Qış transfer dönəminə fəal başlayan ''Fənərbaxça''dan transfer xəbəri var.

Bir neçə gün öncə 3,6 milyon avroya ''Adana Dəmirspor''dan Samet Akaydını heyətinə qatan İstanbul nəhəngi həm İsmayıl Yüksəkin müqaviləsini yeniləyib, həm də Armindo Brumanı daimi əsasda transfer edib. İsmayıl Yüksəklə 2027-ci ilə qədər yeni müqavilə imzalanıb. Onun illik maaşı isə 40 dəfə artırılaraq 250 min lirədən 10 milyon lirəyə çatdırılıb! 23 yaşlı dayaq yarımmüdafiəçisi 2020-ci ildən komandadı. Sadəcə o, əvvəlki iki mövsümü ''Adana Dəmirspor'' və ''Bursaspor''da icarədə keçirmişdi. Amma ötən yay Jorje Jezuşun diqqətini çəkərək komandada qalan və bu mövsüm ''Fənər''də 16 rəsmi oyuna çıxaraq 1 qol vuran İsmayıl artıq Türkiyə yığmasına da dəvət alır. Brumaya gəlincə, daha öncə ''Qalatasaray''da oynamış portuqaliyalı vinger mövsümün əvvəlində Jezuşun tələbi ilə PSV-dən birillik icarəyə götürülmüşdü. Amma onun üçün işlər qaydasında getməmişdi. Bruma özünü göstərə bilməyərək 5 rəsmi oyunda 1 məhsuldar ötürmə ilə fərqlənmiş və daha sonra zədələnərək 1-2 aylığa sıradan çıxmışdı. Həmin vaxt komandada legionerlərin sayı limiti aşdığına görə rəhbərlik ilk dövrə üçün Brumanın müqaviləsini dondurmaq qərarına gəldi. Yəni 28 yaşlı oyunçu avqustun ortalarından bu yana heç bir rəsmi oyuna çıxmayıb. Amma ''Fənər'' ilə PSV arasındakı müqaviləyə məcburi transfer maddəsi qoyulmuşdu. Yəni istanbullular istənilən halda bu oyunçunu daimi əsasda transfer etməli idilər. Rəhbərlik məsələni mövsümün sonuna saxlamayıb elə indi bitirmək qərarına gəldi. Bruma 4,25 milyon avroya ''Fənər''in daimi oyunçusunu çevrildi və onunla ''2,5+1'' illik müqavilə imzalandı. İndi portuqaliyalının özünü göstərə bilməsi üçün bu transfer dönəminin sonuna qədər vaxtı var. Əks halda ''Fənər'' onu başqa kluba icarəyə verəcək.