Ötən həftəsonu Rusiya çempionatında 32-ci mövsümə start verildi.

"Football-plus.az" xəbər verir ki, mövsüm cümə günü “VTB-Arena”da başladı. Çexiyalı mütəxəssis Marçel Liçkanın “Dinamo”nun başında debütü uğursuz alındı. 53 dəqiqəyə 3 qol vuran “Krasnodar” səfərdə oynamasına baxmayaraq, gözlənilmədən asan qələbə qazandı. “Dinamo”nun təsəlli qolunun müəllifi olan Smolov Rusiya çempionatında ümumilikdə 105-ci qolunu vurdu. Turnirin tarixinin ən məhsuldar oyunçuları siyahısında 6-cı pilləyə yüksələn təcrübəli forvard yalnız Dmitri Loskov (120), Dmitri Kiriçenko (129), Aleksandr Kerjakov (139), Oleq Veretnnikov (143) və Artyom Dzyubadan (156) geri qalır.

Turun əsas sürpizi şənbə gününün açılış oyununa təsadüf etdi. Sevimli rəqiblərindən olan “Ural” ilə oyunda favorit sayılan ÇSKA gözlənilmədən Yekaterinburqdan xalsız qayıtmalı oldu. İlk yarının ortalarında Akinfeyevin səhvindən sonra və 2-ci hissənin əvvəllərində penaltidən buraxılan qollar “hərbçilər”i çətin vəziyyətə saldı. Komandanın gücü yalnız fərqi minimuma endirməyə yetdi. “Ural” 1995-ci ildən bəri ilk dəfə ÇSKA-nı məğlub edərək bu rəqibə qarşı 23 oyunluq qələbəsiz seriyaya son qoydu! Onu da bildirək ki, Akinfeyev Rusiyanın elitasında 21-ci mövsümünü keçirir. Bu, Rusiya futbolunda yeni rekorddu. Məşhur qapıçı bu göstəricidə Dmitri Loskov və Aleksandr Anyukovu geridə qoyaraq rekordun təkbaşına sahibi oldu. Akinfeyev həm də turnirin tarixində aşkar fərqlə ən çox oyun keçirən futbolçudu. Şənbə günü o, 544-cü oyununa çıxdı. Əsas lideri Malkomu Səudiyyə Ərəbistanına göndərmək üzrə olan “Zenit” mövsümə qələbə ilə start verdi. Amma Sergey Semakın komandası yalnız “Nijni Novqorod” 2-ci hissənin əvvəllərində azlıqda qalandan sonra qolları vurmağa müvəffəq oldu. Kolumbiyalı Kassyerra bütün ötən mövsüm ərzində cəmi 2 qol vurmuşdusa, bu dəfə 1 oyuna bu qədər qol vurdu. Qeyd edək ki, “Zenit” ardıcıl 21 ildi mövsümə məğlubiyyətsiz başlayır! Komandanın sonuncu dəfə ilk turda uduzmasına 2002-ci ildə “Anji” ilə oyunda (0:2) rast gəlinib. Sergey Semak “Zenit”in başında 210-cu oyunda 126-cı qələbəsini qazanmaqla Pavel Sadırini (262 oyun 125 qələbə) geridə qoyaraq klubun tarixində ən çox qələbə qazanan baş məşqçiyə çevrildi! Mövsümə uğursuz başlayan klublardan biri də “Lokomotiv” oldu. “Dəmiryolçular” evdə debütant “Rubin”lə oyunda məğlubiyyətdən çətinliklə qurtuldular. Vilson İzidorun inanılmaz seriyası davam edir. Ötən mövsümü də nəzərə almaqla o, premyer-liqada sonradan meydana çıxdığı ardıcıl 8-ci (!) oyunda qol vurmağı bacardı və bununla da özünə məxsus olan rekordu bir qədər də yaxşılaşdırdı.

İlk turda Moskva təmsilçilərindən yalnız “Spartak” qalib gələ bildi. Paytaxt nəhəngi ənənəsinə sadiq qalaraq işini çətinə salandan sonra qələbə qazandı. Ötən mövsüm hesabda geridə olduğu oyunlarda qazanılan xallara (21) görə aşkar lider olan “qırmızı-ağlar” “Orenburq”la ev oyununda daha bir geridönüş etdilər. Özü də maraqlıdı ki, komandaya qələbəni sol cinah müdafiəçisi Xluseviç qazandırdı. Buna qədər “Spartak”ın heyətində keçirdiyi 48 rəsmi oyunun heç birində fərqlənə bilməyən 22 yaşlı futbolçu bu dəfə dubl edərək qəhrəmana çevrildi.

1-ci tur
Nijni Novqorod – Zenit 0:2
Kassyerra, 57; 83.
Zenit: Kerjakov, Karavayev (Adamov, 90), Çistyakov, Renan, Santos, Barrios, Klaudinyo (Du Keyroş, 85), Bakayev (Sutormin, 77), Yeroxin (Kovalenko, 85), Mostovoy (Mantuan, 46), Kassyerra.

Ural – ÇSKA 2:1
Ayupov, 21. Mişkiç, 54-p. – Zabolotnı, 62.
ÇSKA: Akinfeyev, Qayiç, Nababkin (Arbuzov, 84), Roşa (Ryadno, 32), Moyzes, Zaynutdinov, Zdelar, Mendes, Muxin (Kuçayev, 63), Çalov (Yermakov, 85), Zabolotnı (Qayç, 63).

Spartak – Orenburq 3:2
Mozes, 45. Xluseviç, 76; 90+1 – Vorobyov, 50. Florentin, 67.
Spartak: Maksimenko, Denisov, Litvinov, Duarte, Xluseviç, Martins, Zobnin (Umyarov, 72), Mozes (İqnatov, 72), Zinkovski (Bonqonda, 58), Promes, Melyoşin (Balde, 77).

Lokomotiv – Rubin 2:2
Tiknizyan, 23. İzidor, 87 – Daku, 3. Fameye, 58.
Lokomotiv: Lantratov, Nenaxov (Samoşnikov, 84), Morozov, Fasson, Tiknizyan, Barinov, Karpukas (Sarveli, 84), Jemaletdinov (Mirançuk, 57), Qluşenkov (İzidor, 71), Pinyaev (Mitay, 71), Dzyuba.

Dinamo – Krasnodar 1:3
Smolov, 61 – Kordoba, 27. Çernikov, 35. Batçi, 53.

Rostov – Fakel 2:1
Osipenko, 39. Tuqaryov, 56 – Markov, 17.

Axmat – Krılya Sovetov 1:2
Ağalarov, 90+5-p. – Qarre, 13. Babkin, 85.

Soçi – Baltika 2:0
Kramariç, 6. Drkuşiç, 82.