“Zenit” zirvəyə bir qədər də yaxınlaşdı
Tur favoritlərin autsayderləri yenə bilməməsi ilə start götürdü.
"Football-plus.az" xəbər verir ki, cümə günü iddialı ÇSKA Orenburqda, tura lider kimi daxil olan “Krasnodar” isə Voronejdə xal itkisi ilə barışmalı oldu. “Krasnodar”ın 6 tudan 4-də qapısını toxunulmaz saxlaması diqqəti çəkir.
Şənbə gününün açılış oyununda “Ural” Sankt-Peterburqda pərən-pərən düşdü. Hərçənd Yekaterinburq təmsilçisi bu oyuna qədər uduzmamışdı və tura 2-ci pillədə daxil olmuşdu. Buna baxmayaraq, “Ural”ın “Zenit” üçün ən asan rəqib olması faktı növbəti dəfə təsdiqini tapdı. İlk 5 tura 3 top buraxan Viktor Qonçarenkonun komandası bu dəfə 68 dəqiqəyə 4 top buraxdı. Ardıcıl 3-cü qələbə ilə 2-ci pilləyə yüksələn “Zenit” çempionat çərçivəsində bu rəqibə qarşı keçirdiyi 25-ci oyunda da uduzmadı (21 qələbə, 4 heç-heçə)! Bu, turnirin rekordudu. Buna qədər elitada bir komandanın digərinə ilk 25 matçda uduzmaması faktına rast gəlinməmişdi. Sergey Semak bu tur məşqçi kimi Rusiya çempionatında 200-cü oyununu keçirdi. O, bu matçlardan 157-ni “Zenit”in, 43-nü “Ufa”nın başında keçirib. Onun komandaları 600 mümkün xalın 68,3 faizini, yəni 410-nu toplayıb (121 qələbə, 47 heç-heçə, 32 məğlubiyyət). İlk 200 oyunda toplanılan xalların faiz nisbətinə görə Semak yalnız Oleq Romantsevdən (68,6) geri qalır. “Dinamo”nun 3 oyunluq qələbə seriyası Kazanda başa çatdı. Fasiləyə geridə yollanan və 56-cı dəqiqədən azlıqda oynayan Moskva təmsilçisi özündə güc tapıb 2 qol vursa da, son saniyələrdə qələbəni əldən verdi. “Spartak” isə heç cür özünə gələ bilmir. Mövsümə 3-ü çempionat, 2-si kubokda olmaqla 5 rəsmi oyunda qalib gələrək başlayan və tarixinin ən uğurlu startını reallaşdıran Moskva nəhəngi indi də qələbəsiz seriyanı artırmaqla məşğuldu. “Ural” və “Zenit”lə oyunlardakı məğlubiyyətlərdən sonra Gilyermo Abaskalın komandası bu dəfə evdə “Axmat”la qolsuz bərabərliyə qaldı. Buna qədər 7 rəsmi oyuna 15 top buraxan “Spartak” bu mövsüm ilk dəfə qapısını toxunulmaz saxladı. “Rostov” sanki səfərdə lənətlənib. Rusiya yığmasının baş məşqçisi Valeri Karpinin çalışdırdığı bu kollektiv ötən mövsümü də nəzərə almaqla ardıcıl 6-cı səfər oyunundan xalsız ayrıldı! Dzyubanın oynamadığı son 2 turda xal itirən “Lokomotiv” bu dəfə “Soçi” səfərindən çətin qələbə ilə ayrıldı. Dzyuba heyətə qayıdan kimi hesabına məhsuldar ötürmə yazdı.
6-cı tur
Zenit – Ural 4:0
Sergeyev, 8. Kassyerra, 30; 68. Klaudinyo, 45+1.
Zenit: Kerjakov, Fernandes (Sutormin, 68), Karavayev, Alip (Kovalenko, 75), Santos, Kruqovoy, Barrios, Vendel (Bakayev, 90+1), Klaudinyo (Du Keyroş, 75), Sergeyev (Vasilyev, 68), Kassyerra.
Orenburq – ÇSKA 1:1
Vera, 70 - Moyzes, 49.
ÇSKA: Torop, Qlebov (Qayiç, 63), Nababkin, Roşa, Moyzes, Oblyakov (Aqapov, 80), Zdelar, Kuçayev (Mendes, 90+2), Muxin (Davila, 69), Çalov (Feyzullayev, 80), Zabolotnı.
Spartak – Axmat 0:0
Spartak: Selixov, Denisov, Duarte, Cikiya, Ryabçuk, Zobnin, Martins (Medina, 76), Umyarov (Litvinov, 62), Bonqonda (Zinkovski, 76), Promes, Sobolev (İqnatov, 62).
Soçi – Lokomotiv 0:1
Qluşenkov, 57.
Lokomotiv: Lantratov, Nenaxov (Silyanov, 84), Fasson, Morozov, Tiknizyan, Barinov, Karpukas (Maradişvili, 85), Rıbçinski (Pinyaev, 65), Mirançuk, Qluşenkov (Jemaletdinov, 63), Dzyuba.
Fakel – Krasnodar 0:0
Rubin – Dinamo 2:2
Daku, 45+1-p. Fameye, 90+5 – Makarov, 59. Skopintsev, 74.
Nijni Novqorod – Rostov 1:0
Kalinski, 60.
Krılya Sovetov – Baltika 2:1
Babkin, 52. Zotov, 90+1 – Musayev, 88.
1. Krasnodar 6 4 2 0 9-2 14
2. Zenit 6 4 1 1 14-5 13
3. Ural 6 4 1 1 8-7 13
4. Krılya Sovetov 6 3 2 1 14-9 11
5. Dinamo 6 3 2 1 13-11 11
6. ÇSKA 6 3 1 2 13-9 10
7. Spartak 6 3 1 2 12-10 10
8. Lokomotiv 6 2 3 1 10-9 9
9. Axmat 6 2 1 3 9-8 7
10. Nijni Novqorod 6 2 1 3 3-5 7
11. Rostov 6 2 1 3 7-12 7
12. Soçi 6 2 0 4 8-8 6
13. Rubin 6 1 3 2 8-13 6
14. Fakel 6 1 1 4 5-10 4
15. Baltika 6 1 0 5 4-10 3
16. Orenburq 6 0 2 4 4-13 2
Bombardirlər: Kassyerra (Zenit) – 6. Çalov (ÇSKA) – 4.
Növbəti turun oyunları sentyabrın 2-3-də keçiriləcək: Ural – Axmat, Nijni Novqorod – Rubin, Krılya Sovetov – Fakel, Krasnodar – Spartak, Orenburq – Soçi, Lokomotiv – Baltika, ÇSKA – Zenit, Rostov – Dinamo.
Oyundan sonra
Sergey Semak, “Zenit”in baş məşqçisi:
“Komandam baxımlı və keyfiyyətli futbol sərgilədi. Oyunçularda özünəinam hiss olunur. Kifayət qədər qol vəziyyəti yaratdıq. Oyundan da, nəticədən də razıyam. 3 müdafiəçili sistem? Bizdə mərkəz müdafiəçiləri ilə bağlı problem yaşanır. Ona görə də bəzən elə oyunçular olur ki, yad mövqelərdə çıxış edirlər. 3 müdafiəçili sistemin bizə daha uyğun gəldiyini və daha etibarlı olduğunu düşünürəm. Oyunçular yavaş-yavaş formaya düşməyə başlayır. İndi mövsümün əvvəli ilə müqayisədə daha inamlı oynayırıq”.
Gilyermo Abaskal, “Spartak”ın baş məşqçisi:
“Ardıcıl iki məğlubiyyətdən sonra vəziyyəti düzəltməyə çalışdıq. Son oyunlardakı uğursuzluq futbolçuların üzərində müəyyən təzyiq yaradırdı. Bu üzdən tələskənliyə yol verirdik və müdafiədə boşluqlar yaranırdı. Rəqib ilk yarıda pis oynamadı. Bir topları dirəkdən döndü. İkinci hissədə biz daha yaxşı təsir bağışlasaq da, əsas olanı edə bilmədik. Bu cür rəqiblərlə görüşlərdə hesabı nə qədər tez açsan, bir o qədər işin asanlaşacaq. Biz bunu bacarmadıq. Yeganə sevindirici məqam qol buraxmamağımız oldu. Çünki bu mövsüm çox qol buraxırdıq. Hakimliyi yenə bəyənmədim. “Axmat” 23 dəfə qaydanı pozduğu halda onların oyunçularına cəmi 1 sarı vərəqə göstərildi. Bu, necə mümkündü? Rəqib oyunçular istədikləri qədər yerə sərələnib vaxt uzadırdılar. Onlara bir söz deyən yox idi. Enerjimi və vaxtımı belə şeylərə sərf etmək istəmirəm. Çünki onsuz da heç nə dəyişməyəcək”.
Digər xəbərlər
