Argentina çempionatının 8-ci turunun oyunlarından sonra lider dəyişdi. Diqqəti daha çox cəlb edən fakt tura ilk 6 yerdə başlayan komandaların hesabına yalnız 4 xal yaza bilməsi oldu. Bu baxımdan turu “River Pleyt” üçün çox düşərli saymaq olar.

7-ci turdan sonra vahid liderliyi ələ alan “San Lorenso” evdə maksimum nəticə əldə edən yeganə komanda olsa da, rəqib meydanlarında heç də güclü təsir bağışlamır. Ruben İnsuanın komandası “Nyuellz Old Boyz” ilə səfər matçında əsla liderə bənzəmədi. Doğrudu, ev sahibləri oyun ərzində qapıya yalnız iki dəqiq zərbə endirə bildilər. Amma onlardan biri 77-ci dəqiqədə qolla nəticələndi. Paytaxt klubunun qalan vaxtda məğlubiyyətdən qaçmaq üçün etdiyi cəhdlər bəhrə vermədi və “San Lorenso” liderliyi əldən verdi.

“Göy-qırmızılar”ın əsas izləyicisi isə turu maksimum nəticə ilə başa vurdu. “River Pleyt” səfərdə “Sarmyento”nun qapısından iki cavabsız top keçirdi. Ölkə çempionatının bürünc mükafatçısı ardıcıl üçüncü, son 6 oyunda isə 5-ci qələbə ilə bu mövsüm ilk dəfə vahid liderliyə yüksəldi. Liderlər qrupundakı əksər komandaların büdrəməsi Martin Demiçelisin komandasının işinə yaradığını da vurğulayaq.

Belə ki, tura uyğun olaraq 3-6-cı yerlərdə başlayan “Defensa y Xustisiya”, “Talyeres de Kordoba”, “Lanus” və “Atletiko Urakan” hesabına ümimilikdə yalnız bir xal yaza bildilər. Uduzmayan yeganə komanda isə “Lanus” oldu. Amma lanuslular “Arxentinos Xuniors”la evdə qeydə alınan qolsuz heç-heçəyə görə çətin ki, sevinsinlər. Məsələ ondadı ki, Frank Kudelkanın komandası mövsümə ardıcıl 4 qələbə ilə başlayandan sonra keçirdiyi 4 oyunda yalnız 2 xal qazana bilib.

Son çempionun vəziyyəti getdikcə pisləşir. “Boka Xuniors” bu mövsüm heç cür statusuna layiq nəticə göstərə bilmir. Uqo İbarranın komandası evdə “İnstituto”dan xal ala bilmədi. Debütanta 2:3 hesabıyla uduzan ölkə nəhəngi ardıcıl 2-ci, cari mövsümdə isə 3-cü məğlubiyyətini aldı. Son üç oyunda yalnız bir xal qazanan çempion 6 pilləlik geriləmə ilə 14-cü yerə düşdü.

“Rasinq” isə mövsümə uğursuz startını artıq unutdura bilib. Son mövsümün vitse-çempionu “Union”u 3:1 hesabıyla məğlub etdi. Səfər qələbəsi Fernando Qaqonun komandasını 7-ci yerdən 4-ə çıxardı.