Qismət “Zirə”yə zirvəni qismət etdi

Bu komandalar yeni mövsümə sensasiyalı qələbəylə başlamışdı. "Qartallar" səfərdə son çempion "Qarabağ"ı, gəncəlilər isə doğma meydanda "Neftçi"ni məğlub etməyi bacarmışdı. Odu ki, hər iki tərəf meydana uğurunun təsadüfi olmadığını nümayiş etdirmək üçün çıxmışdı. Referinin fitindən sonra mübarizə əsasən meydanın mərkəzində getdi. "Zirə" nisbi üstünlük qazansa da, gəncəlilərin qapısı önündə təhlükə yarada bilmədi. Odu ki, qarşılaşmada erkən qol və qol imkanı olmadı. Qapı qarşısında ilk təhlükəni 17-ci dəqiqədə meydan sahibləri yaratdı. Amma Kulaçın zərbəsini qapıçı tutdu. Sumanın həmləsi az fərqlə tirin üstündən keçdi. Qonaqlardan Junior qapını yoxlasa da, hədəfə düşmədi. Hissənin sonlarına yaxın Məqsəd Eldarın qapı önünə asmasını tora göndərə bilmədi. Əlavə oluna dəqiqələrdə Qismətin cərimə zərbəsindən ötürməsinə Çantakias ayaq qoysa da, qola həsrət qaldı. Fasilədən sonra "qartallar" meydanda üstünlüyə nail olsa da, ilk qol vəziyyəti "sarı-göylər"dən gəldi. Amma Rüfətin qüvvətli zərbəsini qapıçı dəf etdi. 64-cü dəqiqədə qəsəbə təmsilçisi istəyinə nail oldu. Məqsədin cərimə meydançasına asmasına yüksələn Qismət "Kəpəz"i məyus etdi. Qoldan sonra meydan sahibləri daha ehtiyatlı oynamaqla rəqibi topsuz saxlamağa çalışdı. "Kəpəz" nə qədər irəli atılmaq istəsə də, meydanın "Zirə"yə aid hissəsində çoxala, kəsərli hücumlar qura bilmirdi. Kvirkviya, Junior və Şuaybunun qapıya həmlələri olsa da, heç biri hədəfə düşməyi bacarmadı. Oyuna əlavə olan dəqiqlərdə qonaqlar bir qədər fəallaşsa da, "qartallar" ehtiyatlı oyunla hesabın dəyişməsinə imkan vermədilər. "Zirə" təmkinli oyunla ardıcıl 2-ci qələbəsini qazandı. Sonradan aydın olacaqdı ki, Qismətin yeganə qolu komandanı zirvəyə daşıyıb.

Gözdən qaçmadı
* Start fitinə 10 dəqiqə qalmış "Kəpəz" fanatları böyük coşquyla komandaya dəstək nümayiş etdirməyə başladı
* Oyunu izləyənlər arasında Barış Şimşək də var idi
* Havanın isti olduğunu nəzərə alan hakim 23-cü və 68-ci dəqiqələrdə su fasiləsinə şərait yaratdı
* 44-cü dəqiqədə stadiondakı gəncəli azarkeşlər "Kəpəz" azarkeşi, 44 günlük müharibədə qəhramancasına şəhid olan Anar Məmmədovu "Anar, sən bizim qürurumuzsan" şüarı ilə andılar.
* Uzatma dəqiqələrində "Zirə" azarkeşləri "Səbail”, gözlə, “Zirə" gəlir şüarını səsləndirdi

ABDULLA İSMAYILOĞLU