Oyuna baxmayıb nəticəyə görə mülahizə yürüdən istənilən şəxs “Sabah”ın “Sumqayıt”ı yıxıb-sürüdüyünü düşünə bilər. Ancaq “kimyaçılar” səfərdə “bayquşlar”la, demək olar ki, başa-baş mübarizə apardılar. Lakin meydan sahiblərindən fərqli qonaqlar yaxaladıqları qol imkanlarından yararlana bilmədilər. Xüsusilə ilk yarıda azarkeşlər bərabərsəviyyəli oyuna tamaşa etdilər.

Murad Musayevin komandası hissənin sonunda vurduğu qolu nəzərə almasaq, “Sumqayıt”ın qapısı önündə təhlükə yarada bilməmişdi. Yalnız Kristian da Silvanın 32-ci dəqiqədəki zərbəsi yadda qaldı ki, onda da top cüzi fərqlə dirəyin yanından keçdi. 45-ci dəqiqədə “Sabah”ın nadir hücumlarından biri qolla nəticələndi. Ələskərovun cinahdan cərimə meydançasına ötürməsini Mikels dəqiq tamamladı. Adətən, fasilə ərəfəsində qapısında qol görən komanda psixoloji cəhətdən sınır, qalan dəqiqələrdə toparlana bilmir. Ancaq “Sumqayıt” ikinci yarıya fəal başladı. Qonaqlar ardıcıl hücumlar qursalar da, istədiyinə nail ola bilmirdi. Abubakar 67-ci, Bədəlov 71-ci dəqiqədə yaxın məsafədən “çərçivə”yə düşə bilmədi. Əvəzində meydan sahibləri 75-ci dəqiqədə hesab arasında fərqi iki topa çatdırdı. Kaşuk cərimə zərbəsindən baxımlı qola imza atdı. Bundan 11 dəqiqə sonra əvəzetmədən meydana çıxan Nuriyev adını tabloya yazdırdı. Onun qolunda Apehin müstəsna xidməti oldu. Nigeriyalı forvard ideal ötürmə ilə yarımüdafiəçini zərbə mövqeyinə çıxartdı ki, Ceyhun da güclü zərbə ilə “6-lığ”ı dəqiq nişan aldı. 90-cı dəqiqədə oyuna qoşulan Seymur Məmmədov isə matçda son nöqtəni qoydu.

Gözdən qaçmadı

* 36-cı dəqiqədə Todoroski ilə Letiç arasında narazılıq yaşandı. Serb və makedoniyalı futbolçular dartışsalar da, komanda yoldaşları insidentin böyüməsinə imkan vermədi.
* Texniki nasazlıq səbəbindən VAR-dan istifadə etmək mümkün olmadı.
* Oyundan sonra komandaların düşərgəsində fərqli ab-hava hökm sürürdü. Samir Abasovun futbolçularına uca səslə irad bildirdiyini dəhlizdə eşitmək mümkün idi. “Sabah”ın paltardəyişmə otağından isə ritmik musiqi səsi gəlirdi.
* Oyundan sonra AMADA-nın nümayəndələri hər komandanın iki futbolçusundan test götürdü. Meydan sahiblərindən Kaşukla Seydiyevin dopinq otağına dəvət olunduğunu gördük. “Kimyaçılar”ın analiz verən oyunçularının adlarını isə dəqiqləşdirə bilmədik.