Braziliya çempionatında mövsümün ilk dövrəsi başa çatmaq üzrədi.

"Football-plus.az" xəbər verir ki, avqustun 5-7-si aralığında 18-ci turun oyunları keçirildi. Qeydə alınan nəticələrə nəzər salarkən liderlər qrupundakı 4 komandanın qələbə qazana bilməməsi diqqəti ilk növbədə cəlb edir. Qələbə nədi, tura cədvəlin ilk 4 sırasında başlayan komandaların ümumi qazancı 1 xal oldu. Yeganə xalı isə “Botafoqo” qazandı və nəticədə liderlə əsas izləyicisi arasındakı xal fərqi bir az da artdı.

16-cı turun “Santos”la səfər oyununda (2:2) cari mövsümdə heç-heçəyə ilk dəfə razılaşan “Botafoqo” üçün Belu Orizonte səfəri də çətin alındı. Yerli “Kruzeyro” mövsümün ilk 9 ev oyunundan 5-də məğlub olmuşdu. Bu fakta baxmayaraq, meydan sahibləri liderə çətin anlar yaşatdılar. Oyun planında aşkar üstünlüyə malik olan “Kruzeyro”lular qələbə üçün əlindən gələni etdilər. Lakin qapıya endirilən 11 zərbədən heç biri onlara sevinc gətirmədi. 4 epizodda isə rio de janeyroluları Lukas Perri xilas etdi. 25 yaşlı qapıçı seyvləri ilə komandasının liderliyini bir qədər də möhkəmləndirdi. “Botafoqo”nun Bruno Lajenin rəhbərliyi altında A seriyasında keçirdiyi 5-ci matçda 2-ci dəfə rəqibi ilə “sülh bağladığını” və 3 dəfə qələbə qazandığını da qeyd edək.
Qeyd etdiyimiz kimi, liderin cədvəldəki yeri bir qədər də gücləndi. Tura “Botafoqo”nun əsas izləyiciləri kimi hərəyə 31 xalla başlayan hər iki komanda hesabına xal yaza bilmədi. “Kuyaba”nın qonağı olan “Flamenqo” topa 58 faiz nəzarət etsə də, qalan əsas statistik göstəricilər üzrə rəqibindən geri qaldı. İlk hissədə hesab açılmadı. Amma Xorxe Sampaolinin komandası fasilədən sonra ev sahiblərinin hücumları qarşısında aciz qaldı. 3 cavabsız qolla məğlub olan “Flamenqo” liderdən 13 xal geri düşdü. “Kuyaba”nın ardıcıl 4-cü qələbə ilə yüsəlişdə olduğunu da qeyd edək. Amma Sampaolinin komandası 2-ci yerdəki mövqeyini itirmədi.

“Palmeyras” bu mövsüm heç cür sabit oyun sərgiləyə bilmir. Əvvəlki iki turda qələbə qazanan son çempion azarkeşlərinə yenə məyusluq yaşatdı. Doğrudu, Abel Ferreyranın komandası çətin səfərə çıxmışdı. Bu mövsüm evdəki ilk 9 matçda uduzmayan (6 qələbə, 3 heç-heçə) “Fluminense” oyun planında rəqibini üstələməsə də, maksimum nəticəyə nail oldu. İlk bir saatlıq mübarizədə Aryas ilə Con Kennedinin qolları ev sahiblərinin qələbəsini təmin etdi. Yalnız son saniyələrdə təsəlli qolunu vuran “Palmeyras” da liderdən 13 xal geri və 4-cü yerə düşdü. Eyni zamanda Braziliya yığmasını çalışdıran Fernando Dinizin komandası isə vacib qələbə ilə 3-cü yerə yüksəldi.

Belə desək, bu mövsüm hamı “Botafoqo”nun liderliyi üçün çalışır! Tura 4-cü yerdə başlayan “Qremio” da hesabına xal yaza bilmədi. Renato Qauşunun komandası “Vasku da Qama”ya qarşı səfər oyununda yeganə qolla məğlubiyyətə uğradı. “Fluminense” ilə “Braqantino”nun turu qalib başa vurması portu aleqrililərə cədvəldə iki pillə geriləmək bahasına başa gəldi. Amma onların ehtiyatda bir təxirə salınan oyununun olduğunu da bildirək.

Sonda San Pauluda baş verən məqamı da vurğulayaq. Eyniadlı komandanın “Atletiko Mineyro”ya 0:2 hesabıyla uduzduğu matçda hesabı Halk açdı. Bu mövsüm 7-ci qolunu vuran 37 yaşlı hücumçunun cərimə zərbəsi ilə qapıya təxminən 40 metdən yol tapdığı epizodu izləməyə dəyərdi...

18-ci tur
Kruzeyro - Botafoqo RJ 0:0
Kuyaba – Flamenqo 3:0
Mateus Aleşandre, 46. Kleyson, 54. Deyverson, 80.
Fluminense – Palmeyras 2:1
Aryas, 12-p. Con Kennedi, 59 - Qomes, 90+6.
Vasku da Qama – Qremio 1:0
Veqetti, 80.
Santos - Atletiko Paranaense 1:1
Markos Leonardo, 90+6-p. – Pablo, 30.
Qoyas - Fortaleza 1:0
Tobias Figeyredo, 53-öz qapısına.
İnternasyonal - Korintians 2:2
Bruno Enrike, 17. Luis Adriano, 90+9 – Renato Auqusto, 13. Fabio Santos, 86-p.
San Paulu - Atletiko Mineyro 0:2
Halk, 4. Pavon, 69-p.
Koritiba - Braqantino 0:1
Sorriso, 19.
Bayya - Amerika Mineyro 3:1
Everaldo, 26. Kauli, 60. Rafael Ratao, 69 – Mastriani, 52.

1. Botafoqo RJ 18 14 2 2 32-10 44
2. Flamenqo 18 9 4 5 30-23 31
3. Fluminense 18 9 4 5 24-17 31
4. Palmeyras 18 8 7 3 33-17 31
5. Braqantino 18 8 7 3 26-16 31
6. Qremio 17 9 3 5 26-22 30
7. Atletiko Paranaense 18 8 4 6 26-22 28
8. Kuyaba 18 8 4 6 21-19 28
9. San Paulu 18 7 5 6 23-18 26
10. Atletiko Mineyro 18 6 6 6 21-17 24
11. Kruzeyro 18 6 6 6 19-15 24
12. İnternasyonal 18 6 6 6 16-20 24
13. Fortaleza 18 6 5 7 17-19 23
14. Korintians 17 5 5 7 17-20 20
15. Qoyas 18 5 4 9 17-27 19
16. Bayya 18 4 6 8 18-24 18
17. Santos 18 4 6 8 19-27 18
18. Koritiba 18 3 5 10 17-33 14
19. Vasku da Qama 17 3 3 11 13-28 12
20. Amerika Mineyro 17 2 4 11 19-40 10
Bombardirlər: Tikinyo Soares (Botafoqo RJ) - 13, Deyverson (Kuyaba), Vitor Roke (Atletiko Paranaense) - 8, Rocer Gedeş (Korintians), Markos Leonardo (Santos), Halk (Atletiko Mineyro) - 7, Kalyeri (San Paulu), Eduardo Saşa (Braqantino) – 6.