"Qarabağ" səfərdə çətin qələbə qazanaraq işini 70-80 faiz həll etmişdi.

Düzdü, bir çoxları ağdamlıların Cəbəllütariq təmsilçisini asan üstələyəciyini düşünmürdü. "Köhlən atlar"ın BOS-da qələbəyə həsrət qalması da məsələni qəlizləşdirirdi. Qurban Qurbanov da ilk oyundakı heyətlə müqayisədə iki dəyişiklik etmişdi. "Rizəspor"a keçəcəyi deyilən Medina ilə gənc Nəriman ehtiyatda qalmışdı. Onların yerinə meydanda Bədavi və Benzya mübarizə aparırdı. Fransalının ilk "11-lik"də meydanda olması Andradenin sağ cinaha keçməsini şərtləndirmişdi.

Oyun ağdamlıların böyük üstünlüyü şəraitində başladı. İlk 5 dəqiqə ərzində top rəqib futbolçuların, demək olar ki, ayağına dəymədi. İlk qolu çox gözləmədik. 7-ci dəqiqədə ağdamlılar hesabı açdı. Sağ cinahdan Andradenin ötürməsini Zubir dəqiq zərbə ilə tamamladı. Qoldan sonra "köhlən atlar" hücumları davam etdirdi. 25-ci dəqiqəyə kimi qonaq komanda meydan sahiblərinin qapısı istiqamətində gələ bilmədi. Cəbəllütariq təmsilçisinin ilk hücumu isə yarım saatın tamamına təsadüf etdi. Mandinin zərbəsi qeyri-dəqiq alındı. Bu epizodda Elvinin səhvi və uşaq kimi aldanması da gözdən qaçmadı. Bundan sonra ağdamlılar yenə üstünlüyü ələ aldı. 32-ci dəqiqədə Benzyanın zərbəsinin qarşısını son anda qolkiper çətinliklə aldı. 38-ci dəqiqədə isə Cicanın başla qapadığı top Deylin üstünə getdi. Bir qədər sonra qolkiper yenə diqqət mərkəzinə düşdü - Andradenin zərbəsinin qarşısını aldı. İki dəqiqə sonra Benzyanın ideal ara ötürməsini Cica qapıya göndərsə də, top tirdən qayıtdı. Özünü yetirən fransalının zərbəsi qeyri-dəqiq alındı. "Qarabağ", nəhayət, hissənin sonunda istəyinə çatdı. Ardıcıl künc zərbələrindən sonra "Linkoln" tab gətirmədi. Veşoviçin ötürməsini Bəhlul başla qapıya göndərdi. Qoldan sonra oyuna mərkəzdən başlayan Kikenin topu birbaşa qapıya göndərmək istəməsi də maraqlı cəhd idi. Beləliklə, ilk yarı “Qarabağ”ın 2:0 hesablı qələbəsi ilə başa çatdı.

İkinci hissəyə də ağdamlılar üstün başladı. Yenə azarkeşlər qol üçün uzun müddət gözləmədi. 49-cu dəqiqədə tabloda hesab dəyişdi. Cica Leandronun ötürməsindən sonra topu tora göndərdi. Düzdü, əvvəlcə yan xətt hakimi bayrağını havaya qaldırdı. Lakin VAR-ın müdaxiləsindən sonra qol qeydə alındı.

60-cı dəqiqəyə kimi ağdamlılar rəqibin rahat oynamasına imkan vermədi. Bəzən qonaqlar əks-hücumlarda nəsə etməyə çalışırdı. 61-ci dəqiqədə Brittonun zərbəsinin qarşısını Şahruddin rahat aldı. Az sonra isə ağdamlılar fərqi artırdı. Zubirin ötürməsini Yankoviç qüvvətli zərbə ilə tora qovuşdurdu.

Hesab 4:0 olandan sonra “Qarabağ” çox rahat oynamağa başladı. Qurban Qurbanov da vəziyyətin belə olduğunu görərək ehtiyatda olan 3 futbolçunu meydana buraxdı. Artıq hücum xətti tam dəyişmişdi. Keyta solda, Diakabi sağda, Nəriman mərkəzdə mübarizə aparırdı. Tural isə uzun müddətdən sonra rəsmi matçda müdafiənin sağında oynayırdı. Qarşılaşmanın sonuna kimi hər iki komanda cəhdlər etsə də, fərqlənmək mümkün olmadı. Beləliklə, “Qarabağ” "Linkoln Red İmps"i ümumilikdə 6:1 hesabıyla məğlub edərək mərhələ adladı. Cəbəllütariq çempionu "Qarabağ"dan həm güc, həm də səviyyə baxımından aşkar zəif idi. Qurbanovun komandasının əsl gücü Polşa çempionu "Rakuv"la oyunlarda bilinəcək. İlk oyun iyulun 26-da səfərdə keçiriləcək.

İLKİN SULTANLI