Tovuzda əla futbol atmosferi var idi.

Azarkeşlər komandalarına dəstək verir, oyunçular meydanda şou göstərirdilər. Qarşılaşma eyni ilə bu ssenaridə gedirdi. Həqiqətən də hər şey tovuzlular üçün əla başlamışdı. İlk hissədə, sadəcə, Ayxanın oyunu istənilən kimi getmirdi. Hətta bəzi azarkeşlər baş məşqçidən onu əvəzləməyi də tələb etdi. İlk hissədəki cəhdlərə baxmayaraq, meydan sahibləri hesabı aça bilmədi. Bunda qonaqların qolkiperi Rəşadın da müstəsna rolu var idi. O, dəfələrlə tovuzluların zərbələrini dəf etdi.

Ayxanın zəif çıxış etdiyini görən Abbasov fasilədən sonra onu Fəridlə əvəzlədi. İkinci hissədə meydan sahibləri hücumların kəsərini artırdı. 56-cı dəqiqədə “Turan Tovuz” hesabı açdı. Sağ cinahdan Faiqin ötürməsindən sonra Martin topa toxunuş etdi. “Dəri kürə”ni ələ keçirən Fərid Rəşadı məyus edə bildi. Qoldan sonra meydan sahibləri hücumların kəsərini daha da artırdı. Ayxan Abasovun komandası rəqibi təzyiq altında saxlayırdı. 3 dəqiqədən sonra “boz qurd” daha bir qol vurdu. Pussi Muradın büdrəməsindən istifadə edərək topu ələ keçirdi. Afrikonu da geridə qoyan hücumçu komandasının ikinci qolunu vurdu.

Artıq hər şey qərbilərin xeyrinə idi. Azarkeşlər qələbəni bayram edirdi. Lakin heç nə bitməmişdi. Elmar Baxşıyevin komandası məğlubiyyətlə barışmadı. Oyuna sonradan qoşulan Xalayla Allaşın ötürməsindən sonra dəqiq zərbə ilə hesab arasında fərqi azaltdı. Qoldan dərhal sonra “qırmızı-qaralar” hücuma atıldılar. 5 dəqiqə sonra isə qonaqlar penalti vurmaq hüququna yiyələndi. Bilalın ötürməsinin qarşısını Marandiçi əli ilə aldı. Əliyar əvvəlcə oyunu davam etdirdi. Lakin VAR-dan gələn xəbərdarlıqdan sonra FİFA referisi 11 metrlik cərimə zərbəsi təyin etdi. Zərbəni dəqiq yerinə yetirən Xalayla dubl edərək hesabı bərabərləşdirdi. Son 15 dəqiqədə tərəflərin hesabı dəyişmək cəhdləri boşa çıxdı. 2:2 qətiyyən tovuzlu azarkeşlərin ürəyincə deyildi.

Gözdən qaçmadı
* Oyunu izləyənlər arasında AFFA-nın baş katibi Sərxan Hacıyev, İcraiyyə Komitəsinin üzvü İsgəndər Cavadov və FİF-in icraçı direktoru Tural Piriyev də var idi.
* “Turan Tovuz” ikinci qolu vurarkən “Qəbələ”nin baş məşqçisi Elmar Baxşıyev qonaqların əyləşdiyi rəsmi protokol tribunasındakı yerini tərk etdi.
* İkinci qoldan sonra azarkeşlər “Ayxan, sən bizim ürəyimizsən!” şüarını səsləndirdilər. Baş məşqçi onlara tərəf dönərək təşəkkür etdi.
* Əliyar Ağayev penaltini təyin etməmişdən öncə Elmar Baxşıyev Fariz Nəcəfovun yanına gələrək “top Marandiçinin əlinə dəydi” dedi.
* Oyun bitəndən sonra həm Ayxan Abbasov, həm də Elmar Baxşıyev az oynayan futbolçuları məşqə çıxardı.

İLKİN SULTANLI