Misli premyer-liqasının yeni mövsümünün ilk oyunu ötən il olduğu kimi, yenə “Dalğa”da keçirildi.

Özü də sərin və yağışlı yay günündə. Daha bir qəribəlik bölgə təmsilçilərinin Bakıda üz-üzə gəlməsi idi - "Araz-Naxçıvan" "Turan Tovuz"u sınağa çəkirdi.

Azər Bağırovun 4-5-1 sxemi ilə meydana çıxardığı naxçıvanlılar ilk dəqiqələrdən özünü debütant kimi aparmır, premyer-liqanın daimi sakini kimi oynayırdı. 

Ayxan Abbasov isə ənənəvi sxemə sadiq qalmışdı. Tovuzlular meydana 5-3-2 düzülüşü ilə çıxmışdı. Oyunun əvvəllərində onlarda həyəcan hiss olunurdu. Ən çox da Miller təntiyirdi. Naxçıvanlılar ilk 30 dəqiqədə üç real qol imkanından yararlana bilmədi. Lakin fasiləyə yaxın tovuzlular toparlanmağa başladı. Fasilədən sonra isə Ayxan Abbasovun təcrübəsi özünü göstərdi. Paltardəyişmə otağından qayıdan komanda premyer-liqanın debütantına yerini göstərdi. Runi Evanın əvəzinə böyük ümidlərlə transfer olunan Petkov 53-cü dəqiqədə uzaqdan zərbə ilə hesabı açdı. Düzdü, qolda naxçıvanlıların qapıçısının böyük səhvi var idi. Hesab açılandan sonra tovuzlular müdafiəyə çəkilmədi. Abbasov komandadan ikinci qolu tələb edirdi. Ardıcıl hücumların fonunda 68-ci dəqiqədə Oto Con fərqləndi. Bukviçin kobud səhvi naxçıvanlılara baha başa gəldi. 

Azər Bağırovun komandasında dağınıqlıq hiss olunurdu. Oyunçular fərdi baxımdam pis deyildi, amma komanda şəklində işlər qaydasında getmirdi. "Turan Tovuz" da bundan məharətlə yararlandı. Oyunda son nöqtəni də Petkov qoydu. Ayxanın möhtəşəm ötürməsini qəbul edən bolqarıstanlı naxçıvanlıları 2-ci dəfə məyus etdi. Beləliklə, "Turan Tovuz" mövsümə fırtına kimi başladı.

İLKİN SULTANLI

Gözdən qaçmadı

* İlk tur olsa da, bayraqasma mərasimi keçirilmədi. Azərbaycan Respublikasının Dövlət Himni səsləndirildi. Lakin PFL himnimizi tam fərqli və maraqlı tərzdə aranjiman etdirmişdi.
* 35-ci dəqiqədə Marandiçi ilə Orxan Əliyev toqquşdu. Azərbaycanlı futbolçunun başı qanasa da, o, oyunu sarğı ilə davam etdirdi.
* "Turan Tovuz" hesabı açanda Ayxan Abbasov azarkeşlərinə tərəf qaçaraq sevindi. Kamal Bayramov baş məşqçini qucaqlayaraq təbrik etdi. Ayxan bəy ikinci qolu da çılğın şəkildə qeyd etdi. O, yenə Kamala tərəf yönələrək qolkiperi qucaqladı.
* Petkovun dublundan sonra "Turan Tovuz"un ehtiyat oyunçular skamyasına baxmaq maraqlı idi. Masajçıdan məşqçilərə kimi hamı özünü xoşbəxt hiss edirdi.