Bu oyunda qələbə iki komanda üçün çox vacib idi.

“Turan Tovuz” avrokuboklara iddialı rəqiblərinə yaxınlaşmağı düşünürdüsə, “Zirə” uzun də 4-cü pillədəki mövqeyini möhkəmlətmək istəyirdi.

Oyun meydan sahiblərinin sürətli hücumlarıyla başladı. Ayxan - Natan - Runi “üçlüy”ü qonaq müdafiəçiləri tez-tez narahat edirdi. Lakin Piruzinin yoxluğu “Turan Tovuz”un oyununa təsir göstərmişdi. Eltunla Faiqin bəzi hallarda mövqe səhvlərinə yol verməsi də meydan sahiblərinin istənilən səviyyədə çıxış etməsinə mane olurdu. “Zirə” isə şansını gözləyirdi.
Meydanda fiziki gücə və texnikaya arxalanan komandaların mübarizəsini izləyirdik ki, “Zirə” 27-ci dəqiqədə hesabı açdı. Keytanın künc nöqtəsindən ötürməsini Adileu başla qapıdan keçirdi. “Turan Tovuz” qolun şokundan ayılmamış qapısında ikinci topu gördü. Bu dəfə qapı önündə yaranan qarışıqlıqdan Keyta yararlandı. Sonrakı cəhdlərə rəğmən, komandalar fasiləyə “Zirə”nin 2:0 hesablı üstünlüyü ilə yollandı.

İkinci hissədə isə meydan sahibləri daha üstün oyun sərgilədi. Ayxan Abbasovun komandası təslim olmaq istəmirdi. Lakin “qartallar” müdafiədə etibarlı oynamaqla yanaşı, sürətli əks-hücumlar da qururdu. Bununla belə, tovuzlular bir neçə əlverişli şansı boşa verdi. Nəticədə Rəşad Sadıqovun komandası 3 xal qazanmaqla rəqibin 3 oyunluq qələbə seriyasını da qırdı.

Gözdən qaçmadı

* Oyundan əvvəl Xocalı qurbanlarının xatirəsi birdəqiqəlik sükutla yad edildi.
* Həm fasilədə, həm də oyunun sonunda tovuzlular Ayxan Abbasovun adını səsləndirib ona dəstək oldular.
* Son dəqiqələrdə sarı vərəqə ilə cəzalanan Şəhriyar Əliyev çox əsəbləşdi. Çünki o limiti keçdiyi üçün növbəti oyunu buraxacaq. Müdafiəçi bu üzdən oyun bitəndən sonra da hakimə etirazı davam etdirdi.

İLKİN SULTANLI