Xəbər verdiyimiz kimi, Lionel Messinin bu yaydan etibarən şərəfini qoruduğu “İnter Mayami” ABŞ və Kanada klublarının iştirakı ilə keçirilən, eləcə də bu ildən etibarən KONKAKAF bayrağı altında oynanılan “Liqalar kubokunun finalına yüksəlmişdi.

“Football-plus.az” xəbər verir ki, avqustun 20-də “İnter Mayami” həlledici görüşdə ABŞ-ın digər təmsilçisi “Neşvill” ilə üz-üzə gəldi. Oyun Neşvilldə yerləşən “Geodis Park” stadionunda keçirildi. Argentinalı superulduz artıq 23-cü dəqiqədə komandasını hesabda önə keçirdi. Bu, Leonun mayamililərin heyətində 7-ci oyunda vurduğu 10-cu qol oldu! Meydan sahibləri ikinci hissənin əvvəllərində hesabı bərabərləşdirdilər. Qalan vaxtda qol olmayınca qalib penalti seriyasında müəyyənləşdi. Burda isə 10:9 hesabı ilə üstün olan “İnter Mayami” tarixinin ilk titulunu qazandı! Xatırladaq ki, bu klub 2018-ci ildə yaradılıb və 2020-dən etibarən MLS-də çıxış edir. “İnter Mayami”nin 3 sahibindən biri sabiq ingiltərəli ulduz Devid Bekhemdi. Liqalar kubokunda keçirdiyi 7 oyunun hər birində fərqlənən və 10 qolla bombardir olan Messi, gözlənildiyi kimi, turnirin ən yaxşı oyunçusu seçildi. Bu zəfər sayəsində Florida təmsilçisi həm də tarixində ilk dəfə KONKAKAF Çempionlar Kubokunda oynamaq qazanıb. Özü də “İnter Mayami” bu turnirdə mübarizəyə birbaşa 1/8 finaldan başlayacaq. Maraqlıdı ki, Liqalar kubokunda Leo gəldikdən sonra 2-si penalti seriyasında olmaqla keçirdiyi 7 oyunun hamısında qalib gələn və bu matçlarda 22 qol vuran “İnter Mayami” MLS-də çıxış etdiyi Şərq konfransında 22 oyuna 18 xal və 36 qol göstəriciləri ilə sonuncu – 15-ci pillədə qərarlaşıb. Messi hələ ki bu turnirdə debüt etməyib.
Bu titulun daha bir dəyəri var. 36 yaşlı Messi karyerasında 44-cü titulu qazanaraq braziliyalı Dani Alveşi (43) geridə qoydu və futbol tarixinin ən titullu oyunçusuna çevrildi! Messi “Barselona”nın heyətində 10 dəfə La Liqanın, 4 dəfə ÇL-in, 7 dəfə ölkə kubokunun, 8 dəfə ölkə superkubokunun, 3 dəfə klublararsı DÇ-nin və 3 dəfə Avropa superkubokunun qalibi olub. PSJ-nin heyətində o, 2 dəfə Liqa-1 və 1 dəfə ölkə superkuboku olmaqla 3 titul qazanıb. Argentinanın heyətində isə DÇ-nin, Amerika Kubokunun, Olimpiadanın, gənclər arasında mundialın və Finalissimanın qalibi olub. Tarixin ən titullu oyunçuları siyahısında sonrakı pillələrdə Andres İnyesta (39), Maksvell (37) və Jerar Pike (37) qərarlaşıb. Messi ilə bağlı daha bir diqqətçəkən fakt odu ki, bu futbolçu indiyə qədər peşəkar karyerasında iştirak etdiyi 48 final matçında 50 qolun vurulmasında yaxından iştirak edib (35 qol, 15 məhsuldar ötürmə)! Ondan başqa futbol tarixində final matçlarında heç 40 qolun vurulmasında belə iştirak edən futbolçu yoxdu. Sonda onu da bildirək ki, “Neşvill” Messinin klub karyerasında qapısına yol tapdığı 105-ci fərqli komanda oldu. O, indiyə qədər 120 klubla qarşılaşıb.