komanda kimi tura 26 xalla başlayan “Flamenqo”nun oyununa yönəltmişdi. Xorxe Sampaolinin komandası “Fluminense”nin qonağı oldu. Rio de Janeyro derbisi, ehtimal olunduğu kimi, gərgin keçdi. Bu mübarizəyə futbol yox, əsl futbol döyüşü demək olar. Bircə bu faktı qeyd edək ki, hakim komandalara ümumilikdə 13 sarı və 1 qırmızı vərəqə göstərdi. Meydandan qovulan “Flamenqo”nun hücumçusu Luis Araujo oldu. Amma onun 90+7-ci dəqiqədə aşkar kobudluğa görə qırmızı vərəqə alması komandasını elə bir çətinə salmadı. Beləliklə, xalını 27-yə çatdıran Sampaolinin komandası 2-ci yerdə qaldı. Amma qolsuz “sülh” “Flamenqo”nu liderdən 12 xal geri saldı.

Turun mərkəzi oyunlarından biri də Portu Aleqridə keçirildi. Yerli “İnternasyonal” ilə son çempion “Palmeyras” arasındakı matç, demək olar ki, bərabər mübarizə şəraitində keçdi. Qonaqlar yalnız rəqibinə nisbətən daha çox hücum etməsi ilə yadda qaldı. Ancaq qapı torları silkələnmədi və “Palmeyras”ın qələbəsiz oyunlar seriyası 5-ə çatdı. Bu oyunlarda yalnız 3 xal qazanan Abel Ferreyranın komandası belə nəticə ilə həm liderdən 14 xal geri, həm də 5-ci yerdən 6-ya düşdü.

Ona görə ki, tura 8-ci yerdə başlayan “San Paulu” evdə “Santos”a 4:1 hesabı ilə qalib gələrək “Fluminense” və “Palmeyras”ı topların daha yaxşı fərqinə əsasən qabaqlamaqla 4-cü pilləyə yüksəldi.

15-ci tur
Botafoqo RJ - Braqantino 2:0
Eduardo, 48. Di Plasido, 60.
Fluminense – Flamenqo 0:0
İnternasyonal - Palmeyras 0:0
Kruzeyro – Koritiba 0:0
San Paulu – Santos 4:1
Kalyeri, 22-p.; 90+3. David, 79. Pato, 88 – Markos Leonardo, 90+3-p.
Fortaleza – Kuyaba 0:1
Deyverson, 19.
Atletiko Paranaense – Bayya 2:0
Vitor Roke, 24. Erik, 35.
Qoyas - Atletiko Mineyro 0:0
“Amerika Mineyro” – “Vasku da Qama” və “Korintians” – “Qremio” oyunları təxirə salınıb.

1. Botafoqo RJ 15 13 0 2 26-7 39
2. Flamenqo 15 8 3 4 27-18 27
3. Qremio 14 8 2 4 24-20 26
4. San Paulu 15 7 4 4 22-14 25
5. Fluminense 15 7 4 4 21-14 25
6. Palmeyras 15 6 7 2 25-13 25
7. Braqantino 15 6 6 3 22-16 24
8. Atletiko Paranaense 15 7 2 6 20-18 23
9. Fortaleza 15 6 5 4 16-12 23
10. Kruzeyro 15 6 4 5 16-11 22
11. İnternasyonal 15 6 4 5 13-16 22
12. Atletiko Mineyro 15 5 6 4 18-14 21
13. Kuyaba 15 5 4 6 14-17 19
14. Santos 15 4 4 7 16-23 16
15. Korintians 14 4 3 7 12-17 15
16. Bayya 15 3 4 8 15-23 13
17. Qoyas 15 3 3 9 14-26 12
18. Koritiba 15 2 5 8 14-28 11
19. Vasku da Qama 14 2 3 9 11-23 9
20. Amerika Mineyro 14 2 3 9 16-32 9
Bombardirlər: Tikinyo Soares (Botafoqo RJ) - 10, Vitor Roke (Atletiko Paranaense) - 8, Deyverson (Kuyaba), Kalyeri (San Paulu), Eduardo Saşa (Braqantino), Rocer Gedeş (Korintians), Halk (Atletiko Mineyro) – 6.