Braziliya çempionatında “Botafoqo”nun liderliyi davam edir. Rio de Janeyro klubu 10-cu turda hesabına maksimum xal yazmaqla mövqeyini qorudu.


"Football-plus.az" xəbər verir ki, əvvəlki turun səfər oyununda “Atletiko Paranaense”yə minimal hesabla uduzan lider öz meydanında hələ ki xal itirmir. Luiş Kaştronun çalışdırdığı komanda “Fortaleza”nı iki cavabsız qolla məğlub etdi. Qapıya hər iki halda Tikinyo Soares yol tapdı. 32 yaşlı hücumçu bu mövsüm 8-ci qolunu vuraraq bombardirlərin siyahısında vahid liderliyini bir qədər də möhkəmləndirdi. O, “Botafoqo”nun bu mövsüm evdəki 6-cı qələbəsində böyük rol oynamaqla komandası üçün vacib oyunçu olduğunu bir daha göstərdi.

“Palmeyras” da xal itirmədi. Halbuki liderin əsas izləyicisinin çətin səfərdə büdrəyə biləcəyini güman etmək olardı. Məsələ ondadı ki, “San Paulu” cari mövsümün ilk 4 ev oyununda xal itirməmişdi. Lakin Dorival Juniorun komandasının “Morumbi”dəki uğurlu seriyasına son qoyuldu. Son çempionla matçın əvvəli meydan sahibləri üçün heç də uğurlu olmadı: Qabriel Menino 14-cü dəqiqədə “Palmeyras”ı hesabda önə keçirdi. Amma oyun planında üstünlük meydan sahiblərində idi. Onlar matç ərzində qapıya 24 zərbə endirdilər ki, 6-sı dəqiq alındı. Lakin bütün hallarda Ueverton zərbələrin qarşısını almaqla qonaqların çətin qələbəsində rol oynadı. Sona yaxın 16 yaşlı hücumçu Endrikin vurduğu qol derbinin nəticəsini müəyyənləşdirdi. Abel Ferreyranın komandası bu qələbə ilə liderlə xal fərqinin artmasına imkan vermədi.

Tura 3-cü yerdə başlayan “Atletiko Mineyro” evdə iki xal itirdi. “Braqantino” ilə matç 1:1 hesabıyla nəticələndi. Aparıcı hücumçusu Halkın xidmətindən zədəli olduğuna görə yararlana bilməyən “Atletiko Mineyro” 3-cü yeri əldən verdi.

Çünki “Flamenqo” turu qələbə ilə başa vurmaqla bu pilləni ələ keçirdi. Evdə “Qremio”nun qapısına üç dəfə yol tapan və qapısını toxunulmaz saxlayan Xorxe Sampaolinin komandası son 5 oyunda 4-cü qələbəsini qazandı.

Son mövsümün bürünc mükafatçısı “Fluminense” səfərdə “Qoyas”la 2:2 hesablı heç-heçəyə nail oldu. Bu nəticə Fernando Dinizin çalışdırdığı komandanı topların daha yaxşı fərqinə əsasən 6-cı yerdən 5-ə yüksəltdi.

“İnternasyonal” isə evdə hesabına 3 xal yazdı. Ötən mövsümün vitse-çempionu “Vasku da Qama”nı 2:1 hesabıyla məğlub etdi. Cari mövsümdə mövqeyini böyük ölçüdə əldən verən Manu Menezeşin komandası üçpilləlik sıçrayışla 10-cu yerə çıxdı.

10-cu tur
Botafoqo RJ - Fortaleza 2:0
Tikinyo Soares, 45+3; 63.
San Paulu – Palmeyras 0:2
Qabriel Menino, 14. Endrik, 78.
Atletiko Mineyro - Braqantino 1:1
Paulinyo, 17 – Eduardo Saşa, 35.
Flamenqo - Qremio 3:0
Everton, 24. Pedro, 63. Bruno Enrike, 90+6.
İnternasyonal - Vasku da Qama 2:1
Romulo, 3. Vanderson, 16 – Rayan, 29.
Koritiba - Santos 0:0
Korintians - Kuyaba 1:1
Ruan Oliveyra, 81 - Deyverson, 55.
Bayya - Kruzeyro 2:2
Kayke, 18. Artur Sales, 66 – Bruno Rodriges, 30. Uesli, 45+1.
Amerika Mineyro - Atletiko Paranaense 2:2
Vellinqton Paulista, 76. Danilo Avelar, 90+6 – Vitor Roke, 9. Kristian, 48.
Qoyas - Fluminense 2:2
Mateus Peyşoto, 45-p. Alesson 85 – Kano, 2. Lima, 47.

1. Botafoqo RJ 10 8 0 2 18-7 24
2. Palmeyras 10 6 4 0 22-8 22
3. Flamenqo 10 6 1 3 21-11 19
4. Atletiko Mineyro 10 5 3 2 14-8 18
5. Fluminense 10 5 2 3 16-11 17
6. Qremio 10 5 2 3 14-15 17
7. Atletiko Paranaense 10 5 1 4 14-13 16
8. San Paulu 10 4 3 3 15-11 15
9. Kruzeyro 10 4 2 4 14-10 14
10. İnternasyonal 10 4 2 4 10-13 14
11. Fortaleza 10 3 5 2 12-8 14
12. Braqantino 10 3 5 2 15-14 14
13. Santos 10 3 4 3 9-8 13
14. Kuyaba 10 3 3 4 9-14 12
15. Bayya 10 2 3 5 11-16 9
16. Korintians 10 2 3 5 9-15 9
17. Qoyas 10 2 2 6 9-18 8
18. Amerika Mineyro 10 2 2 6 11-22 8
19. Vasku da Qama 10 1 3 6 10-19 6
20. Koritiba 10 0 4 6 8-20 4
Bombardirlər: Tikinyo Soares (Botafoqo RJ) - 8, Rocer Gedeş (Korintians), Halk (Atletiko Mineyro) - 5.