Tərəflər oyuna ehtiyatlı başladı. Mübarizə top saxlamaq uğrunda getdi. Amma dəqiqələr irəlilədikcə meydan sahibləri üstünlüyü ələ keçirməyə başladı.

7-ci dəqiqədə Marandiçinin cərimə zərbəsindən qapı önünə asmasına Pusi istənilən kimi toxuna bilmədi. Amma top Natanın önünə yuvarlandı və bu futbolçu hesabı açdı. Meydan sahiblərinin qol sevinci uzun çəkmədi. Cəmi 4 dəqiqə sonra Murata iti bucaq altında yer alan Kamranı “gördü” ki, ikinci dəqiq zərbəylə tarazlığı bərpa etdi. "Kimyaçılar"ın cavab qolundan sonra mübarizə yenidən meydanın mərkəzinə daşınsa da, qonaqlar daha səliqəli oynamaqla nisbi üstünlüyə malik idi.

"Turan Tovuz"da xətlərarası əlaqədə problemlər görünürdü. Lakin 33-cü dəqiqədə meydan sahibləri yenidən hesabda önə çıxdı. Şəhriyar uzun ötürməylə Runini tapdı, kamerunlu forvard qarşısıalınmaz zərbəylə İlnuru məyus etdi. Bundan sonra "kimyaçılar" hesabı bərabərləşdirmək üçün irəli atıldı. Xaçayevin cərimə meydançasına asmasına yüksələn Vüsal bərbad zərbə vurdu. 42-ci dəqiqədə isə tovuzluların heyətində Marakvelidze zədələnərək yerini Turan Vəlizadəyə verdi.

Hissənin sonunda Todor Kamranı zərbə mövqeyinə çıxarsa da, qapıçı seyv edərək hesabın dəyişməsinə imkan vermədi.
Meydan sahibləri ikinci hissəyə əvəzetmələrlə başlasa da, yenə hər iki komandanın ifasında ehtiyatlı oyun izlədik.

55-ci dəqiqədə isə Muratanın cərimə meydançasına asması zamanı Oduva əllə oynadı. Baş hakim epizodu VAR-da dəqiqləşdirəndən sonra “nöqtə”ni göstərdi. Topa yaxınlaşan Karioka dəqiq oldu. Qonaqlar bundan sonra da təzyiqi davam etdirdi. 68-ci dəqiqədə Şəhriyar Əliyev kobud səhvə yol verdi. Topu ələ keçirən Kamran isə bir qədər irəlilədikdən sonra Kamalı məyus etməklə özünün 2-ci, komandasının 3-cü qolunu vurdu. Samir Abasovun komandası yenə müdafiəyə çəkilmədi.

Bir epizodda Muratanın zərbəsini qapıçı tutdu. Son 10 dəqiqədə isə meydan sahibləri rəli atıldı. Öncə Ayxan, sonra Marandiçi hədəfə düşə bilmədi. Uzatma dəqiqələrində isə Vüqar Mustafayev Cavid Tağıyevə qarşı aşkar kobud oynadı. Referi əvvəlcə sarı vərəqə göstərdi. Amma VAR otağından gələn xəbərdarlıqdan sonra qayda pozuntusuna bir daha göz gəzdirdi və "kimyaçılar"ın vitse-kapitanını meydandan qovdu.

Hakimin final fiti "Sumqayıt"ın vacib qələbəsini rəsmləşdirdi.

Gözdən qaçmadı
* Oyunu izləyənlər arasında Vurğun Hüseynovun atası Tofiq Hüseynov da vardı.
* Stadionda yeni elektron tablo quraşdırılmışdı və qurğu bu oyunda ilk dəfə işə salındı.
* YAŞAT Fondu, “Turanbank” və ASAN könüllülərinin dəstəyi ilə şəhid övladları oyunu izləmək üçün dəvət edilmişdi.
* 31 mart – Azərbaycanlıların Söyqırım Günü ilə bağlı start fitindən öncə birdəqiqəlik sükut elan olundu.
* Rəşad Əhmədov 55-ci dəqiqədə ehtimal olunan penaltini dəqiqləşdirmək üçün VAR-a müraciət edərkən onun 2-3 addımlığında meydan sahiblərindən Eltun, Şəhriyar, qonaqlardan isə Vurğunla Vüsal yer alırdı. Eltun onsuz da narazı olan tovuzlu azarkeşləri referini daha fəal şəkildə fitə basmağa səslədi.