21-ci əsrə və ümumiyyətlə, futbol tarixinə damğa vuran Kriştiano Ronaldo ilə Lionel Messi arasındakı rəqabət, deyəsən, yenə qızışır. Baxmayaraq ki, onlar hazırda dünyanın tam fərqli nöqtələrində karyeralarını davam etdirirlər.

"Football-plus.az" xatırladır ki, bugünlərdə portuqaliyalı ulduz “Əl-Nəssr”in heyətində ilk titulunu qazanmışdı. İndi də növbə Messinindi.

Ümumiyyətlə, argentinalı superulduzun ABŞ karyerasının bu dərəcədə uğurlu start götürəcəyini, yəqin ki, heç o özü də gözləmirdi. Leonun şərəfini qoruduğu “İnter Mayami” Bakı vaxtı ilə iyulun 15-dən 16-na keçən gecə Liqalar kuboku adlı turnirin yarımfinalında səfərdə ABŞ-ın şərq konfransının ən yaxşı komandası “Filadelfiya” ilə qarşılaşdı. Messinin transferindən sonra sanki qanad açıb uçan “İnter Mayami” rəqibini 4:1 hesabı ilə darmadağın etdi! Təbii ki, Leo da meydanı qolsuz tərk etmədi. O, 20-ci dəqiqədə təxminən 25 metrdən yerlə vurduğu mükəmməl zərbə ilə topu uzaq küncə göndərdi. Bununla da Messi seriyasını davam etdirərək yeni klubunun heyətində oynadığı 6-cı qarşılaşmada da meydanı qolsuz tərk etmədi! Bu 6 görüşdə onun hesabında artıq 9 qol və 1 məhsuldar ötürmə var!

Buna qədər “Qızıl top”un yeddiqat sahibi “Dallas” (4:4, p. - 5:3), “Orlando Siti” (3:1) və “Atlanta” (4:0) ilə oyunlarda dubl etmişdisə, “Şarlott” (4:0) və “Kruz Azul” (2:1) ilə oyunlarda 1 qol vurmuşdu. Bu oyunların hamısı ABŞ və Meksika klublarının iştirakı ilə keçirilən Liqalar kuboku çərçivəsində baş tutub. Qeyd edək ki, bu turnir 2019-cu ildən keçirilsə də, məhz bu ildən etibarən KONKAKAF bayrağı altında oynanılmağa başlanıb. Yəni rəsmi xarakter qazanıb. Bu turnirdə ilk 3 pilləni tutal kollektivlər avtomatik KONKAKAF Çempionlar Liqasına vəsiqə qazanır. Yəni tarixində ilk dəfə bir turnirin finalına çıxan “İnter Mayami” artıq indidən özü üçün KONKAKAF ÇL-ində oynamağı rəsmiləşdirib.

Liqalar kubokunun finalında “İnter Mayami” “Neşvill” ilə qarşılaşacaq. Görüş avqustun 20-nə keçən gecə “Neşvill”in meydanında keçiriləcək. Messi gələnə qədər 3 ay ərzində keçirdiyi 13 oyunda cəmi 2 qələbə qazanan “İnter Mayami”nin bu yüksəlişi heyrət doğurmaya bilməz. Futbol hər nə qədər komanda idman növü sayılsa da, göründüyü kimi, bir oyunçudan çox şey asılıdı!

Daha bir unikal fakt odu ki, cəmi 6 oyun keçirməsinə baxmayaraq, Messi artıq indidən “İnter Mayami” tarixinin ən məhsuldar oyunçuları sarasında 3-cü pullədədi! O, 9 qolla 3-cü pilləni Cozef Martines və Robert Teylor ilə bölüşür. 2-ci pillə 52 oyunda 16 qol vuran 23 yaşlı ekvadorlu forvard Leonardo Kampanaya məxsusdu. Siyahının zirvsində isə futbolsevərlərə gözəl tanış olan Qonsalo İquayn qərarlaşıb. Messinin həmyerlisi 2020-22-ci illərdə çıxış etdiyi “İnter Mayami”də keçirdiyi 70 oyuna 29 qol vurub.

Leo bütün bu xarüqələri hələ MLS-də debüt etmədən yaradıb. O, bu templə davam edəcəyi təqdirdə İquaynın rekordunu artıq ilin sonuna qədər yeniləyə bilər.