Seçmə turnirə çox yaxşı start verən Çexiya yığması qrupda ikinci dəfə xal itirdi. Yaroslav Şilyavının komandası üçün Albaniya ilə ev oyunu heç də asan keçmədi.

"Football-plus.az" xəbər verir ki, Albaniya millisi liderdən əbəs yerə yalnız bir xal geridə olmadığını əyani göstərdi. Doğrudu, Praqada keçirilən matçda ev sahiblərinin üstünlüyü aşkar görünürdü. Çexlərin qapıya endirdikləri 11 zərbədən yalnız 4-ü dəqiq alındı. Hər bir halda qapıçı Berişa zərbəni dəf etməyi bacardı. Nəhayət, Çernı, 56-cı dəqiqədə meydan sahiblərinin layiq olduğu qolu vurmaqla hesabı açdı. Lakin slavyanların sevinci yalnız 10 dəqiqə çəkdi: Bayrami albanların cavab qolunu vurdu. Bu, qonaqların oyun ərzində qapıya endirdikləri yeganə dəqiq zərbə idi. Şilyavının komandası qalan vaxtda yetərincə hücum qursa da, hesabı dəyişə bilmədi. Praqada qeydə alınan “sülh” komandaların cədvəldəki mövqeyini dəyişmədi.

İlk iki yerə əsas namizədlərdən sayılan Polşa yığması seçmə turnirdəki ilk 3 oyunun ikisində məğlub olmuşdu. DÇ-2022-nin 1/8 finalçısı üçün Farer adaları ilə matç dönüş nöqtəsi ola bilərdi. Varşavada keçirilən oyunda gözlənilməz nəticə qeydə alınmadı. Fernando Santuşun komandası ilk dəqiqələrdən böyük üstünlüyə malik oldu. Amma adalıların müdafiə xətti ümumilikdə yaxşı təsir bağışlayırdı. Ən çətin anlarda isə Laumhauqe qapısını toxunulmaz saxlaya bilirdi. Qonaqlar güclü rəqibi qarşısında 2-ci hissənin ortalarına qədər tab gətirə bildilər. Nəhayət, 73-cü dəqiqədə cərimə meydançasında qayda pozuntusuna yol verdilər və Levandovski penalti ilə hesabı açdı. “Barselona”nın hücumçusu 10 dəqiqə sonra Sviderskinin ötürməsi ilə adalıların heç-heçəyə olan ümidinin üstündən xətt çəkdi. Robertin milli formada meydana çıxdığı 143-cü oyunda qollarının sayını 81-ə çatdırdığını qeyd edək. Onun formasını 2008-ci ildən daşıdığı Polşa yığması qrupda xalını 6-ya çatdırmaqla 3-cü yerə yüksəldi.

E qrupu
Çexiya – Albaniya 1:1 (0:0)
Çexiya: Pavlenka, Tsoufal, Brabets, Holeş, Kreyçi (Xitil, 86), Provod, Souçek, Kral, Çernı (Qlojek, 71), Kuxta (Yureçka, 71), Çvançara (Linqr, 87).
Albaniya: Berişa, Hüsay, Cimşiti, İsmayli, Mitay, Ramadani, Bayrami (Qyasula, 85), Asllani (Bare, 65), Asani (Muya, 70), Çikalleşi (Daku, 59), Seferi (Uzuni, 84).
Qollar: Çernı, 56 (1:0). Bayrami, 66 (1:1).
Vərəqələr: Asani, 52. Bayrami, 67. Provod, 90+6. Xitil, 90+7 - sarı.
Hakim: Entoni Teylor (İngiltərə).
7 sentyabr. Praqa. 18641 tamaşaçı.
Polşa - Farer adaları 2:0 (0:0)
Polşa: Şçensnı, Bereşinski (S.Şimanski, 59), Kendzyora, Bednarek, Kiver, Skuras (Vşolek, 46), Kaminski (Qrositski, 88), Krıxovyak (D.Şimanski, 80), Zyelinski, Levandovski, Milik (Sviderski, 59).
Farer adaları: Laumhauqe, O.Fere, Nattestad, Askham, V.Davidsen, Q.Vatnhamar (Radosavlyeviç, 88), S.Vatnhamar, Byartalid (Hendriksson, 61), Yoensen (Danielsen, 74), Sorensen (Andreasen, 74), Simun Edmundsson (K.Olsen, 62).
Qollar: Levandovski, 73-p. (1:0). Levandovski, 83 (2:0).
Vərəqələr: Krıxovyak, 22. Nattestad, 58. Vşolek, 90 - sarı.
Hakim: David Şmayts (Sloveniya).
7 sentyabr. Varşava. 54129 tamaşaçı.
1. Çexiya 4 2 2 0 7-2 8
2. Albaniya 4 2 1 1 6-3 7
3. Polşa 4 2 0 2 6-6 6
4. Moldova 4 1 2 1 4-5 5
5. Farer adaları 4 0 1 3 2-9 1
10 sentyabr: Albaniya – Polşa, Farer adaları - Moldova.