Braziliya çempionatının yeni mövsümündə mayın 7-9-u aralığında 4-cü turun oyunları keçirildi. A seriyasında “Botafoqo”nun vahid liderliyi davam edir.
“Football-plus.az” xəbər verir ki, Rio de Janeyro klubu qələbə seriyasını “Atletiko Mineyro” ilə ev oyununda da davam etdirdi. Portuqaliyalı Luiş Kastronun çalışdırdığı komanda hər hissədə bir cavabsız qol vurmaqla qalib gəldi. Xalını 12-yə çatdıran “Botafoqo” maksimum nəticə ilə mövqeyini qorudu.

Tura hərəyə 7 xal toplamaqla 2-4-cü yerlərdə başlayan 3 komanda fərqli nəticələr göstərdi. “Fortaleza” səfərdə “Korintians”dan bir xalı 1:1 hesablı heç-heçə ilə ala bildi və 2-ci yerdən 4-ə düşdü. “İnternasyonal” San Paulu səfərindən evə əliboş döndü. Ötən mövsümün vitse-çempionu eyniadlı rəqibinə iki cavabsız qolla uduzdu. İlk məğlubiyyət Fernando Dinizin komandasını 4 pilləlik geriləmə ilə 8-ci yerə saldı.

2022-ci il mövsümünün çempionu olan “Palmeyras” isə hesabat turunu maksimum xalla başa vurdu. Abel Ferreyranın komandası “Qoyas”a səfərdə böyük hesabla qalib gəldi. Ev sahiblərinin müdafiəçisi Lukas Halterin 41-ci dəqiqədə rəqibə qarşı kobud oyuna görə birbaşa qırmızı vərəqə ilə cəzalanması matçın axarına çox təsir etdi. Bunadək hesabda minimal üstünlüyə malik olan çempion azlıqda qalan qoyaniyalıların qapısından daha 4 top keçirdi. 5:0 hesablı qələbə “Palmeyras”ı liderin əsas izləyicisinə çevirdi.

Maraqlıdı ki, 3-cü pilləyə “Kruzeyro” sahib çıxdı. Birillik fasilədən sonra A seriyasına qayıdan belu orizontelilər mövsümə məğlubiyyətlə başlasalar da, ardıcıl 3 qələbə qazanmağı bacarıblar. “Flamenqo”da isə əks proses gedir. İlk turda qalib gələn Xorxe Sampaolinin komandası 3 oyunluq məğlubiyyət seriyasına “nail olub”.

4-cü tur
Botafoqo RJ - Atletiko Mineyro 2:0
Viktor Sa, 30. Mateus Nasimentu, 60.
Korintians - Fortaleza 1:1
Yuri Alberto, 88 – Kayo Aleşandre, 79.
San Paulu - İnternasyonal 2:0
Lusiano, 33. Pablo Maya, 70.
Qoyas - Palmeyras 0:5
Artur, 10. Sidimar, 48-öz qapısına. Rafael Veyqa, 78. Endrik, 83. Dudu, 90.
Fluminense - Vasku da Qama 1:1
Lima, 55 – Pedro Raul, 1.
Atletiko Paranaense - Flamenqo 2:1
Vitor Roke, 29. Erik, 80 - Qabriel Barboza, 15-p.
Kruzeyro - Santos 2:1
Uesli, 21; 62 - Ancelo, 57.
Amerika Mineyro - Kuyaba 1:2
Luo Quofu, 12 - Marlon, 85-öz qapısına. Ronald, 90+2.
Bayya - Koritiba 3:1
Viktor Luis, 16-öz qapısına. Byel, 65. David Duarte, 68 – Boşilia, 63.
Qremio - Braqantino 3:3
Kristaldo, 6-p. L.Suares, 56. Everton Qaldino, 62 – Mateus Fernandes, 9. Eduardo Saşa, 53. Borbas, 90+1.

1. Botafoqo RJ 4 4 0 0 9-4 12
2. Palmeyras 4 3 1 0 11-4 10
3. Kruzeyro 4 3 0 1 7-3 9
4. Fortaleza 4 2 2 0 9-4 8
5. San Paulu 4 2 1 1 7-3 7
6. Fluminense 4 2 1 1 8-5 7
7. Qremio 4 2 1 1 6-5 7
8. İnternasyonal 4 2 1 1 4-4 7
9. Bayya 4 2 0 2 6-5 6
10. Atletiko Paranaense 4 2 0 2 5-5 6
11. Vasku da Qama 4 1 2 1 5-5 5
12. Braqantino 4 1 2 1 6-8 5
13. Kuyaba 4 1 1 2 5-6 4
14. Santos 4 1 1 2 4-5 4
15. Korintians 4 1 1 2 5-7 4
16. Atletiko Mineyro 4 1 1 2 3-5 4
17. Flamenqo 4 1 0 3 7-7 3
18. Qoyas 4 1 0 3 3-9 3
19. Koritiba 4 0 1 3 2-10 1
20. Amerika Mineyro 4 0 0 4 3-11 0

Bombardirlər: Tikinyo Soares (Botafoqo RJ), Moyses (Fortaleza) - 3.