"Sabah" son iki oyunda gözlənilmədən rəqiblərinə yenilmişdi.

Növbəti dəfə büdrəyəcəyi halda liderlə xal fərqinin artmaq, “Neftçi”ylə isə azalmaq ehtmalı böyük idi. "Kəpəz"də vəziyyət fərqliydi. "Sarı-göylər" ardıcıl 2 qələbə qazandığından düşərgədə əhval-ruhiyyə yüksək idi. Odu ki, gəncəlilər Masazıra ən azı məğlub olmamaq üçün gəlmişdi.

Qonaqlar oyuna da ehtiyatlı başladı. "Sabah" isə topa nəzarət etməklə rəqibini qapısı önünə sıxışdırsa da, ilk dəqiqələrdə ciddi hücumlar təşkil edə bilmədi. "Sarı-göylər" yaxşı müdafiə olunurdu.

Oyunda ilk qol vəziyyəti 13-cü dəqiqədə reallaşdı. Mahir Həsənov səhvən topu Volkova ötürdü. Gürcü futbolçu da Mikelsi “gördü”. Lakin almaniyalının zərbəsi qeyri-dəqiq oldu. İki dəqiqə sonra Şuaybu İrasabala qarşı aşkar kobudluğa görə “sarı” aldı verdi. Lakin referi VAR-a baxandan sonra qırmızı vərəqə göstərdi və "Kəpəz" azlıqda qaldı. Buna rəğmən, gəncəlilər ilk hücumunu reallaşdıra bildi. Cərimə zərbəsi zamanı Fəridin qapı önünə asmasına Əlicanov yüksəlsə də, hədəfə düşə bilmədi.

Bir qədər sonra Kaşukun künc zərbəsinə yüksələn Namik topu tora göndərsə də, hakim qolu hesaba almadı. Çünki ötürmə zamanı meydan sahibləri rəqib futbolçuya qarşı kobud oynamışdı. Camalovun cərimə meydançasına ötürməsini qəbul edən Volkov daha əlverişli vəziyyətdəki Mikelsi zərbə mövqeyinə çıxarsa da, top Abdulla Rzayevə dəyərək meydandan çıxdı. İsayevin kornerdən asmasını isə Mikels başla qapadı. Amma Mustapiç əla seyvlə komandasını xilas etdi. Gəncə təmsilçiisi buna oxşar hücumla cavab verdi. Fəridin küncdən asmasına Əlicanov baş zərbəsi endirsə də, İmanov qola imkan vermədi. “Sabah”ın növbəti hücumu 39-cu dəqiqəyə təsadüf etdi. Volkov İsayevin ötürməsini qapıya ünvanlayarkən top Xvalkonun əlinə dəydi. Referi isə tərəddüd etmədən “nöqtə”ni göstərdi. Topa yaxınlaşan İsayevin ilk zərbəsini qapıçı qaytarsa da, "10” nömrə təkrar vuruşla toru silkələdi. Qoldan sonra da Masazır təmsilçisi dominantlığını davam etdirdi. 42-ci dəqiqədə Oçiqava qapını yoxlasa da, Mustapiç yerində idi.

İkinci hissəyə də "bayquşlar" fəal başladı. Kaşukun künc nöqtəsindən qapı önünə asmasına yüksələn İrasabal hədəfə düşə bilmədi. İsayevin zərbəsini isə Mustatpiç sinəsinə sıxdı. 53-cü dəqiqədə İdrisdən ötürmə alan Junior cərimə meydançasına soxuldu. Müdafiəçilərin başını gicəlləndirən futbolçu qapını nişan alsa da, top hədəfə düşmədi. 56-cı dəqiqədə İsayev ara ötürməsiylə Namiki “gördü”. Milli üzvü topu tora qovuşdursu. Amma laysman bayrağı havada idi. Qonaqların buna cavabı da gecikmədi. Yusif Nəbiyev qapı önündə əlverişli mövqedə olan Sisseyə ötürmə etdi. Amma "10” nömrənin zərbəsi bərbad alındı. 88-ci dəqiqədə İldar rəqibin 3 futbolçusunu arxada qoyub mərkəzdən reyd edərək cinahdan açılan Anatolini “gördü”. Sonuncu dəqiq zərbəylə toru sirkələsə də, bu dəfə də ofsayd "Sabah"ın 2-ci qol sevincinə imkan vermədi.

"Bayquşlar"ın 4-cü uzatma dəqiqəsinə təsadüf edən hücumu isə məhsuldar alındı. İsayev – Alekperov - Nuriyev “üçülüy”ünün təşkil etdiyi hücumu "9” nömrə" dəqiq zərbəylə tamamladı - 2:0. Amma Anatoli bir qədər onra "sarı-göylər"in kapitanına qarşı aşkar kobudluğa görə ikinci “sarı”nı almaqla meydandan qovuldu. Lakin vaxt azlığı üzündən futbolçuların sayının meydanda bərabərləşməsi nəticəyə təsir göstərmədi.

Gözdən qaçmadı

* Qarşılaşmadan öncə "Xəmsə" azarkeş qrupunun rəhbəri Müşfiq Məmmədov media sektorunda "Kəpəz"in mətbuat katibi Azad Mustafayevlə söhbət edirdi.

* Oyunun startına az qalmış Nicat Mehbalıyev "Kəpəz"in ehtiyat oyunçular skamyasına yaxınlaşaraq məşqçilər heyəti ilə görüşdü.

* Hakim 7-ci dəqiqədə Şüaybuya qarşı kobudluğu qayda pozuntusu kimi qeydə almadı. Tərlan Əhmədov buna əsəbləşdi: "Belə də olmaz, … , qoymurlar oyunumuzu oynayaq".

* Martins Junior əvəzləndikdən sonra Tərlan Əhmədov onu bağrına basıb təşəkkür etdi.

ABDULLA İSMAYILOĞLU