“Fənərbaxça” Əli Koçun başqanlığının 5-ci mövsümündə də fiaskoya uğrayaraq çempion ola bilmədi.

“Football-plus.az” xəbər verir ki, son turda “Qalatasaray” önündə aciz qalaraq darmadağın olan və psixoloji cəhətdən çox ciddi zərbə alan İstanbul nəhəngi səssiz-sədasız şəkildə ölkə kubokunun finalına hazırlaşır. Həlledici oyun iyunun 11-də “İstanbul BŞ”yə qarşı olacaq.

Jorje Jezuşun “Fənərbaxça”da qalmayacağı isə praktiki cəhətdən dəqiqləşib. Türkiyəyə yerli məşqçilərin hegemonluğuna son qoymaq üçün gələn, amma ümidləri doğrultmayan portuqaliyalı mütəxəssislə kubokun finalının ardından yollar rəsmən ayrılacaq. Derbidəki son məğlubiyyət Jezuşun da klubdakı nüfuzuna ciddi zərbə vurub. Oyunçular onun planlarına və sisteminə artıq güvənmir. Amma rəhbərlik kubokun finalına qısa müddət qalmış məşqçini qovmağa ürək etmir. Bu arada onun yeni iş yeri də, demək olar, bəllidi. Səudiyyə Ərəbistanı qaynaqlarının verdiyi məlumata görə Jezuş bu ölkənin yığma komandasının başına keçəcək. 68 yaşlı mütəxəssislə Səudiyyə Ərəbistanı Futbol Federasiyası arasında üçillik anlaşma əldə olunub. Jezuşun illik qazancı isə 10 milyon avro olacaq. Yəni o, müqaviləsinin sonuna qədər vəzifəsində qalsa, 30 milyon avro qazanacaq! Daha öncə “Benfika” və “Flamenqo” ilə ölkə çempionluğunu qazanan Jezuş Türkiyədə eyni uğuru qazana bilmədi. “Fənər” onun başçılığı altında 51 rəsmi oyundan 34 qələbə, 10 heç-heçə, 7 məğlubiyyətlə ayrıldı. Əslində bu pis göstərici deyil və hər oyuna orta hesabla 2,2 xal deməkdi. Amma göründüyü kimi, çempionluq üçün kifayət etmədi.

Jezuşu əvəzləməyə namizəd olan məşqçilərə gəlincə, Əli Koç Vinçentso Montella, Abdulla Avcı və Mirça Luçesku arasında daha çox birinciyə üstünlük verir. İtaliyalı mütəxəssis artıq iki ildi Türkiyədədi və ölkə futbolunu yaxından tanıyır. Üstəlik onun “Adana Dəmirspor”la müqaviləsinin müddəti bitmək üzrədi. Bəzi mənbələr hətta iddia edir ki, “Fənər” Montella ilə ilkin razılıq əldə edib. Daha öncə “Roma”, “Fiorentina”, “Milan” və “Sevilya” kimi önəmli klublarda işləmiş 48 yaşlı Montella 2016-da “rossonyerlər”in başında İtaliya superkubokunu qazanıb.