Qərb derbisinin Qəbələdə keçirilməsi qəribə idi.

Buna baxmayaraq, hər iki komandanın azarkeşləri görüşün maraqlı keçməsinə səbəb oldu. Matça fəal başlayan nominal meydan sahibləri ilk təhlükəli hücumda hesabı açdı. Rəqibi əks-hücumda yaxalayan Tərlan Əhmədovun komandası Şuaybunun sayəsində önə keçdi. “Turan Tovuz” 1 dəqiqə sonra bərabərlik qolunu vura bilərdi. Lakin Runi qapı önündə topa toxuna bilmədi. Komandalar ilk hissədə baxımlı oyun nümayiş etdirirdi. “Turan Tovuz” üçün oyunun “qırılma anı” 38-ci dəqiqəyə təsadüf etdi. Piruzi topa əla müdaxilə etdiyi üçün meydandan qovuldu. Bu epizoddan sonra “Kəpəz” ikinci qolu da vurdu. Xvalkonun başla zərbəsi qapıdan keçdi. Lakin yan xətt hakiminin bayrağı havada idi.

Fasilədən sonra da “Kəpəz” hücumları davam etdirdi. Gəncəlilər ikinci qolu vuraraq rahatlamaq istəyirdi. Amma futbolçularda dəqiqlik çatmırdı. Matçın sonlarına doğru isə azlıqda qalan “Turan Tovuz” hücumlarının sayını artırmağa başladı. Lakin bu cəhdlər nəticə vermədi və “Kəpəz” cari mövsümdə Qərb derbisində ilk qələbəsini Qəbələdə qazandı.

Gözdən qaçmadı
* Gəncədən gələn azarkeşlər matçın başlamasına 5 dəqiqə qalmış stadiona daxil oldu. Qol vurularkən isə media sektorunun önündəki tribunadan azarkeşlər İlqar Nadirini səsləyib salamladı.
* Oyun bitən kimi futbolçular arasında dava düşdü. Martins qələbə sevincini Tərlan Əhmədlinin qarşısında ədəbsiz şəkildə qeyd etdi. Bundan sonra oyunçular bir-birinə girdi. Baş məşqçilərin və ehtiyat oyunçuların müdaxiləsinə baxmayaraq, qarşıdurma 10-15 dəqiqə davam etdi.
* Futbolçular arasında söz-söhbət sonra da davam etdi. Kamal Bayramov Yusif Nəbiyevi yanına çağırdı. Onlar bir kənarda söhbətləşərkən “Kəpəz”in mühafizə xidmətinin rəhbəri Elmar Vəliyev müdaxilə etdi. Bundan sonra ara yenə qarışdı. Ətrafdakılar və polislər söz-söhbətin böyüməsinə imkan vermədi. Özünü yetirən Nadir Nəbiyevlə Ayxan Abbasov futbolçuları avtobusa mindirdi.