Hesabat turu penaltilərin bolluğu ilə diqqəti çəkdi. Ümumilikdə 10 penalti təyin olundu ki, bu da mövsümün rekordudu.

"Football-plus.az" xəbər verir ki, təkcə “Ximki” – “Torpedo” və “Fakel” – “Orenburq” matçının hər birində qapılara 3 penalti təyin olundu və bununla da cari mövsümdə premyer-liqada 3 penaltinin təyin olunduğu qarşılaşmaların sayı 8-ə çatdı! Müqayisə üçün bildirək ki, bu mövsüm “böyük beşlik” ölkələrində bir matçda 3 penalti verilən oyunların ümumi sayı məhz elə 8-di. Ümumiyyətlə, Beynəlxalq İdman Araşdırmalar Mərkəzinin versiyasına görə Rusiya çempionatında hər 187 dəqiqədən bir penalti təyin olunur və şimal qonşularımızın turniri dünyada bu baxımdan yalnız Misir (hər 172 dəqiqəyə 1 penalti) və Səudiyyə Ərəbistanından (178) geri qalır.

Əmin addımlarla ardıcıl 5-ci çempionluğa doğru irəliləyən “Zenit” “Dinamo” ilə görüşdə asan qələbə qazanaraq daha bir maneəni dəf etdi. Piterlilərin çempionat çərçivəsində evdə Moskva klublarına qarşı qələbə seriyası 12, məğlubiyyətsiz seriyası 22 oyuna çatdı. Premyer-liqada “Zenit”i səfərdə məğlub edən son Moskva klubu 2017-nin oktyabrında “Lokomotiv” olub. 2-ci pillədəki “Rostov” da qalib gəldiyindən zirvədə xal fərqi azalmadı. “Loko” ÇSKA-ya qarşı səfər derbisində 40-cı dəqiqədən etibarən azlıqda oynamasına baxmayaraq, xal qazanmağı bacardı. “Hərbçilər”in 5 oyunluq qələbə seriyasına son qoyuldu. “Dəmiryolçular” isə bu mövsüm hamıdan çox – 8 qırmızı vərəqə alıblar. Maraqlıdı ki, ötən mövsüm də “Loko” bu göstəricidə hamını üstələmişdi (9 qırmızı vərəqə). “Nijni Novqorod” bu tur 6 oyunluq məğlubiyyət seriyasına son qoymağı bacardısa, “Axmat” premyer-liqada 8-ci cəhddə ilk dəfə “Soçi”ni məğlub etdi. “Spartak”la “Krasnodar”ın dueli turun ən məhsuldar və dramatik oyunu oldu. Kadinin start heyətində oynadığı qarşılaşmada qonaqlar əvvəlcə 2:0, sonra 3:2 hesabları ilə öndə olsalar da, sonda qələbə bir yana, heç xal da qazana bilmədilər! Qələbə qolunun müəllifi olan Promes Rusiya çempionatında 169-cu oyununda 85-ci qolunu vurmaqla turnirin tarixində ən məhsuldar əcnəbi oyunçular statusunda olan Vaqner Lav ilə Sərdar Azmuna çatdı! “Krasnodar” isə yavaş-yavaş 0:2-ni əldən vermək baxımından “püxtələşir”. Komanda bu mövsüm 4-cü dəfə belə aqibətlə üzləşdi!