Bu yay bir çox ulduzların əksinə, Səudiyyə Ərəbistanına yollanmayaraq Devid Bekhemin sahibi olduğu “İnter Mayami”ni seçən Lionel Messinin ABŞ-dakı karyerası inanılmaz şəkildə başlayıb.

"Football-plus.az" xəbər verir ki, MLS-də hələ ki fasilədi. Əvəzində ABŞ və Meksika klublarının iştirakı ilə keçirilən Liqalar kuboku adlı turnir davam edir. Bilindiyi kimi, Leonun debüt oyunu bu turnirə təsadüf etdi. “Krus Asul” ilə qarşılaşmada 2-ci hissədə meydana çıxan argentinalı superulduz son saniyələrdə cərimə zərbəsindən mükəmməl qol vuraraq komandasına qələbə qazandırdı. “İnter Mayami”nin bu turnirdəki 2-ci oyunu isə Messinin benefisinə çevrildi! O, dünən “Atlanta Yunayted” üzərində əldə olunan 4:0-lıq qələbə zamanı artıq ilk 22 dəqiqəyə dubl etdi. İkinci hissədə isə hesabına məhsuldar ötürmə də yazaraq “İnter Mayami” fanatlarını sevincdən dəli olmaq həddinə çatdırdı. Halbuki bu seriyaya qədər “İnter Mayami” keçirdiyi 8 oyuna cəmi 1 qələbə qazanmışdı. Maraqlıdı ki, Messi 78-ci dəqiqədə əvəzləndikdən sonra “İnter Mayami”nin ev oyunlarını keçirdiyi “Drayv Pink Stedium” sürətlə boşalmağa başladı. Leonun son qəhrəmanlığının ardından ortaya bir sıra maraqlı faktlar çıxdı. 2018-ci ildə qurulan “İnter Mayami” tarixində ilk dəfə bir hissəyə 3 qol vurdu və tarixinin ən böyükhesablı qələbəsini təkrarladı. Messinin özünə gəlincə, hər iki qolu sağ ayaqla vurması diqqəti çəkdi. O, sonuncu dəfə 2015-ci ildə “Barselona”nın heyətində “Levante” ilə oyunda sağ ayaqla dubl etmişdi. “Atlanta Yunayted” onun peşəkar karyerasında qapısına yol tapdığı 100-cü fərqli komanda oldu.

Bundan başqa, ABŞ mənbələrinin yazdığına inansaq, Messinin 1-ci qolunu onlayn şəkildə bütün dünyada 3,4 milyard insan izləyib! ABŞ-da nəinki futbol, ümumiyyətlə, heç bir idman növündə indiyə qədər belə şey olmamışdı.

Bu templə Messi ABŞ-da futbolu yeni səviyyəyə qaldıra bilər. Onun gəlişinə qədər “İnter Mayami”nin “intsaqram”da cəmi 1 milyom izləyicisi var idisə, hazırda izləyici sayı 12,5 milyona çatmaq üzrədi! Forma satışından isə başgicəlləndirici gəlir əldə olunub. İdman analitiki Coş Mozerin məlumatına görə, “İnter Mayami” indiyə qədər Lionel Messinin 3 milyon formasını satıb. Formanın birinin dəyərinin orta hesabla 150 dollar olduğunu nəzərə alsaq, Mayami təmsilçisi təkcə forma satışından 450 milyon dollar qazanıb! Qeyd edək ki, Leonun ABŞ-da illik qazancı 50-60 milyon dollar civarında olacaq. Amma bura reklam və imic haqlarının gəlirləri də əlavə olunduqda məbləğ ikiqat artacaq. Çünki başqa cür Messinin ərəblərin astronomik təklifindən imtina edib ABŞ-ı seçməsinə məntiqi izah tapmaq çətindi. Leonun ABŞ-a yollanmasında MLS-in rəsmi yayın hüuquqna malik olan “Apple TV” ilə çempionatın forma sponsoru olan “Adidas”ın da barmağı var. Turnirin 10 illik yayın haqqını 2,5 milyard dollara alan “Apple TV” əldə edəcəyi gəlirdən Messiyə də pay verəcək. “Apple TV”də bu yaxınlarda Messinin dünya çempionluğuna həsr olunan sənədli film də yayınlanacaq.

ƏLİ