Turlar artdıqca “Botafoqo”nun Braziliya çempionatındakı liderliyi daha da möhkəmlənir. Rio de Janeyro klubu 14-cü turda da qələbə qazanmaqla mövqeyini bir qədər də gücləndirdi.


“Football-plus.az” xəbər verir ki, turun mərkəzi oyunlarından biri Portu Aleqridə keçirildi. Yerli “Qremio” qələbə qazanmaqla lider ilə xal fərqini 4-ə endirə bilərdi. Bunun üçün əla fürsət yaranmışdı. Yüksəlişdə olan Renato Qauşunun komandası əvvəlki 3 oyunda xal itirməmiş və liderin əsas təqibçisinə çevrilmişdi. Qonaq komanda üçün vurğulanası ən vacib fakt baş məşqçi ilə bağlı idi. Xəbər verdiyimiz kimi, “Botafoqo”ya 2022-ci ilin martından başçılıq edən 61 yaşlı Luiş Kaştru “Əl-Nəssr”dən (Səudiyyə Ərəbistanı) aldığı təklifi müsbət cavablamışdı. Portuqaliyalının yerinə təyinat alan 47 yaşlı həmyerlisi Bruno Lajenin işi heç də asan görünmürdü. Onun debüt oyununda yeni komandası ev sahibləri ilə gərgin mübarizədən qalib çıxmağı bacardı. Eduardo ilə Karlos Albertonun ikinci hissədə vurduğu qollar rio de janeyrolulara vacib qələbə qazandırdı. “Botafoqo” ardıcıl 5-ci qələbə ilə cədvəldəki yerini daha da gücləndirdi.

“Qremio” isə 3-cü yerə düşdü. Çünki tura bu pillədə başlayan “Flamenqo” çətin səfərdə hesabına bir xal yazdı. Bəli, Xorxe Sampaolinin komandasının “Palmeyras”a qarşı oyununu da turun mərkəzi qarşılaşması saymaq olardı. Son vaxtlar enişdə olan çempionun evdə qalib gəlməkdən başqa hədəfi ola bilməzdi. Oyuna yaxşı başlayan san paululular ilk hissəni Dudunun qolu ilə öndə başa vurdular. Təinən bərabər mübarizə şəraitidə keçən matçda qalib müəyyənləşmədi. Sampaolinin fasilədən sonra meydana buraxdığı oyunçular qonaqları məğlubiyyətdən xilas etdilər: 81-ci dəqiqədə De Arraskaeta Everton Ribeyronun ötürməsi ilə nəticəni müəyyən etdi – 1:1. Beləliklə, bu nəticə rio de janeyroluları topların daha yaxşı fərqinə əsasən 2-ci pilləyə yüksəltdi. “Palmeyras”ın qələbəsiz oyunlar seriyası isə 4-ə çatdı. Bu oyunlarda yalnız 2 xal qazanan Abel Ferreyranın komandası belə nəticə ilə həm liderdən 12 xal geri, həm də 5-ci yerə düşdü.

14-cü tur
Qremio – Botafoqo RJ 0:2
Eduardo, 74. Karlos Alberto, 88.
Palmeyras - Flamenqo 1:1
Dudu, 24 – De Arraskaeta, 81.
Braqantino - San Paulu 0:0
Fluminense - İnternasyonal 2:0
Kano, 25. Martinelli, 40.
Atletiko Mineyro – Korintians 0:1
Rocer Gedeş, 40.
Vasku da Qama - Kruzeyro 0:1
Filipe Maçado, 45+5.
Kuyaba - Bayya 1:1
Deyverson, 18-p. – Alan Empereur, 51-öz qapısına.
Santos – Qoyas 4:3
Markos Leonardo, 16; 30. Mendosa, 45+1; 90+4-p. – Gilyerme Markes, 40-p.; 61. Joao Manyo, 81.
Koritiba - Amerika Mineyro 3:1
Alef Manqa, 40-p. Robson, 44. Viktor Luis, 90+6 – Juninyo, 8.
Fortaleza - Atletiko Paranaense 1:0
Yaqo Pikaçu, 84.

1. Botafoqo RJ 14 12 0 2 24-7 36
2. Flamenqo 14 8 2 4 27-18 26
3. Qremio 14 8 2 4 24-20 26
4. Fluminense 14 7 3 4 21-14 24
5. Palmeyras 14 6 6 2 25-13 24
6. Braqantino 14 6 6 2 22-14 24
7. Fortaleza 14 6 5 3 16-11 23
8. San Paulu 14 6 4 4 18-13 22
9. Kruzeyro 14 6 3 5 16-11 21
10. İnternasyonal 14 6 3 5 13-16 21
11. Atletiko Paranaense 14 6 2 6 18-18 21
12. Atletiko Mineyro 14 5 5 4 18-14 20
13. Santos 14 4 4 6 15-19 16
14. Kuyaba 14 4 4 6 13-17 16
15. Korintians 14 4 3 7 12-17 15
16. Bayya 14 3 4 7 15-21 13
17. Qoyas 14 3 2 9 14-26 11
18. Koritiba 14 2 4 8 14-28 10
19. Vasku da Qama 14 2 3 9 11-23 9
20. Amerika Mineyro 14 2 3 9 16-32 9
Bombardirlər: Tikinyo Soares (Botafoqo RJ) - 10, Vitor Roke (Atletiko Paranaense) - 7, Eduardo Saşa (Braqantino), Rocer Gedeş (Korintians), Halk (Atletiko Mineyro) – 6.