İtaliyalı Vinçentso Montella ilə yollarını ayıran ''Adana Dəmirspor''da baş məşqçi axtarışları davam edir.

"Football-plus.az" xəbər verir ki, başqan Murat Sancak bu vəzifəyə klubun sisteminə uyğun bir məşqçi gətirmək istəyir.

Tarixinin ən yaxşı mövsümünü keçirərək 4-cü pilləni tutan və ilk dəfə Türkiyəni avrokuboklarda təmsil etmək haqqı qazanan Adana təmsilçisi böyük ehtimalla yenə əcnəbi bir məşqçiyə tapşırılacaq.

Türkiyə mətbuatının yazdığına inansaq, əsas namizədlər Andrea Pirlo, Aleks De Souza və Quti Hernandesdi. Montellanın həmyerlisi olan Pirlo zatən Türkiyədə çalışırdı və mövsüm bitməmiş ''Fatih Karagümrük''dən ayrıldı. Aleks ən son Braziliya klubu ''Avai''də çalışırdı və bir neçə ay öncə istefaya göndərildi.

Yaxın keçmişdə ''Beşiktaş''da Şenol Günəşin köməkçisi olan Quti isə 3 ilə yaxındı işsizdi. Mirça Luçeskunun oğlu Razvanın da adı namizədlər arasındadı. Amma onun hələ PAOK ilə birillik müqaviləsi olduğundan bu təyinatın baş tutma ehtimalı yüksək deyil.