Argentina çempionatında martın 10-13-ü aralığında keçirilən 7-ci turun oyunlarından sonra turnir cədvəlində ikihakimiyyətlilik pozuldu. Artıq liqanın bir lideri var. Diqqəti daha çox cəlb edən fakt tur ərzində keçirilən 14 oyundan 8-nin heç-heçə, 7-nin isə 1:1 hesabı ilə başa çatması oldu.

"Football-plus.az" xəbər verir ki, şərikli liderlərdən olan və tura topların daha yaxşı fərqinə görə 1-ci yerdə başlayan “Defensa y Xustisiya” evdə xal itirdi. Doğrudu, rəqib heç də asan deyildi. “Talyeres de Kordoba” tura liderlərdən yalnız bir xal geri qalmaqla 4-cü yerdə başlamışdı. Florensio Varela şəhərindəki matçda qarşılıqlı qollar qeydə alındı. 1:1 hesablı “sülh”ə görə iki xal itirən “Defensa y Xustisiya” 3-cü pilləyə düşərkən “Talyeres de Kordoba”nın mövqeyi dəyişmədi.

Turu “San Lorenso” üçün düşərli saymaq olar. Paytaxt klubunun əsas izləyiciləri xal itkisindən qaça bilmədilər. “Göy-qırmızılar” isə evdə “Ximnasiya”nın qapısından 4 cavabsız top keçirdi. Maraqlıdı ki, onlar mövsümün ilk 6 turunda rəqib qapılarına 6 dəfə yol tapa bilmişdilər. “Ximnasiya” ilə oyunun hesabına rəqib müdafiəçi Enrikenin 16-cı dəqiqədə qırmızı vərəqə almasının da təsiri oldu. İnamlı qələbə “San Lorenso”nu vahid liderə çevirdi.

Tura 3-cü yerdə başlayan “Atletiko Urakan”ın məğlubiyyətsiz seriyası qırıldı. Paytaxt komandası “Estudiantes”lə səfər oyununda 1:2 hesabı ilə uduzdu. Bununla da çempionatda məğlub olmayan qalmadı. İlk uğursuzluq “Atletiko Urakan”ı 6-cı yerə saldı.

Mövsümə ardıcıl 4 qələbə ilə başlayandan sonra iki dəfə uduzan “Lanus” yenə xal itirdi. Frank Kudelkanın komandası bu dəfə “Belqrano” ilə səfər oyununda bir xal qazana bildi – 0:0.

Liderlər qrupundakı əksər komandaların büdrəməsi “River Pleyt”in də işinə yaradı. Ölkə çempionatının bürünc mükafatçısı “Qodoy Krus”un qapısından üç cavabsız top keçirdi. Martin Demiçelisin komandası ardıcıl ikinci, son 5 oyunda isə 4-cü qələbə ilə bir xal geri qaldığı liderin əsas izləyicisinə çevrildi.

“Milyonçular”ın əzəli rəqibinin işləri, yumşaq ifadə etsək, yaxşı getmir. Son çempion “Boka Xuniors” bu mövsüm heç də statusuna layiq nəticə göstərə bilmir. Uqo İbarranın komandası üçün “Banfild”ə qarşı səfər oyununun uğurlu alınacağını düşünmək olardı. Ev sahibləri mövsümün ilk 6 turunda yalnız 3 xal qazanmaqla sonuncu yerdə idilər. Amma çempiondan maksimum xal almağı bacardılar. “Boka” topa böyük ölçüdə (67 faiz) nəzarət etsə də, qapıya dəqiq zərbələr üzrə rəqibindən 2:6 hesabıyla geri qaldı. Nəticəni müəyyənləşdirən yeganə qolu 28-ci dəqiqədə Kuyros vurdu. Hesab 5 dəqiqə əvvəl də açıla bilərdi. Amma “Banfild”in hücumçusu Çaves penalti şansını boşa verdi. Çox keçmədən istəyinə çatan meydan sahibləri çempiona, necə deyərlər, yağlı sillə vurdular. Son iki oyunda bir xal qazanan “Boka Xuniors” birpilləlik geriləmə ilə 8-ci yerə düşdü.
Çempionun yerinə isə “Rasinq” yüksəldi. Bu mövsüm qeyri-sabit çıxış edən son mövsümün vitse-çempionu “Sarmyento”nu bir qolla məğlub etdi. Minimalhesablı qələbə Fernando Qaqonun komandasını 16-cı yerdən 7-yə çıxardı.