“Spartak” yavaş-yavaş özünə gəlir.

"Football-plus.az" xəbər verir ki, ötən tur “Soçi” (1:0), həftəiçi isə kubokda “Nijni Novqorod” (3:0) üzərində qələbələrdən sonra bu dəfə “ağ-qırmızılar” derbidə “Dinamo”dan üstün oldular. Moskva nəhəngi premyer-liqada ardıcıl 8-ci derbidə uduzmamaqla 2007-dən bəri ən yaxşı seriyasını yaxaladı. Gilyermo Abaskal 39-cu çempionat oyununda 20-ci qələbəyə sevindi və klub tarixində 20 qələbə həddinə çatan 8-ci məşqçi oldu. Mövsümün əsas sürprizi “Krasnodar” zirvədən möhkəm yapışıb. Bu dəfə “öküzlər”in qurbanı “Ural” oldu. Ötən tur komandasını məğlubiyyətdən xilas edən Kadi yeni faydalı oyunu ilə diqqət çəkdi. Məhz onun gözəl reydindən sonra rəqib oyunçunun avtoqolu sayəsində hesab açıldı. “Krasnodar” premyer-liqada məğlubiyytətsiz seriyanı 15 oyuna yüksəltməklə öz rekordunu yenilədi. Komanda 2023-cü ildə evdə keçirdiyi 12 çempionat oyununun heç birində uduzmayıb. Vladimir İviçin kollektivi artıq ən yaxın rəqibini 3 xal qabaqlayır. 2-ci pilləyə isə mövsümün daha bir sürpirzi – “Krılya Sovetov” yüksəldi. Həm “Krılya”, həm də “Krasnodar” 9 tura toplanılan xal baxımından tarixinin ən yaxşı mövsümünü keçirir. “Rostov” ÇSKA ilə ev oyununda əvvəlcə 1, sonra 2 top fərqi ilə öndə olsa da, yekunda 1 xalla kifayətlənməli oldu. ÇSKA bu mövsüm hələ də “quru” oyun keçirməyib. 9 tura 15 buraxılan qol isə klub tarixinin ən pis göstəricisidi! Qonaqların heyətində qollardan birini hesabına yazan Çalov premyer-liqada 177-ci oyunda 70-ci qolunu vurdu. XXI əsrdə bu turnirdə 70 qol həddinə ondan daha tez yalnız Promes (151 oyuna) və Vaqner Lav (133) çatıb.

Turun mərkəzi oyununda sürpriz qeydə alındı. Son 5 ilin çempionu “Zenit” o qədər də inamlı mövsüm keçirməyən “Lokomotiv”lə ev oyununda fasiləyə üstün yollansa da, yekunda hətta 1 xala da həsrət qaldı! “Loko”nun qələbə qolunu vuran Ermənistan yığmasının üzvü Tiknizyan qoldan sonra formasını çıxardığı üçün ikinci sarı vərəqə alaraq qovuldu. “Dəmiryolçular” 2017-nin payızından bəri ilk dəfə “Zenit”i məğlub etdilər. “Zenit” bu mövsüm evdə 2-ci məğlubiyyətini yaşadı. 3-cü turda “Dinamo” da Sankt-Peterburqu fəth etmişdi. Buna qədər Sergey Semakın dönəmində piterlilər heç vaxt bir mövsümdə evdə iki çempionat oyununda uduzmamışdılar! Turnir cədvəlində 3-cü pilləyə geriləyən “Zenit”lə lider arasında xal fərqi 4-ə yüksəldi.

9-cu tur
Zenit – Lokomotiv 1:2
Kassyerra, 22 – Qluşenkov, 59. Tiknizyan, 90+1.
Zenit: Kerjakov, Fernandes (Kruqovoy, 76), Karavayev (Mantuan, 86), Alip, Yerakoviç, Santos (Kovalenko, 87), Vendel, Barrios, Klaudinyo (Rodriqao, 76), İzidor (Sergeyev, 66), Kassyerra.
Lokomotiv: Lantratov, Nenaxov, Morozov, Fasson, Silyanov, Barinov, Karpukas (Maradişvili, 69), Pinyaev (Samoşnikov, 78), Mirançuk (Qluşenkov, 56), Tiknizyan, Dzyuba (Süleymanov, 78).

Spartak – Dinamo 1:0
Bonqonda, 7.
Spartak: Selixov (Maksimenko, 46), Denisov, Duarte (Çernov, 88), Babiç, Xluseviç, Prutsev (Umyarov, 79), Martins, Mozes (Zobnin, 65), Bonqonda (Zinkovski, 65), Promes, Sobolev.

Rostov – ÇSKA 3:3
Mironov, 7. Qolenkov, 12; 50 – Kellven, 26. Çalov, 65. Fayzullayev, 70.
ÇSKA: Akinfeyev, Kellven, Muxin, Aqapov, Zdelar, Qayiç, Oblyakov, Mendes (Kuçayev, 64), Fayzullayev, Çalov (Kislyak, 90+4), Zabolotnı (Davila, 64).

Krasnodar – Ural 2:0
Filipenko, 53-öz qapısına. Pina, 73.

Krılya Sovetov – Soçi 2:1
Saltıkov, 4. Rəhmanoviç, 41 – Noboa, 90+7-p.

Baltika – Axmat 1:0
Xarin, 43-öz qapısına.

Nijni Novqorod – Orenburq 3:1
Ze Turbo, 45. Sevikyan, 53. Boselli, 75 – Peres, 28.

Fakel – Rubin 0:1
Vada, 85.

1. Krasnodar 9 6 3 0 14-3 21
2. Krılya Sovetov 9 5 3 1 21-12 18
3. Zenit 9 5 2 2 19-8 17
4. Spartak 9 5 1 3 14-12 16
5. Dinamo 9 4 3 2 16-14 15
6. Lokomotiv 9 4 3 2 15-14 15
7. Nijni Novqorod 9 4 2 3 9-8 14
8. Ural 9 4 2 3 8-10 14
9. ÇSKA 9 3 4 2 19-15 13
10. Axmat 9 3 2 4 11-10 11
11. Rostov 9 2 3 4 13-19 9
12. Rubin 9 2 3 4 10-18 9
13. Orenburq 9 2 2 5 10-16 8
13. Baltika 9 2 1 6 9-15 7
15. Soçi 9 2 0 7 9-14 6
16. Fakel 9 1 2 6 5-14 5
Bombardirlər: Kassyerra (Zenit) – 8, Çalov (ÇSKA) – 6, Zabolotnı (ÇSKA) – 5.
Növbəti turun oyunları sentyabrın 29-u - oktyabrın 1-i aralığında keçiriləcək: Rostov – Ural, Krılya Sovetov – Spartak, ÇSKA – Baltika, Lokomotiv – Nijni Novqorod, Axmat – Dinamo, Rubin – Krasnodar, Fakel – Soçi, Orenburq – Zenit.

Oyundan sonra
Gilyermo Abaskal, “Spartak”ın baş məşqçisi: “Hər cəhətdən çox vacib qələbə qazandıq. Hələ fasiləyə qədər 2-ci qolu vurub intriqanı öldürə bilərdik. Amma fürsətləri boşa verdik. ”Dinamo” elə-belə rəqib deyil. Ona görə də oyunun çətin keçəcəyini bilirdik. Qısa müddət ərzində ardıcıl 3-cü qələbəimizi qazandıq. Ən sevindirici odu ki, bu matçlarda həm də qol buraxmamışıq. “Dinamoçular” vaxtı uzatmağımızdan narazıdı? Matçın sonuna yaxın hesabda irəlidə olan komandanın vaxtı uzatması futbolda normal haldı. Digər komandalar bizə qarşı 5-ci dəqiqədən etibarən vaxtı uzatmağa başlayırlar”.

Sergey Semak, “Zenit”in baş məşqçisi: “Oyuna pis başlamasaq da, sonradan üstünlüyü əldən verdik. Əslində 2-ci hissəni daha yaxşı keçirdik. Rəqibin cərimə meydançasına qədər asanlıqla gedib çıxa bilirdik. Amma hər dəfə ya son ötürmələr, ya da son zərbələr qeyri-dəqiq alınırdı. Son saniyələrdə səhvə yol verib uduzduq. Təəssüf ki, futbolda belə şeylər olur. Amma bu mövsüm belə oyunları tez-tez yaşayırıq. Səhvlərimiz üzərində düşünmək və təhlil etmək baxımından faydalı qarşılaşma oldu. Əsas mübarizə hələ irəlidədi. Amma istənilən halda evdə uduzmaq adama yaxşı hisslər bəxş etmir. Bilirəm ki, indi hakimlik haqda sözlərim bəhanə kimi səslənəcək. Amma biz bu gün hakimin qərarlarını anlamadıq. Bəzən hədsiz sərtliyə göz yumulurdu. Bəzən isə əksinə, xırda toqquşmalara görə oyun dayandırılırdı”.