Tur cümə günü “Rubin”in “Krılya Sovetov”u məğlub etməsi ilə start götürdü. Kazanlılar mövsümdə ilk qələbəni bayram etdilərsə, samaralılar əksinə, mövsümdə ilk məğlubiyyətlə barışmalı oldular.

"Football-plus.az" xəbər verir ki, “Krasnodar” bu tur evdə “Lokomotiv”i məğlub etsəydi, Rusiya çempionatı tarixində mövsümə 5 qələbə ilə başlayan 5-ci komanda olacaqdı. Bir penaltini boşa verməsinə baxmayaraq, Vladimir İviçin komandası qələbə seriyasını davam etdirməyə çox yaxın idi. Amma son saniyələrdə Anton Mirançuk “Loko”nu məğlubiyyətdən xilas etdi. Qeyd edək ki, “dəmiryolçular” ardıcıl 20-ci çempionat oyununda qol vurdular. Bu, 1994-95-ci illərdə qeydə alınmış klub rekordunun təkrarı deməkdi. Səfərdə debütant “Baltika”nı minimal hesabla üstələyən “Ural” xalını 13-ə çatdıraraq “Krasnodar”ı yaxaladı. Maraqlıdı ki, “Ural” ötən mövsüm 13 xal həddinə yalnız 13-cü turda çatmışdı. Ümumiyyətlə, mayın əvvəlindən başlayaraq son 10 tura nəzər salsaq, yekaterinburqlular bu müddətdə ən çox (23) xal toplayan komandadı! İlk 2 tura cəmi 1 xal toplayan “Dinamo” gözlənilmədən dirçəlməyi bacarıb. Moskva təmsilçisi “Zenit”lə “Baltika”nın ardından bu dəfə derbidə ÇSKA üzərində əzmkar qələbə qazandı. Ümumiyyətlə, “Dinamo”nun derbilərdə uğurlu oynaması diqqəti çəkir. Komanda ötən mövsümün startından bəri çempionatda keçirdiyi 9 derbinin yalnız birində uduzub. Bundan başqa, “Dinamo” turnirin tarixində ilk dəfə ÇSKA üzərində ardıcıl 4-cü ev qələbəsini qazandı. Valeri Karpinin “Rostov”u “evdə xoruz, çöldə fərə” prinsipi ilə oynamaqda davam edir. Bu dəfə “Soçi” önündə pərən-pərən düşən “Rostov” 2011/12-dən bəri ilk dəfə premyer-liqada ardıcıl 5-ci səfər oyununda uduzdu.

Böyük səbirsizliklə gözlənilən turun mərkəzi oyunu “Otkrıtie Arena”da keçirildi. “Spartak”ın Malkomu itirdikdən sonra əvvəlki qədər əzəmətli görünməyən “Zenit”ə qarşı uğursuz seriyaya bu dəfə son qoyacağını düşünənlər az deyildi. Amma Sankt-Peterburq nəhəngi növbəti dəfə bədxahlarını susduraraq hazırda Rusiya futbolunda rəqibsiz olduğunu göstərdi. Vendelin dublu və Kassyerranın mövsümdəki 4-cü qolu piterlilərə önəmli qələbə qazandırdı. “Spartak”ın çempionat çərçivəsində bu rəqibə qarşı qələbəsiz seriyası 11 oyuna yüksəldi (4 heç-heçə, 7 məğlubiyyət). Son qələbə 2017-nin noyabrında əldə olunub. “Spartak”ın çempionatda bundan daha böyük (14 oyun) qələbəsiz seriyası yalnız ÇSKA-ya qarşı olub (2001-08-ci illərdə).

5-ci tur
Spartak – Zenit 1:3
Sobolev, 81-p. – Vendel, 32; 73. Kassyerra, 90+4.
Spartak: Svinov, Denisov (Xluseviç, 66), Duarte, Cikiya, Ryabçuk (Zinkovski, 84), İqnatov (Bonqonda, 46), Martins, Mozes (Zobnin, 27), Medina (Umyarov, 46), Promes, Sobolev.
Zenit: Kerjakov, Karavayev, Alip, Yerakoviç, Santos, Fernandes (Sutormin, 72), Barrios, Vendel (Du Keyroş, 89), Mantuan (Vasilyev, 82), Klaudinyo (Yeroxin, 89), Sergeyev (Kassyerra, 72).
Dinamo – ÇSKA 2:1
Nqamalyo, 46. Smolov, 83-p. – Zabolotnı, 6.
ÇSKA: Torop, Qlebov (Ryadno, 62), Nababkin (Qayç, 85), Moyzes, Roşa, Oblyakov, Zdelar, Mendes (Kuçayev, 62), Muxin (Fayzullayev, 87), Çalov, Zabolotnı.
Krasnodar – Lokomotiv 1:1
Axmetov, 47 – Mirançuk, 90+7.
Lokomotiv: Lantratov, Nenaxov, Fasson, Poqostnov (Morozov, 67), Samoşnikov, Barinov, Karpukas (Sarveli, 78), Rıbçinski (Maradişvili, 79), Pinyaev (Tiknizyan, 63), Jemaletdinov (Mirançuk, 63), Qluşenkov.
Baltika – Ural 0:1
Kaştanov, 49-p.
Soçi – Rostov 4:0
Kramariç, 16; 29. Corceviç, 28. Medvedev, 76.
Axmat – Orenburq 4:0
Timofeyev, 9. Berişa, 24. İlyin, 35. Kamilo, 87.
Rubin – Rostov 2:1
Qritsaenko, 11. Martınoviç, 41 – Qarre, 15.
Fakel – Nijni Novqorod 2:0
Markov, 75. Dolqov, 90+1.
1. Krasnodar 5 4 1 0 9-2 13
2. Ural 5 4 1 0 8-3 13
3. Dinamo 5 3 1 1 11-9 10
4. Zenit 5 3 1 1 10-5 10
5. ÇSKA 5 3 0 2 12-8 9
6. Spartak 5 3 0 2 12-10 9
7. Krılya Sovetov 5 2 2 1 12-8 8
8. Rostov 5 2 1 2 7-11 7
9. Soçi 5 2 0 3 8-7 6
10. Axmat 5 2 0 3 9-8 6
11. Lokomotiv 5 1 3 1 9-9 6
12. Rubin 5 1 2 2 6-11 5
13. Nijni Novqorod 5 1 1 3 2-5 4
14. Baltika 5 1 0 4 3-8 3
15. Fakel 5 1 0 4 5-10 3
16. Orenburq 5 0 1 4 3-12 1
Bombardirlər: Çalov (ÇSKA), Kassyerra (Zenit) – 4.

Növbəti turun oyunları avqustun 25-27-si aralığında keçiriləcək: Orenburq – ÇSKA, Fakel – Krasnodar, Zenit – Ural, Rubin – Dinamo, Spartak – Axmat, Nijni Novqorod – Rostov, Krılya Sovetov – Baltika, Soçi – Lokomotiv.

Oyundan sonra
Gilyermo Abaskal, “Spartak”ın baş məşqçisi: “Nəyin bahasına olur-olsun, qalib gəlmək istəyirdik. Oyunun əvvəlləri bizim üçün pis keçmədi. Rəqibin cərimə meydançasına tez-tez daxil olurduq. Meydanın mərkəzində ağalıq edirdik. İki gözəl fürsətimiz oldu. Sonra “Zenit”ə çoxlu boş zona verməyə başladıq. İkinci hissədə qapımız önündə ciddi təhlükələr yarandığını xatırlamıram. Sadəcə, konsentrasiyanı itirərək 2-ci qolu buraxdıq. Nəticənin ədalətli olduğunu düşünmürəm. Çünki rəqib qol vurduğu epizodlardan başqa, demək olar, ciddi fürsət yaxalamadı. Özümüzə inamı ititrməməliyik. Səhvləri incələyib yolumuza davam etməliyik. Qol buraxanda da, qol vuranda da bunu komanda şəklində edirik. Əminəm ki, “Spartak” vəziyyəti düzəldəcək”.

Sergey Semak, “Zenit”in baş məşqçisi: “Tam layiqli qələbə qazandığımızı düşünürəm. İrəlidə fəal idik. Penalti olmasaydı, oyunun sonlarını daha rahat keçirə bilərdik. Vendel əla təsir bağışladı. Məşqlərdə üzərində çox yaxşı çalışır və meydanda da bunun qarşılığını alır. “Spartak”ın oyun sistemi bizi bir qədər təəccübləndirdi. Ona görə də ilk yarının gedişində biz də bəzi şeyləri dəyişməli olduq. “Spartak”ın hücum xəttində təhlükəli oyunçular var. Amma onlara qapımız önündə çoxlu epizod yaratmağa imkan vermədik. Emosional və prinsipial oyun olduğu üçün bəzi səhvlərimiz də oldu. Amma ümumi götürəndə yaxşı və pozitiv təsir bağışladıq. Hər halda, əsas rəqiblərimizdən birini səfərdə yendiyimiz üçün komandam ən xoş sözlərə layiqdi”.