Hər iki komandaya qələbə hava-su kimi lazım idi. Meydan sahibləri elitada qalmaq uğrunda mübarizə aparırsa, qonaqlar 4-cü yeri təmin etməklə Konfrans Liqasına vəsiqəni rəsmiləşdirmək istəyir. "Qırmızı-qaralar" səfərə ciddi itkilərlə gəlmişdi. Belə ki, kapitan Asif Məmmədovla Feras Abu Akal ötən turda zədələnərək mövsümü bitirmişdisə, Urfan Abbasovla İlkin Qırtımov cəza səbəbindən oyunu buraxırdı. Qarşılaşmanın startına 45 dəqiqə qalmış azarkeşlər stadiona axışmağa və doğma komandanı qələbəyə səsləməyə başladı. Qəbələdən də Nəriman Təbrizin başçılığı altında 50-yə yaxın fanat Şamaxıya gəlmişdi.

Hakimin start fitindən sonra hər iki komanda oyuna istəkli başlasa da, mübarizə bir müddət əsasən meydanın mərkəzində getdi. Qapıya ilk həmlə matçın 11-ci dəqiqəsində "Qəbələ"dən gəldi. İsnik ara ötürməsiylə Santosu “gördü”. Braziliyalı bir qədər irəliləyib zərbə vursa da, Rəşad ilk seyviylə azarkeşlərin alqışını qazandı. "Şirlər"in cavabı da özünü çox gözlətmədi. Fuaddan ötürmə alan Elvin qapını nişan aldı. Amma top cüzi fərqlə dirəyin yanından keçdi. Bir qədər sonra Santos cinahdan reydini qapı önünə asma ilə tamamladı. Maçado topu rahatlayıb, əlverişli mövqedən zərbə vursa da, “mərmi” qapının üstündən keçdi. "Şamaxı"dan Bahadurun cəhdi zamanı isə Atanqana yerində idi. Maçado növbəti dəfə fərqlənməyə çalışdı. Amma bu dəfə hədəfə də düşə bilmədi. Qonaqlarda Muradov – Maçado - Utziq “üçlüy”ünün ifasında təşkil olunan hücum zamanı sonuncunun sevinməsinə qapıçı imkan vermədi. İrəliləyən dəqiqələrdə Emil iki dəfə qapını yoxlasa da, bir zərbəsi qeyri-dəqiq alındı, ikincini qolkiper tutdu. Hissənin sonuna yaxın Məqsədin cərimə meydançasına ötürməsinə Santos yüksəlsə də, Rəşad yerindəydi. Beləliklə, çoxsaylı cəhdlərə rəğmən, komandalar fasiləyə qolsuz yollandı.

İkinci yarıya qonaqlar daha fəal qoşuldu. Əvvəlcə Allaşın zərbəsi hədəfə düşmədi. Bahadur reyd etdikdən sonra Fuada ötürmə verdi ki, "16” nömrənin zərbəsi uğursuz alındı. Maçadonun cərimə zərbəsindən fərqlənmək istəyi də baş tutmadı. Daha dəqiq desək, zərbə yumşaq alındı və qapıçı üçün topu tutmaq çətin olmadı. Utziqin ötürməsindən sonra Santosun zərbəsini də qapıçı zərərsizləşdirdi. 74-cü dəqiqədə isə Ülvi uzaq küncü nişan aldı. Əzizli növbəti dəfə seyv etməklə qola imkan vermədi. Bir qədər sonra Amil komandasını topu boş qapıdan çıxarmaqla xilas etdi. Bu dəqiqələrdə “Qəbələ” təzyiqi artırmışdı. Məqsədin qapı önünə asmasını Murad akrobatik zərbəylə tamamlasa da, qapıçı yerində idi. "Şamaxı" isə hər nə qədər çalışsa da, rəqibin qapısı önündə təhlükəli vəziyyətlər yarada bilmirdi.

Hakimin final fiti qolsuz bərabərliyi rəsmləşdirdi. "Şirlər" doğma publika önündə mövsümün son oyununu məğlubiyyətsiz başa vuraraq şansını son tura daşıdı. “Qəbələ” də əsas vəzifənin öhdəsindən doğma meydanda gəlməli olacaq.

Gözdən qaçmadı
* "Şamaxı"nın 70 yaşlı sadiq azarkeşi Davud Fətəliyev dövlət bayrağıyla stadiona gəlmişdi. O, tez-tez "Azərbaycan futbolunun ürəyi "Şamaxı"dı” şüarını səsləndirirdi.
* Oyunu izləyənlər atasında Futzal Federasiyasının mətbuat xidmətinin rəhbəri Mahal Məmmədov da yer almışdı.
* Fuzal üzrə 1-ci liqanın qalibi "Şamaxı"nın üzvləri fəxri qonaq kimi oyuna dəvət olunmuşdu. Onlar fasilədə uğurlarını futbol komandasıyla bölüşüb azarkeşlərin alqışını qazandı.
* "Şamaxı"nın ev oyunlarında diktorluq edən Ceyhun Rzayev bölgəyə səfər etməmişdi. Ona görə də komandaların start heyətini və oyunun gedişindəki dəyişiklikləri klubun mətbuat xidmətinin rəhbəri Yusif Hüseynov səsləndirirdi.
* Oyunun final fitindən sonra Rasim Ramaldanov 4-cü hakim Kamal Umudluyla mübahisə etdiyinə görə referi ona birbaşa qırmızı vərəqə göstərdi.

ABDULLA İSMAYILOĞLU