Ötən sayımızda Türkiyə yığmasının baş məşqçisi Ştefan Kuntsun istefaya göndərildiyini xəbər vermişdik.

“Football-plus.az” xəbər verir ki, Vinçentso Montellanın təyinatı ilə bağlı rəsmi məlumat isə srağagün gəldi. Türkiyə Futbol Federasiyası italiyalı mütəxəssislə üçillik anlaşma əldə olunduğunu açıqladı. Montellanın mətbuat önündə imza mərasimi sentyabrın 27-də federasiyanın binasında baş tutacaq. 49 yaşlı mütəxəssisin srağagün “Ülkər” stadionunda peyda olması diqqəti çəkdi. O, Türkiyənin gənclər və idman naziri Osman Aşkın Bak, eləcə də TFF prezidenti Mehmet Büyükekşi ilə birlikdə “Fənərbaxça” – “Nordşelland” oyununu izlədi. Qısaca xatırladaq ki, daha öncə “Roma”, “Kataniya”, “Fiorentina”, “Sampdoriya”, “Milan” və “Sevilya”nı çalışdıran Montella son 2 mövsümdə “Adana Dəmirspor”un başında idi. İndiyə qədər onun çalışdırdığı klublar 438 rəsmi oyundan 194 qələbə, 104 heç-heçə, 140 məğlubiyyətlə ayrılıb. Onu da bildirək ki, Montella Türkiyə yığması tarixinin 21-ci əcnəbi və 4-cü italiyalı baş məşqçisi oldu. “Ay-ulduzlular”ı buna qədər üç italiyalı – Sandro Puppo (1952-54, 1960-62), Covanni Varqlien (1955-56) və Leandro Remondini (1958-59) çalışdırıb. XXI əsrdə isə Montella Quus Hiddink, Mirça Luşesku və Ştefan Kuntsun ardından yığmada çalışan 4-cü əcnəbi məşqçiyə çevrildi.

TFF Montellanın köməkçiləri arasında iki türkiyəli mütəxəssisin yer almasını istəyir. Onlardan birinin adı, demək olar, bəllidi. Əslində federasiya Kuntsun əsas köməkçisi olan Kənan Koçakın fəaliyyətindən razı idi və onun yığmadakı işini davam etdirməsini istəyirdi. Amma 42 yaşlı Koçak Montella ilə çalışmaqdan imtina edərək öz istəyi ilə istefa verdi! Bu üzdən federasiya diqqətini başqa məşqçilərə yönəltməli oldu. Türkiyə mətbuatının yazdığına inansaq, qurum son illərdə İtaliyada çalışan gənc Tuğberk Tanrıvermişə təklif göndərib. 33 yaşlı Tanrıvermiş daha öncə “Qalatasaray”da Çezare Prandelli, İqor Tudor və Fatih Terimin dönəmində çalışıb. Onun işi rəqibləri təhlil etməkdən ibarət idi. 2019-da İtaliyaya yollanan Tanrıvermiş burda “Roma”nın U-15 komandasını ölkə çempionu etməklə əsl tarix yazmışdı. Hazırda o, “Roma”nın U-18 komandasını çalışdırır. TFF ilə “canavarlar” arasında anlaşma əldə olunacağı gözlənilir. Pro lisenziyasına malik olan Tanrıvermiş ingilis, alman və fransız dillərində danışmağı bacarır.