Startı aprelin 15-də verilən Braziliya çempionatının yeni mövsümündə mübarizə tədricən qızışır. Aprelin son və mayın ilk iki günündə 3-cü turun oyunları keçirildi. Artıq A seriyasında sürpriz lider var.

2-ci turdan sonra turnir cədvəlində ikihakimiyyətlilik yaranmışdı. “Fluminense” ardıcıl iki qələbə ilə topların daha yaxşı fərqinə əsasən 1-ci yerə sahib çıxmışdı. Amma son mövsümün bürünc mükafatçısı üçün Fortaleza səfəri uğursuz alındı. Fernando Dinizin komandası eyniadlı rəqibə 2:4 hesabıyla uduzaraq zirvədən 5-ci yerə düşdü. Xalını 7-yə çatdıran “Fortaleza” isə 2-ci yerə yüksəldi.

“Botafoqo” isə qələbə seriyasını davam etdirdi. “Flamenqo” ilə Rio de Janeyro derbisi çox maraqlı keçdi. İlk hissənin son 20 dəqiqəsində vurulan iki cavabsız qol “ağ-qaralar”a əhəmiyyətli üstünlük qazandırdı. 51-ci dəqiqədə müdafiəçi Rafaelin növbəti xəbərdarlığa görə meydandan qovulması “Flamenqo”nun işinə yaradı. Xorxe Sampaolinin komandası fasilədən sonra Leo Pereyra ilə iki qol vurdu. Ancaq Tikinyo Soaresin dubl etməsi on nəfərlə oynayan qonaqlara 3:2 hesablı qələbə qazandırdı. Derbidəki uğuru portuqaliyalı Luiş Kastronun çalışdırdığı “Botafoqo”nu 3 oyuna maksimum xalla vahid liderə çevirdi.

2022-ci il mövsümünün çempionu olan “Palmeyras” hesabat turunu maksimum xalla başa vurdu. Abel Ferreyranın komandası “Korintians” ilə ev oyununu 2:1 hesablı qələbə ilə bitirdi. San Paulu derbisinin qəhrəmanı hesabı açan Muriloya məhsuldar ötürmə verən və qələbə qolunu vuran Rafael Veyqa oldu. Matçda vurulan son qol da “Palmeyras”ın oyunçusunun hesabına yazıldı. Sadəcə, müdafiəçi Pikeres 76-cı dəqiqədə topu öz qapısına yönəltdi. Derbidə qələbə çempionu 4-cü yerdən 3-ə yüksəltdi.

“İnternasyonal”ın da hesabında 7 xal var. Vitse-çempion evdə “Qoyas”a minimal hesabla qalib gəldi. 52-ci dəqiqədə De Pena portu aleqrililəri önə keçirdi. 9 dəqiqə sonra qonaqların müdafiəçisi Maquinyo bir neçə saniyə ərzində iki sarı vərəqə alaraq komandasını azlıqda qoydu. Manu Menezeşin komandası qalan vaxtda bundan yararlana bilməsə də, ardıcıl ikinci qələbə ilə 4-cü yerə çıxdı.

3-cü tur
Fortaleza – Fluminense 4:2
Tyaqo Qalyardo, 29. Moyses, 35; 60. Erkules, 79 – Allan, 45+2. Con Kennedi, 69.
Flamenqo - Botafoqo RJ 2:3
Leo Pereyra, 58; 86 – Tikinyo Soares, 30-p.; 71. Danilo Barboza, 45+5.
Palmeyras - Korintians 2:1
Murilo, 16. Rafael Veyqa, 36 – Pikeres, 76-öz qapısına.
İnternasyonal - Qoyas 1:0
De Pena, 52.
Koritiba - San Paulu 1:1
Bruno Qomes, 12 – Markos Paulo, 81.
Santos - Amerika Mineyro 3:2
Mendosa, 19. Eduardo Bauermann, 40. Markos Leonardo, 69-p. – Ale, 70. Everaldo, 49.
Braqantino - Kruzeyro 0:3
Ramiro, 1. Jilberto, 64. Bruno Rodriges, 87.
Atletiko Mineyro - Atletiko Paranaense 2:1
Halk, 10; 84 – Vitor Roke, 90+2.
Kuyaba – Qremio 1:2
Marllon, 29 – Vina, 10. Everton Qaldino, 68.
Vasku da Qama – Bayya 0:1
Tasyano, 44.

1. Botafoqo RJ 3 3 0 0 7-4 9
2. Fortaleza 3 2 1 0 8-3 7
3. Palmeyras 3 2 1 0 6-4 7
4. İnternasyonal 3 2 1 0 4-2 7
5. Fluminense 3 2 0 1 7-4 6
6. Kruzeyro 3 2 0 1 5-2 6
7. Qremio 3 2 0 1 3-2 6
8. San Paulu 3 1 1 1 5-3 4
9. Vasku da Qama 3 1 1 1 4-4 4
10. Atletiko Mineyro 3 1 1 1 3-3 4
11. Santos 3 1 1 1 3-3 4
12. Braqantino 3 1 1 1 3-5 4
13. Flamenqo 3 1 0 2 6-5 3
14. Atletiko Paranaense 3 1 0 2 3-4 3
15. Bayya 3 1 0 2 3-4 3
16. Qoyas 3 1 0 2 3-4 3
17. Korintians 3 1 0 2 4-6 3
18. Kuyaba 3 0 1 2 3-5 1
19. Koritiba 3 0 1 2 1-7 1
20. Amerika Mineyro 3 0 0 3 2-9 0
Bombardirlər: Tikinyo Soares (Botafoqo RJ), Moyses (Fortaleza) - 3.