Tur meydan sahibləri üçün olduqca uğursuz alındı.

8 qarşılaşmadan yalnız birində onlar sevindi. Özü də həmin yeganə qələbənin müəllifi olan “Dinamo” 79-cu dəqiqəyə qədər məğlub durumda idi! İkinci dövrənin ən diqqətçəkən komandası “Krasnodar”dı. “Qarabağ”dan Kadini transfer etdikdən sonra yüksəlişə keçən və bu tur səfərdə “Soçi”nji yenən bu komandanın qələbə seriyası 5, məğlubiyyətsiz seriyası 6 oyuna yüksəldi. Özü də “Krasnodar” bu 6 qarşılaşmanın hər birində ən azı 2 qol vurub!

Elə ÇSKA da yaxşı forma yığıb. Səfərdə “Ural”ı üstələyən “hərbçilər”in də qələbə seriyası 5 oyuna çatdı. ÇSKA premyer-liqada bu rəqibə ardıcıl 23-cü oyunda məğlub olmadı (17 qələbə, 6 heç-heçə). Bu, Rusiya çempionatı tarixində bir komandanın digərinə qarşı ən uzun 3-cü məğlubiyyətsiz seriyasıdı. “Spartak” 5 oyunluq qələbəsiz seriyaya son qoyaraq səfərdə autsayder “Torpedo”nu üstələdi. Moskva nəhənginin oyununda maraqlı hadisələr baş verdi. Komanda artıq ilk hissədə 3 penalti qazansa da, bunlardan yalnız 1-ni qola çevirdi. Son 15 ildə bir komandanın xeyrinə birinci hissədə 3 penalti təyin olunmamışdı.

Bundan başqa, “Spartak” oyunu 9 nəfərlə başa vurmalı oldu ki, sonuncu dəfə belə hadisə komandanın başına 2012-də “Zenit”lə oyunda gəlmişdi. Ötən tur “Zenit”lə oyunda ümidləri doğrultmayan və 4 oyunluq qələbə seriyası qırılan “Lokomotiv” bunun acığını səfərdə “Orenburq”dan çıxdı. Özü də “Orenburq” buna qədər evdə yalnız bir dəfə - 1-ci turda “Krılya Sovetov”a uduzmuşdu. “Loko”nun heyətində ilk 5 oyuna 6 qol vurmaqla diqqəti çəkən Dzyuba bu dəfə ötürmələri ilə ön plana çıxdı. O, karyerasında 2-ci dəfə çempionat oyununda 3 məhsuldar ötürmə verdi. Turun mərkəzi oyununda ilk iki pillədə qərarlaşanlar - “Zenit”lə “Rostov” qarşılaşdı.

Gözlənildiyi kimi, Sergey Semakın kolletkivi rəqibdən üstün təsir bağışlasa da, hesabına 3 xal yaza bilmədi. Piterlilərin “çərçivə”yə cəmi 1 zərbə vurması diqqəti çəkdi. “Rostov”un isə şəxsi məhsuldarlıq rekordu başa çatdı. Belə ki, komanda son 15 turun hamısında qol vurmağı bacarmışdı.